ଲକ୍ଷ୍ନୌ,୨୮।୩: ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଭାବେ ଯୋଗୀ ଆଦିତ୍ୟନାଥ ଦ୍ୱିତୀୟ ଥର ପାଇଁ କ୍ଷମତାକୁ ଆସିବାର ୧୫ ଦିନ ମଧ୍ୟରେ ଅନୂ୍ୟନ ୫୦ ଅପରାଧୀ ଆତ୍ମସମର୍ପଣ କରିସାରିଲେଣି। ପୋଲିସ ଏନ୍କାଉଣ୍ଟର କିମ୍ବା ଘର ଉପରେ ବୁଲ୍ଡୋଜର ଚାଲିବା ଭୟରେ ସେମାନେ ଆତ୍ମସମର୍ପଣ କରୁଥିବା କୁହାଯାଉଛି। ସେମାନେ ‘ମୁଁ ଆତ୍ମସମର୍ପଣ କରୁଛି, ଦୟାକରି ଗୁଳି କରା ନ ଯାଉ’ ପ୍ଲାକାର୍ଡ ବେକରେ ଝୁଲାଇ ଥାନାରେ ସରେଣ୍ଡର କରୁଥିବା ଦେଖାଯାଉଛି। ଦୀର୍ଘଦିନ ହେଲା ଫେରାର ଥିବା ଗୌତମ ସିଂ ଗତ ୧୫ ତାରିଖରେ ଗୋଣ୍ଡା ଜିଲାର ଛାପିଆ ଥାନାରେ ଆତ୍ମସମର୍ପଣ କରିଛନ୍ତି। ତାଙ୍କ ବିରୋଧରେ ଅପହରଣ ଓ ବଟି ଆଦାୟ ଅଭିଯୋଗ ଥିଲା। ସେହିପରି ସାହରନପୁର ଜିଲାରେ ୩ ଦିନରେ ୨୩ ଅପରାଧୀ ଆତ୍ମସମର୍ପଣ କରିସାରିଲେଣି। ଦେଓବନ୍ଦ ଥାନାରେ ୪ ଜଣ ମଦ ଚୋରାବେପାରୀ ଆଉ ଅପରାଧ କରିବେ ନାହିଁ ସତ୍ୟପାଠ ମାଧ୍ୟମରେ ଜଣାଇଛନ୍ତି। ସେହିପରି ଶାମ୍ଲି ଜିଲାର ୧୮ ଜଣ ଥାନାଭବନ ଓ ଗରହିପୁଖ୍ତା ଥାନାରେ ଆତ୍ମସମର୍ପଣ କରିଛନ୍ତି। ଗୋହତ୍ୟା ମାମଲାରେ ସେମାନେ ଅଭିଯୁକ୍ତ ଥିଲେ। ଅନ୍ୟତମ ଓ୍ବାଣ୍ଟେଡ୍ ଅପରାଧୀ ହିମାଂଶୁ ଓରଫ ହନି ଫିରୋଜାବାଦର ସିର୍ସାଗଞ୍ଜ ଥାନାରେ ‘ମୋତେ ଗୁଳି କରନାହିଁ‘ ପ୍ଲାକାର୍ଡ ପକାଇ ସରେଣ୍ଡର କରିଥିଲେ। ଏହି ସମୟ ମଧ୍ୟରେ ୨ ଅପରାଧୀଙ୍କୁ ଏନ୍କାଉଣ୍ଟର କରାଯାଇଥିବାବେଳେ ଅନ୍ୟ ୧୦ ଜଣଙ୍କୁ ଗିରଫ କରାଯାଇଥିବା ଆଇନଶୃଙ୍ଖଳା ଏଡିଜି ପ୍ରକାଶ କୁମାର କହିଛନ୍ତି।
