ନିମାପଡ଼ା,୪ା୧୦(ଡି.ଏନ୍.ଏ.): ନିମାପଡ଼ା ଅଞ୍ଚଳର ଏକ ଘରୋଇ ଚିକିତ୍ସାଳୟରେ ଜଣେ ମହିଳାଙ୍କ ତ୍ରୁଟିପୂର୍ଣ୍ଣ ଅସ୍ତ୍ରୋପଚାର ଏବଂ ଚିକିତ୍ସା ବାବଦରେ ଅହେତୁକ ଅର୍ଥ ପାଇଁ ଜୁଲମ କରାଯାଉଥିବା ନେଇ ଶନିବାର ନିମାପଡ଼ା ଥାନାରେ ଅଭିଯୋଗ ହୋଇଛି। ଏନେଇ ସମ୍ପୃକ୍ତ ରୋଗୀଙ୍କ ଦେଢ଼ଶୁରଙ୍କ ଅଭିଯୋଗକ୍ରମେ ପୋଲିସ ଉକ୍ତ ଚିକିତ୍ସାଳୟର ଡାକ୍ତର ଓ ପରିଚାଳକଙ୍କ ବିରୋଧରେ ଏକ ମାମଲା(ନଂ.୩୪୬/୨୧) ରୁଜୁକରି ତଦନ୍ତ ଚଳାଇଛି।
ପ୍ରକାଶ ଯେ, ଏହି ଥାନା ଅଧୀନ ଅରିଷଣ୍ଢ ଗ୍ରାମର ମନସ୍ବିନୀ ବେହେରା ପେଟରେ ଯନ୍ତ୍ରଣା ଅନୁଭବ କରିବାରୁ ଗତ ୧୪ତାରିଖରେ ପରିବାରଲୋକ ଚିକିତ୍ସା ପାଇଁ ତାଙ୍କୁ ଉକ୍ତ ଘରୋଇ ଚିକିତ୍ସାଳୟରେ ଭର୍ତ୍ତି କରିଥିଲେ। ଏହା ପରଦିନ ତାଙ୍କର ଲାପୋସ୍କୋପି ଅପରେଶନ କରାଯାଇଥିଲା। ଅପରେଶନ ପରେ ମନସ୍ବିନୀଙ୍କ ସ୍ବାସ୍ଥ୍ୟାବସ୍ଥା ଗୁରୁତର ହୋଇପଡ଼ିଥିଲା। ପରେ ଉକ୍ତ ଚିକିତ୍ସାଳୟର ପରିଚାଳକ ଓ ଡାକ୍ତର ମନସ୍ବିନୀଙ୍କୁ କଟକ ନେବା ପାଇଁ ପରାମର୍ଶ ଦେଇଥିଲେ। ତ୍ରୁଟିପୂର୍ଣ୍ଣ ଅସ୍ତ୍ରୋପଚାର ହୋଇଥିବା ଜାଣିବା ପରେ ପରିବାର ଲୋକଙ୍କ ସମେତ କେତେଜଣ ଗ୍ରାମବାସୀ ଉକ୍ତ ଚିକିତ୍ସାଳୟରେ ହୋହଲ୍ଲା କରିଥିଲେ। ଖବରପାଇ ପୋଲିସ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାଶୁଝା ପରେ ପରିସ୍ଥିତି ଶାନ୍ତ ପଡ଼ିଥିଲା। ପରେ ମନସ୍ବିନୀଙ୍କୁ ଏହି ଚିିକିତ୍ସାଳୟର ଡାକ୍ତର ଓ କର୍ମଚାରୀଙ୍କ ହେପାଜତରେ କଟକର ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଥିଲା। କିଛିଦିନ ପରେ ସେଠାରେ ମନସ୍ବିନୀ ସୁସ୍ଥ ହୋଇଥିଲେ। ଚିକିତ୍ସା ବାବଦରେ କଟକର ଉକ୍ତ କ୍ଲିନିକ କର୍ତ୍ତୃପକ୍ଷଙ୍କ ପକ୍ଷରୁ ୯୩ହଜାର ଟଙ୍କା ଜମା କରିବା ପାଇଁ ରୋଗୀଙ୍କ ପରିବାର ଲୋକଙ୍କୁ କୁହାଯାଇଥିଲା। ତେବେ ରୋଗୀଙ୍କ ପରିବାର ପକ୍ଷରୁ ୩୫ହଜାର ଟଙ୍କା ଜମା କରାଯାଇଥିଲା। ପରେ ଉକ୍ତ କ୍କ୍ଲିନିକ ପକ୍ଷରୁ ଅବଶିଷ୍ଟ ଟଙ୍କା ଜମା ନ କଲେ ରୋଗୀଙ୍କୁ ଡିସଚାର୍ଜ କରାଯିବ ନାହିଁ କୁହାଯାଇଥିଲା। ପରବର୍ତ୍ତୀ ସମୟରେ ସମାଧାନ ପରେ ରୋଗୀଙ୍କୁ ଡିସଚାର୍ଜ କରାଯାଇଥିଲା। ଅନ୍ୟପକ୍ଷେ ବିଜୁ ସ୍ବାସ୍ଥ୍ୟ ବୀମା କାର୍ଡରେ ମାଗଣାରେ ଅସ୍ତ୍ରୋପଚାର ଓ ଚିକତ୍ସା କରାଯିବ ବୋଲି ନିମାପଡ଼ା ଘରୋଇ ଚିକିତ୍ସାଳୟର ପରିଚାଳକ ରୋଗୀଙ୍କ ପରିବର ଲୋକଙ୍କୁ କହିଥିଲେ। ମାତ୍ର ପରେ ଚିକିତ୍ସାଳୟର ପରିଚାଳକ ଚିକିତ୍ସା ବାବଦରେ ମୋଟା ଅଙ୍କର ଅର୍ଥ ଦାବି କରୁଥିବା ଅଭିଯୋଗଫର୍ଦ୍ଦରେ ଦର୍ଶାଯାଇଛି। ପୁରୀ ଏଡିଏମ୍ଓ ନିମାପଡ଼ାର ଉକ୍ତ ଘରୋଇ ଚିକତ୍ସାଳୟରେ ପହଞ୍ଚି ତଦନ୍ତ କରିଥିବା ଜଣାପଡ଼ିଛି। ଏ ସମ୍ପର୍କରେ ନିମାପଡ଼ା ଚିକତ୍ସାଳର ଡାକ୍ତର ଓ ପଚରିଚାଳକ କହିଛନ୍ତି, ଅସ୍ତ୍ରୋପଚାର ପରେ ରୋଗୀଙ୍କୁ ଆଇସିୟୁ ଆବଶ୍ୟକ ପଡ଼ିବାରୁ କଟକର ଏକ ଘରୋଇ କ୍ଲିନିକକୁ ସ୍ଥାନାନ୍ତର କରାଯାଇଥିଲା। ରୋଗୀଙ୍କ ପରିବାର ଲୋକେ ଆଣିଥିବା ଅଭିଯୋଗ ମିଥ୍ୟା ବୋଲି ସେମାନେ କହିଛନ୍ତି।
