ନୂଆଦିଲ୍ଲୀ,୨୫ା୧: ଭାରତୀୟ ସଡ଼କ ପଥରେ ପ୍ରତିଦିନ ଲକ୍ଷାଧିକ ଗାଡ଼ି ଚଳପ୍ରଚଳ କରୁଥିବା ବେଳେ ସଡ଼କ ପଥରେ ଆଦାୟ ହେଉଥିବା ଟିକସ ପରିମାଣ କିନ୍ତୁ ସେହି ଅନୁସାରେ ଆଦାୟ ହେଉ ନ ଥିଲା। ଫଳରେ ସରକାର କୋଟି କୋଟି ଟଙ୍କାର ରାଜସ୍ବ ହରାଉଥିଲେ। ଏହାକୁ ଗୁରୁତ୍ୱର ସହ ଗ୍ରହଣକରି କେନ୍ଦ୍ର ସରକାର ୨୦୧୯-୨୦ ଆର୍ଥକ ବର୍ଷରେ ଫାସ୍ଟାଗ୍ ବ୍ୟବହାରକୁ ବାଧ୍ୟତାମୂଳକ କରିଥିଲେ। ଏପରିକି ସାରା ଦେଶରେ ଟେକ୍ନୋଲୋଜି ଜରିଆରେ ସଡ଼କ ପଥର ଟିକସ ଆଦାୟ କରାଗଲା। ବିଶେଷକରି ଫାସ୍ଟାଗ୍ ମାଧ୍ୟମରେ ଜାତୀୟ ତଥା ରାଜ୍ୟ ରାଜପଥରେ ଟୋଲ୍ ସଂଗ୍ରହକୁ କଡ଼ାକଡ଼ି କରାଗଲା। ଅପରପକ୍ଷରେ ଫାସ୍ଟାଗ୍ର ବ୍ୟବହାର ବୃଦ୍ଧି ସାଙ୍ଗକୁ ଟିକସ ସଂଗ୍ରହରେ ମଧ୍ୟ ବୃଦ୍ଧି ଘଟିଲା। ଏପରିକି ୨୦୨୨ରେ ଫାସ୍ଟାଗ୍ ଜରିଆରେ ପ୍ରାୟ ୫୧,୦୦୦ (୫୦,୮୫୫) କୋଟି ଟଙ୍କାର ଟିକସ ସଂଗ୍ରହ କରାଯାଇଥିତ୍ବା ଜାତୀୟ ରାଜପଥ ପ୍ରାଧିକରଣ (ଏନ୍ଏଚ୍ଏଆଇ) ପକ୍ଷରୁ କୁହାଯାଇଛି। ଏପରିକି ୨୦୨୧ ବର୍ଷର ଟିକସ ସଂଗ୍ରହଠାରୁ ୨୦୨୨ର ଟିକସ ସଂଗ୍ରହ ଯଥେଷ୍ଟ ଅଧିକ ଓ ସର୍ବାଧିକ ବୋଲି ଜଣାପଡ଼ିଛି। ଏପରିକି ୨୦୨୧ଠାରୁ ୨୦୨୨ରେ ଟିକସ ସଂଗ୍ରହ ପ୍ରାୟ ୪୬% ଅଧିକ ବୋଲି ଏନ୍ଏଚ୍ଏଆଇ ପକ୍ଷରୁ କୁହାଯାଉଛି। ସେହିପରି ଏନ୍ଏଚ୍ଏଆଇ ଦ୍ୱାରା ପ୍ରକାଶିତ ତଥ୍ୟ ଅନୁଯାୟୀ ପୂର୍ବ ବର୍ଷରେ ଇଲେକ୍ଟ୍ରୋନିକ୍ ଟୋଲ୍ ସଂଗ୍ରହ ୩୪,୭୭୮ କୋଟି ଟଙ୍କା ରହିଥିଲା। ଏପରିକି ଫାସ୍ଟାଗ୍ କାରବାର ସଂଖ୍ୟା ମଧ୍ୟ ବୃଦ୍ଧି ପାଇଛି। ୨୦୨୧ରେ ତୁଳନାରେ ୨୦୨୨ରେ ଏହା ୪୮% ବୃଦ୍ଧି ହୋଇଥିବା ବେଳେ ୨୦୨୧ ଏବଂ ୨୦୨୨ରେ ଫାସ୍ଟାଗ୍ କାରବାର ସଂଖ୍ୟା ଯଥାକ୍ରମେ ୨୧୯ କୋଟି ଏବଂ ୩୨୪ କୋଟି ରହିଥିଲା ବୋଲି ସଡ଼କ ପରିବହନ ଏବଂ ରାଜପଥ ମନ୍ତ୍ରଣାଳୟ(ମର୍ଥ) ପକ୍ଷରୁ କୁହାଯାଇଛି। ସେହିପରି ୨୦୨୨ରେ ସଂଗ୍ରହ ହୋଇଥିବା ରାଜସ୍ବଗୁଡ଼ିକ ହାରାହାରି ପ୍ରାୟ ୪,୨୦୦ କୋଟି ଟଙ୍କା ଥିଲା। ୨୦୨୨ ମାର୍ଚ୍ଚରେ ମାସିକ ସଂଗ୍ରହ ପ୍ରଥମ ଥର ପାଇଁ ୪,୦୦୦ କୋଟି ଟଙ୍କା ଅତିକ୍ରମ କରିଥିଲା। ମର୍ଥର ସୂଚନା ଅନୁଯାୟୀ ବର୍ତ୍ତମାନ ସୁଦ୍ଧା ୬.୪ କୋଟି ଫାସ୍ଟାଗ୍ ମନ୍ତ୍ରଣାଳୟ ପକ୍ଷରୁ ଜାରି କରାଯାଇଛି। ଏପରିକି ସମଗ୍ର ଭାରତରେ ଫାସ୍ଟାଗ୍ ସକ୍ଷମ ଫି ପ୍ଲାଜାର ସଂଖ୍ୟା ୨୦୨୨ରେ ୧,୧୮୧କୁ ବୃଦ୍ଧି ପାଇଛି।
