ବଣାଇଁ,୧୧ା୯(ପ୍ରଦୀପ ତ୍ରିପାଠୀ): ସାର ପାଇଁ ଲାଇନ ଲାଗିଛି ଆଧାରକାର୍ଡ ଓ ବ୍ୟାଗ୍। ଚାଷୀଟିଏ ସାମାନ୍ୟ ସାର ଟିକେ ପାଇଁ ଦିନଦିନ ଧରି ଅପେକ୍ଷା କରୁଥିବା ବେଳେ ବୁଧବାର ନରେନ୍ଦ୍ର ଲ୍ୟାମ୍ପସକୁ ସାର ଆସିଥିବା ଖବର ଶୁଣି ରାତି ଉଜାଗର ହୋଇ ଲାଇନ୍ ଲଗାଇଛନ୍ତି। ଚାଷୀ ପାଇଁ ସାର ଏବେ ଅତ୍ୟନ୍ତ ଗୁରୁତ୍ୱପୂର୍ଣ୍ଣ, ଚାଷ ଠିକ୍ ଭାବେ ହେବ ବୋଲି ସାର ମୁଠେ ପାଇଁ ଚାଷୀ ଏବେ ସମ୍ପର୍କ ଭୁଲିବାକୁ ପଛାଉନାହିଁ। ଏହିଭଳି ଏକ ଦୃଶ୍ୟ ଦେଖିବାକୁ ମିଳିଛି ଗୁରୁଣ୍ଡିଆ ବ୍ଲକର ନରେନ୍ଦ୍ର ଲ୍ୟାମ୍ପରେ। ପୂର୍ବରୁ ଅନେକଥର ଲ୍ୟାମ୍ପକୁ ଆସି ଫେରି ଯାଉଥିବା ଚାଷୀମାନେ ସାର ଆସିବା ଖବର ପାଇ ଗତ ରାତିରୁ ଲାଇନ ଲାଗିଛନ୍ତି। ନିଜେ ଉପସ୍ଥିତ ଥିବା ଲାଇନରେ ଆଧାର କାର୍ଡ ଓ ବ୍ୟାଗକୁ ସନ୍ତକ କରିଛନ୍ତି ।
ଅପରପକ୍ଷରେ ଏବେ ମାତ୍ର ୨ ଶହ ବସ୍ତା ସାର ଆସିଛି। ହେଲେ ୨ ହଜାରରୁ ଊର୍ଦ୍ଧ୍ୱ ଚାଷୀ ଥିବାରୁ ପ୍ରବଳ ପାଟିତୁଣ୍ଡ ଯୋଗୁ ଲ୍ୟାମ୍ପ କର୍ତ୍ତୃପକ୍ଷ ୫୦ ବସ୍ତା ସାର ଥାଇ ବଣ୍ଟନକୁ ବନ୍ଦ କରିଛନ୍ତି। ଆସନ୍ତାକାଲି ସାର ଆସିଲେ ସମସ୍ତଙ୍କୁ ମିଳିବ ବୋଲି ଗୁରୁଣ୍ଡିଆ ଲ୍ୟାମ୍ପସର ହିସାବରକ୍ଷକ ଜଗନ୍ନାଥ ବିଶ୍ୱାଳ ଉତ୍ତର ରଖିଛନ୍ତି।
