ଦିଗପହଣ୍ଡି,୯।୩(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ବ୍ଲକ ଭୀଷ୍ମଗିରି ଗ୍ରାମରେ ରବିବାର ଅପରାହ୍ନରେ ପୋଷ୍ୟପୁଅ କୁନା ସାହୁ ବୃଦ୍ଧ ବାପା ସୀମାଞ୍ଚଳ ସାହୁ(୮୦)ଙ୍କ ବେକକୁ ପେପର କଟାରେ ବ୍ୟବହୃତ ଛୁରିରେ କାଟି ହତ୍ୟା ଉଦ୍ୟମ କରିଥିଲେ। ଏ ନେଇ ସୀମାଞ୍ଚଳଙ୍କ ସ୍ତ୍ରୀ ପାଣ୍ଡି ସାହୁ ଦିଗପହଣ୍ଡି ଥାନାରେ ଏତଲା ଦେଇଥିଲେ। ଏତଲାକୁ ଭିତ୍ତିକରି ମାମଲା ନଂ.୯୫/୨୬ ଭାରତୀୟ ନ୍ୟାୟ ସଂହିତା ଦଫା – ୧୦୯/୩୩୩/୧୧୫(୨)/୧୧୮(୨)/୧୧୭(୨) ଅନୁଯାୟୀ ମକଦ୍ଦମା ରୁଜୁ କରାଯାଇଥିଲା। ଘଟଣାରେ ସମ୍ପୃକ୍ତ କେ.ନୂଆଗାଁ ଥାନା ଜକର ଗ୍ରାମର କୁନାଙ୍କୁ ତଦନ୍ତକାରୀ ଅଧିକାରୀ ଆଇଆଇସି କିଶୋର କୁମାର ସାମଲ ସୁରଳ ରେଲୱେ ଷ୍ଟେଶନ ନିକଟରୁ ଗିରଫ କରି ସୋମବାର କୋର୍ଟ ଚାଲାଣ କରିଛନ୍ତି। ଜାମିନ ଆବେଦନ ଖାରଜ ହେବାରୁ ଅଭିଯୁକ୍ତଙ୍କୁ ଦିଗପହଣ୍ଡି ସବ ଜେଲ୍ ହାଜତକୁ ପଠାଇ ଦିଆଯାଇଛି। ଭୀଷ୍ମଗିରି ଗ୍ରାମ ଠାକୁରାଣୀ ଛକରେ ରହୁଥିବା ସୀମାଞ୍ଚଳ ନିଃସନ୍ତାନ ଥିବାରୁ କିଛି ବର୍ଷ ପୂର୍ବେ ଜକର ଗ୍ରାମରେ ରହୁଥିବା ତାଙ୍କ ସଢୁଙ୍କ ପୁଅ କୁନାଙ୍କୁ ପୋଷ୍ୟପୁଅ ଭାବେ ଆଣି ଘରେ ରଖିଥିଲେ। ମଉସା ସୀମାଞ୍ଚଳଙ୍କ ଜଳଖିଆ ଓ ମିଠା ଦୋକାନରେ କୁନା କାମ କରୁଥିଲେ। କିଛିଦିନ ପୂର୍ବେ କୁନାଙ୍କ ଭାଇ ସୀମାଞ୍ଚଳଙ୍କ ଘରେ ପହଞ୍ଚି କୁନାଙ୍କ ଉପସ୍ଥିତିରେ୧୪ ହଜାର ଟଙ୍କା ଧାର ନେଇଥିଲେ। ଟଙ୍କା ଦେଣନେଣକୁ ନେଇ ସୀମାଞ୍ଚଳଙ୍କ ସହ କୁନାଙ୍କ ପୂର୍ବରୁ ଅନେକ ଥର ବଚସା ହୋଇଥିଲା। ରବିବାର କୁନା ଫୋନ କରି ଟଙ୍କା ଫେରାଇବା ବାହାନାରେ ସୀମାଞ୍ଚଳଙ୍କୁ ଗାଁର ଯାତ୍ରା ପଡିଆକୁ ଡାକିଥିଲେ।
ସୀମାଞ୍ଚଳ ତାଙ୍କ ଝିଅ ସୁନୀତା ସହ ଯାତ୍ରା ପଡିଆକୁ ଯାଇଥିଲେ। ସେଠାରେ ଉଭୟ କୁନା ଓ ସୀମାଞ୍ଚଳଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା। କୁନା ଉତ୍ତେଜିତ ହୋଇ ତାଙ୍କୁ ଅତର୍କିତ ଭାବେ ଆକ୍ରମଣ କରିବା ସହ ଛୁରିରେ ବେକକୁ କାଟି ଦେଇଥିଲେ। ସ୍ଥାନୀୟ ଲୋକେ ପୋଲିସକୁ ଖବର ଦେଇଥିଲେ। ପୋଲିସ ସହାୟତାରେ ତାଙ୍କୁ ରକ୍ତାକ୍ତ ଅବସ୍ଥାରେ ଉଦ୍ଧାର କରି ଦିଗପହଣ୍ଡି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା। ପ୍ରାଥମିକ ଚିକିତ୍ସା ପରେ ଅବସ୍ଥା ଗୁରୁତର ଥିବାରୁ ତାଙ୍କୁ ବ୍ରହ୍ମପୁର ବଡ଼ ଡାକ୍ତରଖାନାକୁ ସ୍ଥାନାନ୍ତର କରାଯାଇଥିଲା। ତଦନ୍ତକାରୀ ଅଧିକାରୀ ଫେରାର ଅଭିଯୁକ୍ତଙ୍କ ମୋବାଇଲ ଫୋନକୁ ଟ୍ରାକିଂ କରି ତାଙ୍କୁ ସୁରଳ ରେଲୱେ ଷ୍ଟେସନ ନିକଟରୁ ଧରିବାକୁ ସକ୍ଷମ ହୋଇଥିଲେ। ତାଙ୍କ ନିକଟରୁ ଛୁରି, ଫୋନ ଏବଂ ରକ୍ତ ଲାଗିଥିବା ପୋଷାକକୁ ଜବତ କରାଯାଇଛି।
Dharitri – Odisha’s No.1 Odia Daily