ଅତାବିରା, ୧୯ା୧୨(ଯୁଧିଷ୍ଠିର ମହାପାତ୍ର):ବରଗଡ଼ ଜିଲାରେ ଗତ ମାସ ୨୮ ତାରିଖରୁ ମଣ୍ଡି ଖୋଲିଥିବା ବେଳେ ବର୍ତ୍ତମାନ ମଧ୍ୟ ଧାନ କିଣା ବିକା ସ୍ବାଭାବିକ ହୋଇପାରି ନାହିଁ l ଜିଲାର ୧ଲକ୍ଷ ୬୮ହଜାରରୁ ଊର୍ଦ୍ଧ୍ୱ ଚାଷୀ ପଞ୍ଜୀକୃତ ହୋଇଥିବା ବେଳେ ବର୍ତ୍ତମାନ ପର୍ଯ୍ୟନ୍ତ ୧ ଲକ୍ଷ ୨୦ହଜାର ଚାଷୀଙ୍କୁ ଟୋକନ ପ୍ରଦାନ କରାଯାଇଛି। ତେବେ ଏବେ ମଧ୍ୟ ୪୮ହଜାରରୁ ଊର୍ଦ୍ଧ୍ୱ ଚାଷୀ ଟୋକନ ପାଇବାରୁ ବଞ୍ଚତ୍ତ ରହିଛନ୍ତି। ଗତକାଲି ସୁଦ୍ଧା ୬ହଜାର ଚାଷୀଙ୍କଠାରୁ ୪ଲକ୍ଷ ୫୦ହଜାର କୁଇଣ୍ଟାଲ ଧାନ ରାଜ୍ୟ ସରକାର କିଣିଛନ୍ତି। ହେଲେ ଏବେ ବି ଲକ୍ଷ ଲକ୍ଷ ପ୍ୟାକେଟ ଧାନ ବିଭିନ୍ନ ମଣ୍ଡିରେ ପଡ଼ି ରହିଛି l ଅତାବିରା ମଣ୍ଡିରେ ୧୧ଲକ୍ଷ ୩୩୫ପ୍ୟାକେଟ ଧାନ ପଡ଼ିଥିବା ବେଳେ ବର୍ତ୍ତମାନ ପର୍ଯ୍ୟନ୍ତ ୭ଲକ୍ଷ ୧୬ହଜାର ୫୪ ପ୍ୟାକେଟ ଧାନ ଉଠିଛି। ଅତାବିରା ଆର୍ଏମ୍ସି ଅଧୀନ ବିଭିନ୍ନ ମଣ୍ଡିରେ ଆଜି ବି ୩ଲକ୍ଷ ୮୪ ହଜାର ୨୮୧ ପ୍ୟାକେଟ ଧାନ ବିକ୍ରି ଅପେକ୍ଷାରେ ଖୋଲା ଆକାଶ ତଳେ ପଡ଼ି ରହିଛି। ଫଳରେ ଧାନ କିଣାର ମନ୍ଥର ପ୍ରକ୍ରିୟାକୁ ନେଇ ଚାଷୀ ଅସନ୍ତୋଷ ବଢ଼ିବାରେ ଲାଗିଛି। ଅନ୍ୟପଟେ ଧାନମଣ୍ଡି ଫୁଲ୍ ହୋଇଯାଇଥିବା ବେଳେ ଚାଷୀଙ୍କ ପାଖରେ ଆଉ ଧାନ ରଖିବା ପାଇଁ ମଧ୍ୟ ଅନ୍ୟ କୌଣସି ବ୍ୟବସ୍ଥା ନାହିଁ। ବର୍ତ୍ତମାନ ଚାଷୀ ତା’ର କଷ୍ଟ ଉପାର୍ଜିତ ଫସଲକୁ ନେଇ ଦିନ ରାତି ଜଗି ବସି ରହିଛନ୍ତି। ଧାନ ବିକ୍ରି ନ ହେଲେ ଆଗକୁ ରବି ଫସଲ ପାଇଁ କିପରି ପ୍ରସ୍ତୁତ ହେବ ତାହା ସବୁଠାରୁ ବଡ଼ ପ୍ରଶ୍ନ। ଅତାବିରାରେ ଧାନ କିଣାବିକାରେ ଦେଖା ଦେଇଥିବା ଅଚଳାବସ୍ଥା ସକାଶେ ସାମ୍ଭାବ୍ୟ ଆନ୍ଦୋଳନର ସମର୍ଥନ ପାଇଁ ଗୁରୁବାର ଅପରାହ୍ଣରେ ଅତାବିରା ଅଗ୍ରସେନ ଭବନରେ ରେଂଗାଲିକେମ୍ପ, ଅତାବିରା ଓ ଗୋ ଅଞ୍ଚଳର ବିଭିନ୍ନ ସାମାଜିକ ସଂଗଠନର କର୍ମକର୍ତ୍ତାକୁ ନେଇ ସଂଗଠନର ସଭାପତି ବୀରେନ୍ଦ୍ର କରଙ୍କ ସଭାପତିତ୍ୱରେ ଏକ ବେଠକ ଚାଲିଛି l
Dharitri – Odisha’s No.1 Odia Daily
