ଠକିଗଲେ ଚାଷୀକୁଳ

ନୂଆଦିଲ୍ଲୀ,୨ା୨:୩ ନୂଆ କୃଷି ଆଇନକୁ ନେଇ ମୁହଁାମୁହିଁ ସ୍ଥିତିରେ କେନ୍ଦ୍ର ସରକାର ଓ କୃଷକ ସଙ୍ଗଠନ। ଏହି ବିବାଦୀୟ ଆଇନ ପ୍ରତ୍ୟାହାର ଦାବିରେ ଦିଲ୍ଲୀର ସିଙ୍ଘୁ, ଟିକ୍ରି ଓ ଗାଜିପୁର ସୀମାରେ ଲକ୍ଷାଧିକ କୃଷକ ଆନ୍ଦୋଳନରତ। ଚାଷୀଙ୍କ
ଧାରଣା ୭୧ ଦିନରେ ପହଞ୍ଚତ୍ଥିବାବେଳେ ସୋମବାର ପାର୍ଲାମେଣ୍ଟରେ ଉପସ୍ଥାପିତ ହୋଇଛି ୨୦୨୧-୨୨ ଆର୍ଥିକ ବର୍ଷ ପାଇଁ ସାଧାରଣ ବଜେଟ। ଦେଶର ଚାଷୀ ଆଶା କରିଥିଲେ ସରକାର ଏଥର ସେମାନଙ୍କ ପାଇଁ କିଛି ବଡ଼ ଘୋଷଣା କରିବେ। କିନ୍ତୁ ସେଭଳି ବଦାନ୍ୟତା ଦେଖିବାକୁ ମିଳିନାହିଁ। ବଜେଟରେ ବିଭିନ୍ନ ସେକ୍ଟରକୁ କରାଯାଇଥିବା ଆବଣ୍ଟନକୁ ତୁଳନାମତ୍କ ଦୃଷ୍ଟିରେ ଦେଖିଲେ କୃଷିକ୍ଷେତ୍ରକୁ ଏକପ୍ରକାର ଅଣଦେଖା କରାଯାଇଛି। ଏପରି କି ଏମ୍‌ଏସ୍‌ପି ଆଇନ ଆଣିବା ପାଇଁ କୃଷକମାନଙ୍କ ଦାବି ସମ୍ପର୍କରେ ମଧ୍ୟ ଅର୍ଥମନ୍ତ୍ରୀ ନିର୍ମଳା ସୀତାରାମନ ମୁହଁ ଖୋଲି ନାହାନ୍ତି। ଫଳରେ ଚାଷୀକୁଳ ଠକିଯାଇଥିବା ମନେକରୁଛନ୍ତି।

ପ୍ରତିଶ୍ରୁତି ପାଣିର ଗାର
କୃଷକଙ୍କ ଆୟ ଦ୍ୱିଗୁଣିତ କରିବା ପାଇଁ କେନ୍ଦ୍ର ସରକାର ଗତ ୫-୬ ବର୍ଷ ହେଲା ପ୍ରତିଶ୍ରୁତି ଦେଇଆସୁଛନ୍ତି। କିନ୍ତୁ ବାସ୍ତବ କ୍ଷେତ୍ରରେ ସେଭଳି ଆଖିଦୃଶିଆ ପଦକ୍ଷେପ ନେଉଥିବା ଭଳି ମନେହେଉନାହିଁ। ୨୦୧୯ ସାଧାରଣ ନିର୍ବାଚନ ବେଳେ ମଧ୍ୟ ପ୍ରଧାନମନ୍ତ୍ରୀ ଓ ତାଙ୍କ କ୍ୟାବିନେଟ ସହଯୋଗୀମାନେ ଚାଷୀଙ୍କ ଆୟ ଦୁଇଗୁଣ କରାଯିବ ବୋଲି ପ୍ରତିଶ୍ରୁତି ଦେଇଥିଲେ। ଏହି ଲକ୍ଷ୍ୟ ପୂରଣ ପାଇଁ ବଜେଟରେ ନିର୍ଦ୍ଦିଷ୍ଟ ଭାବେ ସେପରି କିଛି ବ୍ୟବସ୍ଥା କରାଯାଇ ନ ଥିବାରୁ ଚାଷୀ ଏହାକୁ ପାଣିର ଗାର ବୋଲି ଜାଣିଗଲେଣି।

ପୁରୁଣା କଥା ଦୋହରାଇଲେ
ଆନ୍ଦୋଳନକାରୀ କୃଷକ ଯେଉଁ ବିଷୟକୁ ନେଇ ସବୁଠୁ ଅଧିକ ଚିନ୍ତିତ, ସେଥିରୁ ପ୍ରମୁଖ ପ୍ରସଙ୍ଗ ହେଉଛି ଏମ୍‌ଏସ୍‌ପି। କିନ୍ତୁ ସାଧାରଣ ବଜେଟ ଉପସ୍ଥାପନ ବେଳେ ଅର୍ଥମନ୍ତ୍ରୀ ଏହା ଉପରେ ନିର୍ଦ୍ଦିଷ୍ଟ ଭାବେ କିଛି ନ କହି ପୁରୁଣା କଥା ଦୋହରାଇଥିଲେ।
କହିଥିଲେ, କୃଷକଙ୍କ ଉନ୍ନତି ପାଇଁ ସରକାର ପ୍ରତିଶ୍ରୁତିବଦ୍ଧ। ଏଥିପାଇଁ ସମସ୍ତ ଫସଲ ଉପରେ ଉତ୍ପାଦନ ଖର୍ଚ୍ଚର ଅନୂ୍ୟନ ୧.୫ ଗୁଣ ଅଧିକ ଏମ୍‌ଏସ୍‌ପି ଦିଆଯାଉଛି। ଆମେ କୃଷକମାନଙ୍କୁ ୭୫,୦୦୦ କୋଟି ଟଙ୍କା ଅଧିକ ଦେଇଛୁ। କୃଷକଙ୍କୁ ଅର୍ଥ ପ୍ରଦାନ ପ୍ରକ୍ରିୟାକୁ ମଧ୍ୟ ତ୍ୱରିତ କରାଯାଇଛି। ଗହମ ପାଇଁ ୭୫,୦୬୦ ଓ ଡାଲି ଲାଗି ୧୦,୫୦୩ କୋଟି ଟଙ୍କା ଦିଆଯାଇଛି। ଧାନ ପାଇଁ ପଇଠ କରାଯାଉଥିବା ଅର୍ଥ ୧,୭୨,୭୫୨ କୋଟି ଟଙ୍କା ହୋଇପାରେ ବୋଲି ଅନୁମାନ କରାଯାଉଛି। ଏହା ବ୍ୟତୀତ କୃଷି ଉତ୍ପାଦଗୁଡ଼ିକର ରପ୍ତାନିରେ ଆଉ ୨୨ଟି ସାମଗ୍ରୀକୁ ସାମିଲ କରାଯିବ।

 

ଏମ୍‌ଏସ୍‌ପି ଉପରେ ଘୋଷଣା
ସର୍ବନିମ୍ନ ସହାୟକ ମୂଲ୍ୟ (ଏମ୍‌ଏସ୍‌ପି) ଉପରେ ଆଇନ ପ୍ରଣୟନ ଓ କୃଷି ଆଇନକୁ ଉଚ୍ଛେଦ କରିବା ଲାଗି ଦାବି ଜୋର ଧରିଥିବାବେଳେ କୃଷକମାନଙ୍କୁ ସରକାର ଏହି ବଜେଟ ଜରିଆରେ ପୁଣିଥରେ ବଡ଼ ସନ୍ଦେଶ ଦେବାକୁ ଉଦ୍ୟମ କରିଛନ୍ତି। ଅର୍ଥମନ୍ତ୍ରୀ ସୀତାରାମନ ଏମ୍‌ଏସ୍‌ପି ଉପରେ କ୍ରୟ ଜାରି ରଖିବା ପାଇଁ ଆଶ୍ୱାସନା ଦେଇଛନ୍ତି। ଏହା ବ୍ୟତୀତ ସରକାର ଉଜ୍ଜ୍ୱଳା ଯୋଜନାରେ ଅଧିକ ଲାଭାର୍ଥୀଙ୍କୁ ବଢ଼ାଇବା ପାଇଁ ଘୋଷଣା କରିଛନ୍ତି। ସେ କହିଛନ୍ତି, ମାଗଣା ରୋଷେଇ ଗ୍ୟାସ୍‌ ଯୋଜନା ‘ଉଜ୍ଜ୍ୱଳା’ରେ ଆଉ ୧ କୋଟି ହିତାଧିକାରୀଙ୍କୁ ଯୋଡ଼ାଯିବ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ୪ କୋଟିରୁ ଅଧିକ କୃଷକ, ମହିଳାଙ୍କୁ ପ୍ରତ୍ୟକ୍ଷ ଅର୍ଥ ହସ୍ତାନ୍ତର କରିଛନ୍ତି।

ସଫଳତା ବଖାଣିବାବେଳେ ବିରୋଧୀଙ୍କ ସ୍ଲୋଗାନ
ଲୋକ ସଭାରେ ସୀତାରାମନ ବଜେଟ ଉପସ୍ଥାପନ କରି କହିଛନ୍ତି, ୨୦୨୧ ଆର୍ଥିକ ବର୍ଷରେ ଗହମ ଉପରେ ୭୫,୧୦୦ କୋଟି ଟଙ୍କା ଦିଆଯାଇଛି। ଅର୍ଥମନ୍ତ୍ରୀଙ୍କ ଅନୁସାରେ ୪୩.୩୬ ଲକ୍ଷ ଗହମ ଚାଷୀଙ୍କୁ ଏମ୍‌ଏସ୍‌ପି ରୂପେ ସରକାରୀ କ୍ରୟରୁ ଲାଭ ମିଳିଛି। ଏହି ସଂଖ୍ୟା ପୂର୍ବରୁ ୩୫.୫୭ ଲକ୍ଷ ଥିଲା। ଏତିକି ବେଳେ ବିରୋଧୀ ଦଳ ସଦସ୍ୟମାନେ କେନ୍ଦ୍ରର ୩ କୃଷି ଆଇନ ବିରୋଧରେ ସ୍ଲୋଗାନ ଦେଇଥିଲେ। ଅର୍ଥମନ୍ତ୍ରୀ ସେମାନଙ୍କୁ ଜବାବ ଦେବାକୁ ଯାଇ କହିଥିଲେ, କୃଷି କ୍ରୟ ଉପରେ ଲଗାତର ବୃଦ୍ଧି ହୋଇଛି, ଯେଉଁଥିପାଇଁ କୃଷକ ଲାଭାନ୍ବିତ ହୋଇଛନ୍ତି। ସରକାର ୨୦୨୨ ସୁଦ୍ଧା କୃଷକଙ୍କ ଆୟ ଦ୍ୱିଗୁଣିତ କରିବା ପାଇଁ ନିଜ ଲକ୍ଷ୍ୟ ଏବେ ମଧ୍ୟ ବଜାୟ ରଖିଛନ୍ତି। ମୋଦି ସରକାର ସଂଯୁକ୍ତ ପ୍ରଗତିଶୀଳ ମେଣ୍ଟ (ଉପା) ସରକାରଙ୍କଠାରୁ ପ୍ରାୟ ୩ ଗୁଣା ଅଧିକ ଅର୍ଥ କୃଷକଙ୍କ ବ୍ୟାଙ୍କ ଖାତାକୁ ପଠାଇଛନ୍ତି। ସବୁ କ୍ଷେତ୍ରରେ କୃଷକଙ୍କୁ ସାହାଯ୍ୟ କରାଯାଇଛି। ଡାଲି, ଗହମ ସମେତ ଅନ୍ୟ ଫସଲଗୁଡ଼ିକର ଏମ୍‌ଏସ୍‌ପି ବୃଦ୍ଧି କରାଯାଇଛି।

ମୋଦିଙ୍କୁ ଫୋନ୍‌ ନମ୍ବର ମାଗିଲେ ଚାଷୀ ନେତା
ଦିଲ୍ଲୀ-ଉତ୍ତର ପ୍ରଦେଶ ସୀମାରେ ଆନ୍ଦୋଳନରତ କୃଷକ ନେତା ରାକେଶ ଟିକାଏତ୍‌ କେନ୍ଦ୍ରର ବଜେଟ ଉପସ୍ଥାପନ ପରେ ଚାଷୀଙ୍କୁ ସମ୍ବୋଧିତ କରି କହିଛନ୍ତି। ବିକେୟୁ ମୁଖପାତ୍ର ଟିକାଏତ୍‌ କହିଛନ୍ତି, କୃଷି ଆଇନ ପ୍ରତ୍ୟାହାର ନ କରିବା ଯାଏ ଘରକୁ ଯିବା ନାହିଁ। ଏବେ କୃଷକମାନଙ୍କ ଯେପରି ସେନା ପ୍ରସ୍ତୁତ ହୋଇ ରହିଛି ତାକୁ ଭାଙ୍ଗିବାକୁ ଦିଆଯିବ ନାହିଁ। କୃଷକଙ୍କୁ ବଦନାମ କରିବାକୁ ଉଦ୍ୟମ ଚାଲିଛି। ଏହାକୁ ନେଇ କେହି ଚିନ୍ତିତ ହେବା ଦରକାର ନାହିଁ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ନିଜ ଫୋନ୍‌ ନମ୍ବର ଦିଅନ୍ତୁ, ଆଲୋଚନା ପାଇଁ ଆମେ ଅପେକ୍ଷା କରିଛୁ। ପ୍ରକାଶ ଯେ, ଶନିବାର ସର୍ବଦଳୀୟ ବୈଠକରେ ପ୍ରଧାନମନ୍ତ୍ରୀ କୃଷକ ଆନ୍ଦୋଳନ ଉପରେ ନିଜ ମତ ରଖିଥିଲେ। କହିଥିଲେ, ସରକାର ଆଲୋଚନା ପାଇଁ ପ୍ରସ୍ତୁତ। ଯଦି କୃଷକ ସଙ୍ଗଠନ ଆଗକୁ ମଧ୍ୟ ଚର୍ଚ୍ଚା କରିବାକୁ ଚାହୁଁଛନ୍ତି, ତେବେ ମୁଁ କେବଳ ଗୋଟିଏ ଫୋନ୍‌ କଲ୍‌ ଦୂରତାରେ ରହିଛି।

ସୀତାରାମନଙ୍କ ସଫେଇ
ଅର୍ଥମନ୍ତ୍ରୀ ନିର୍ମଳା ସୀତାରାମନ କହିଛନ୍ତି, କରୋନା ମହାମାରୀ ଯୋଗୁ ଏହି ବଜେଟରେ ସ୍ବାସ୍ଥ୍ୟ କ୍ଷେତ୍ରକୁ ପ୍ରାଧାନ୍ୟ ଦିଆଯାଇଛି। ଏହାର ମାନେ ଏହା ନୁହେଁ ଯେ, ବଜେଟରେ କୃଷିକୁ ଅଣଦେଖା କରାଯାଇଛି। କୃଷକଙ୍କୁ ଅଧିକ ଲାଭ ଦେବା ପାଇଁ ନାବାର୍ଡ ଲାଗି ଆବଣ୍ଟନ ବଢ଼ାଯାଇଛି। ସୀମାରେ କୃଷକମାନେ କାହିଁକି ବସିଛନ୍ତି ତାହା ଆମେ ବୁଝିପାରୁଛୁ। କୌଣସି ଚାଷୀଙ୍କ କିଛି ପ୍ରଶ୍ନ ଥିଲେ, କୃଷିମନ୍ତ୍ରୀ ନରେନ୍ଦ୍ର ସିଂ ତୋମାର ଆଲୋଚନାର ସୁଯୋଗ ଦେବାକୁ କେବେ ମନାକରି ନାହାନ୍ତି। ଯାହା ବି ଆପତ୍ତି ଅଛି ତା’ ଉପରେ କୃଷି ଆଇନର କେତେକ ଧାରାରେ ସଂଶୋଧନ ପାଇଁ ସରକାର ପ୍ରସ୍ତୁତ ଥିବା ତେମାର କହିସାରିଛନ୍ତି। ତେଣୁ ଆଲୋଚନା ଜରିଆରେ ହିଁ ସମାଧାନ ସମ୍ଭବ ବୋଲି ସୀତାରାମନ ସଫେଇ ଦେଇଛନ୍ତି।

ଦର ବଢ଼ାଇବ କୃଷି ସେସ୍‌
କୃଷି ଭିତ୍ତିଭୂମି ଓ ବିକାଶ ସେସ୍‌ (ଏଆଇଡିସି) ବୃଦ୍ଧି କରି ଲିଟର ପ୍ରତି ପେଟ୍ରୋଲ ଉପରେ ୨.୫ ଟଙ୍କା ଓ ଡିଜେଲ ଉପରେ ୪ ଟଙ୍କା ରଖାଯାଇଛି। ଏହା ବ୍ୟତୀତ ଏଗ୍ରିକଲ୍‌ଚର ସେସ୍‌ କାବୁଲି ଚଣା ଉପରେ ୩୦%, ମଟର ଉପରେ ୫୦%, ମସୁରୀ ଡାଲି ଉପରେ ୫% ଓ ତୁଳା ଉପରେ ୫% ବୃଦ୍ଧି କରାଯାଇଛି। ତେବେ ସରକାର ଏହା ଉପରେ ଲାଗୁଥିବା ସୀମା ଶୁଳ୍କକୁ ହ୍ରାସ କରିଛନ୍ତି। ଉପଭୋକ୍ତାଙ୍କ ଉପରେ ଏହାର ମୂଲ୍ୟରେ ପ୍ରତ୍ୟକ୍ଷ ପ୍ରଭାବ ପଡ଼ିବ ନାହିଁ ବୋଲି କହିଛନ୍ତି। ତୈଳ ଦର ଉପରେ ସରକାରଙ୍କ ନିୟନ୍ତ୍ରଣ ନ ଥିବାରୁ ଆଗକୁ ପେଟ୍ରୋଲ ଓ ଡିଜେଲ ମୂଲ୍ୟ ବୃଦ୍ଧି ହେବା ନିଶ୍ଚିତ। ତେଲ ଦର ବୃଦ୍ଧି ଘଟିଲେ ଅନ୍ୟ ଅତ୍ୟାବଶ୍ୟକ ସାମଗ୍ରୀର ପରିବହନ ଖର୍ଚ୍ଚ ବଢ଼ିବ। ତେଣୁ ସବୁ ସାମଗ୍ରୀର ଦର ବୃଦ୍ଧି ଆଶଙ୍କା କରାଯାଉଛି।

କ’ଣ ପାଇଲେ କୃଷକ
ଦିଲ୍ଲୀ ସୀମାରେ ୨ ମାସରୁ ଊର୍ଦ୍ଧ୍ୱ ସମୟ ଧରି ଆନ୍ଦୋଳନ ଜାରି ରଖିଥିବା ଲକ୍ଷାଧିକ କ୍ଷୁବ୍ଧ କୃଷକ ମୋଦି ସରକାରଙ୍କ ନୀତିଗୁଡ଼ିକୁ ଚାଷୀ ବିରୋଧୀ ବୋଲି କହିଛନ୍ତି। ଏଭଳି ସମୟରେ ଅର୍ଥମନ୍ତ୍ରୀ ନିର୍ମଳା ସୀତାରାମନ୍‌ ବଜେଟ ଉପସ୍ଥାପନ କରି ଏହାକୁ କୃଷକଙ୍କ ପ୍ରତି ଉତ୍ସର୍ଗୀକୃତ ବୋଲି କହିଛନ୍ତି। ବର୍ଷ ୨୦୨୧-୨୨ର
କେନ୍ଦ୍ରୀୟ ବଜେଟରେ ସରକାର କୃଷି ସେକ୍ଟର ପାଇଁ
କେତେକ ଘୋଷଣା କରିଛନ୍ତି।

୧. ସାରା ଦେଶରେ ସ୍ବାମିତ୍ୱ ଯୋଜନା

ନିକଟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସ୍ବାମିତ୍ୱ ଯୋଜନା ଆରମ୍ଭ କରିଥିଲେ। ଗ୍ରାମାଞ୍ଚଳରେ ସମ୍ପତ୍ତି ମାଲିକାନାରେ ସ୍ବଚ୍ଛତା ଆଣିବା ହେଉଛି ଏହି ଯୋଜନାରେ ଉଦ୍ଦେଶ୍ୟ। ଉକ୍ତ ଯୋଜନା ଅନୁସାରେ ବର୍ତ୍ତମାନ ସୁଦ୍ଧା ୧,୨୪୧ ଗ୍ରାମର ୧.୮୦ ଲକ୍ଷ ସମ୍ପତ୍ତି ମାଲିକଙ୍କୁ ସ୍ବତ୍ୱ ପ୍ରଦାନ କରାଯାଇଛି। ସ୍ବାମିତ୍ୱ ଯୋଜନାକୁ ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ ଲାଗୁ କରାଯିବ।

୨. ୧୬.୫ ଲକ୍ଷ କୋଟି ଋଣ
ବଜେଟ ଅଭିଭାଷଣରେ ଅର୍ଥମନ୍ତ୍ରୀ କୃଷି କ୍ଷେତ୍ର ପାଇଁ ଏଗ୍ରିକଲ୍‌ଚର କ୍ରେଡିଟ୍‌ ଟାର୍ଗେଟ (କୃଷି ଋଣ ଲକ୍ଷ୍ୟ) ବୃଦ୍ଧି ନେଇ ସୂଚନା ଦେଇଛନ୍ତି। ସୀତାରାମନ କହିଛନ୍ତି, ସରକାର କୃଷକଙ୍କ ଉନ୍ନତି ପାଇଁ କାର୍ଯ୍ୟ କରିବାକୁ ପ୍ରତିଶ୍ରୁତିବଦ୍ଧ। ପ୍ରାଣୀ ସମ୍ପଦ, ମାଛଚାଷ ଓ ଦୁଗ୍ଧଜାତ ସମଗ୍ରୀ ଉତ୍ପାଦନ ବୃଦ୍ଧି ପାଇଁ ୨୦୨୨ରେ କୃଷକଙ୍କୁ ଅଧିକ କୃଷି ଋଣ ପ୍ରଦାନ କରିବାକୁ ଲକ୍ଷ୍ୟ ରଖାଯାଇଛି। ଏହି ଲକ୍ଷ୍ୟ ୧୬.୫ ଲକ୍ଷ କୋଟି ଟଙ୍କାର। ଗତବର୍ଷ ଏହା ୧୫ ଲକ୍ଷ କୋଟି ଟଙ୍କା ଥିଲା।

୩. ଗ୍ରାମାଞ୍ଚଳ ଭିତ୍ତିଭୂମି ପାଇଁ ୩୩% ଅନୁଦାନ ବୃଦ୍ଧି
ଗ୍ରାମାଞ୍ଚଳ ଭିତ୍ତିଭୂମି ବିକାଶ ପାଣ୍ଠିକୁ ୩୦,୦୦୦ କୋଟିରୁ ୪୦,୦୦୦ କୋଟି ଟଙ୍କାକୁ ବୃଦ୍ଧି କରାଯାଇଛି। ଏହା ପୂର୍ବ ଆର୍ଥିକ ବର୍ଷ ତୁଳନାରେ ୩୩% ଅଧିକ ବୋଲି ଅର୍ଥମନ୍ତ୍ରୀ କହିଛନ୍ତି।

୪. କ୍ଷୁଦ୍ର ଜଳସେଚନ ପାଣ୍ଠି ଦୁଇଗୁଣା
ନାବାର୍ଡ ଅଧୀନରେ ୫,୦୦୦ କୋଟି ଟଙ୍କାରେ ଆରମ୍ଭ କରାଯାଇଥିବା କ୍ଷୁଦ୍ର ଜଳସେଚନ ପାଣ୍ଠିକୁ ଅତିରିକ୍ତ ୫,୦୦୦ କୋଟି ଟଙ୍କା ଆବଣ୍ଟନ କରାଯାଇଛି।

୫. ଅପରେଶନ ଗ୍ରୀନ୍‌ ସ୍କିମ୍‌
କୃଷି କ୍ଷେତ୍ରରେ ଉନ୍ନତି ଆଣିବା ଓ ଆନୁଷଙ୍ଗିକ ଉତ୍ପାଦଗୁଡ଼ିକର ରପ୍ତାନି ପାଇଁ ଏହି ଯୋଜନାରେ ଅଧିକ ୨୨ଟି ପଚନଶୀଳ ସାମଗ୍ରୀକୁ ସାମିଲ କରାଯିବ। ବର୍ତ୍ତମାନ ପର୍ଯ୍ୟନ୍ତ ଅପରେଶନ ଗ୍ରୀନ୍‌ ସ୍କିମ୍‌ କେବଳ ଟମାଟୋ, ପିଆଜ ଓ ଆଳୁ (ପିଓଟିଓଏସ୍‌) ପାଇଁ ପ୍ରଯୁୁଜ୍ୟ ଥିଲା।

୬. ୧,୦୦୦ ମଣ୍ଡିକୁ ଇ-ନାମ୍‌ ସହ ଯୋଡ଼ାଯିବ
ଇ-ନାମ୍‌ରେ ପ୍ରାୟ ୧.୬୮ କୋଟି ଚାଷୀ ପଞ୍ଜୀକୃତ ହୋଇଛନ୍ତି। ଏହା ଜରିଆରେ ୧.୧୪ ଲକ୍ଷ କୋଟି ଟଙ୍କା ବାଣିଜ୍ୟ ମୂଲ୍ୟର କାରବାର ହୋଇଛି। କୃଷି ବଜାରରେ ସ୍ବଚ୍ଛତା ଓ ପ୍ରତିଦ୍ୱନ୍ଦ୍ୱିତା ଆଣିବା ପାଇଁ ଇ-ନାମ୍‌ ନିର୍ଣ୍ଣାୟକ ହୋଇଛି। ଆଗକୁ ଅଧିକ ୧,୦୦୦ ମଣ୍ଡିକୁ ଏହି ବ୍ୟବସ୍ଥାରେ ଯୋଡ଼ାଯିବ।

୭. ଏପିଏମ୍‌ସିକୁ ପ୍ରୋତ୍ସାହନ
କୃଷି ଉତ୍ପାଦ ବଜାର କମିଟି (ଏପିଏମ୍‌ସି)କୁ ପ୍ରୋତ୍ସାହନ ଦେବା ପାଇଁ ଏହାକୁ କୃଷି ଭିତ୍ତିଭୂମି ପାଣ୍ଠିରୁ ସହାୟତା ଦିଆଯିବ। ମଣ୍ଡିଗୁଡ଼ିକୁ ଅତିରିକ୍ତ ୫,୦୦୦ କୋଟି ଟଙ୍କାର କୃଷି ଭିତ୍ତିଭୂମି ପାଣ୍ଠି ଆବଣ୍ଟନ କରାଯାଇଥିବା ଅର୍ଥମନ୍ତ୍ରୀ ସୂଚନା ଦେଇଛନ୍ତି।

୮. ବିକଶିତ ହେବ ୫ ଫିଶିଂ ହାର୍ବର
କୋଚି, ଚେନ୍ନାଇ, ବିଶାଖାପାଟଣା ପାରାଦୀପ ଓ ପେଟୁଆଘାଟରେ ଥିବା ୫ ଫିଶିଂ ହାର୍ବରକୁ ଆର୍ଥିକ ଗତିବିଧିର ହବ୍‌ ରୂପେ ପ୍ରସ୍ତୁତ କରାଯିବ। ସେହିପରି ତାମିଲନାଡ଼ୁରେ ଫିଶିଂ ଲୋଡିଂ ସେଣ୍ଟର ବିକଶିତ କରାଯିବ।


Enter your email to get our daily news in your inbox.

All Right Reserved By Dharitri.Com

ଦିନେ କମିଲେ ପୁଣି ବଢୁଛି…

ନୂଆଦିଲ୍ଲୀ, ୧୧।୮ : ଦେଶରେ କରୋନା ମହାମାରୀ ସଂକ୍ରମଣ ନେଇ ପୁଣି ଆତଙ୍କ ସୃଷ୍ଟି ହୋଇଛି। ଦୈନିକ ସଂକ୍ରମଣ ଏବଂ ମୃତ୍ୟୁ ସଂଖ୍ୟା ଦିନେ କମିଲେ...

କରୋନା କଟକଣା ମଧ୍ୟରେ ମୋଦି ସମ୍ଭାଳିବେ ଭାଜପାର ପ୍ରଚାର ଦାୟିତ୍ୱ

ନୂଆଦିଲ୍ଲୀ,୩୧ ।୧: କରୋନା ମହାମାରୀ ଯୋଗୁ ନିର୍ବାଚନ ପ୍ରଚାରରେ ରୋକ ଲଗାଯାଇଛି । ଏହାକୁ ଦୃଷ୍ଟିରେ ରଖି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସୋମବାର ପଶ୍ଚିମ ଉତ୍ତର...

ସେଲ୍‌ଫି ନେବାବେଳେ ପ୍ରଶଂସକଙ୍କ ଫୋନ୍‌ ଛଡ଼ାଇନେଲେ ଏହି ସୁପରଷ୍ଟାର: କାରଣ ଜାଣିଲେ…

ନୂଆଦିଲ୍ଲୀ,୭।୪: ତାମିଲନାଡୁ ବିଧାନସଭା ନିର୍ବାଚନରେ ସୁପରଷ୍ଟାରମାନେ ସେମାନଙ୍କ ମତଦାନ ସାବ୍ୟସ୍ତ କରିଛନ୍ତି। ମଙ୍ଗଳବାର ସାଉଥ୍‌ ସୁପରଷ୍ଟାର ରଜନୀକାନ୍ତ, ବିଜୟ, ଅଜିତ କୁମାର, କମଲ ହାସନ, ଶ୍ରୁତି...

କରୋନା ବିରୋଧରେ ମୋଦିଙ୍କ ଜନ ଆନ୍ଦୋଳନ: ଲଢ଼େଇ ପାଇଁ ହେବା ଏକଜୁଟ

ନୂଆଦିଲ୍ଲୀ, ୮।୧୦: କରୋନା ବିରୋଧରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗୁୁରୁବାର ଜନ ଆନ୍ଦୋଳନ ଆରମ୍ଭ କରିଛନ୍ତି। ମୋଦି ଟୁଇଟ୍‌ କରି ଦେଶବାସୀଙ୍କ ଉଦ୍ଦେଶ୍ୟରେ କହିଛନ୍ତି ଯେ,...

ପୁଲ୍‌ଓ୍ବାମା ଆକ୍ରମଣ: ଜଣେ ଗିରଫ

ପୁଲ୍‌ଓ୍ବାମା,୨୯ା୨(ପି.ଟି.):ପୁଲ୍‌ଓ୍ବାମା ଆତଙ୍କବାଦୀ ଆକ୍ରମଣ ଘଟଣାରେ ଜାତୀୟ ତଦନ୍ତକାରୀ ସଂସ୍ଥା (ଏନ୍‌ଆଇଏ)କୁ ଶୁକ୍ରବାର ପ୍ରଥମ ବଡ଼ ସଫଳତା ମିଳିଛି। ଗତବର୍ଷ ଫେବୃୟାରୀ ୧୪ରେ ହୋଇଥିବା ଏହି ଆତ୍ମଘାତୀ...

ଶିବଙ୍କ ଆଗରେ କମଲ ନଇଁବା ନିଶ୍ଚିତ: ସଙ୍କଟ ମୁକ୍ତ ଭାଜପା ସରକାର

ଭୋପାଳ,୧୦।୧୧: ମଧ୍ୟପ୍ରଦେଶ ଉପ ନିର୍ବାଚନରେ ମୁଖ୍ୟମନ୍ତ୍ରୀ ଶିବରାଜ ସିଂ ଚୌହ୍ବାନଙ୍କ ସମ୍ମୁଖରେ କଂଗ୍ରେସର କମଲନାଥଙ୍କୁ ନିଶ୍ଚିତ ନଇଁବାକୁ ପଡ଼ିବ ବୋଲି ପ୍ରାଥମିକ ଫଳାଫଳରୁ ଜଣାପଡୁଛି। ରାଜ୍ୟରେ...

ପ୍ରଧାନମନ୍ତ୍ରୀଙ୍କ ରାଲିରେ ବିସ୍ଫୋରଣ ମାମଲାରେ ୯ ଅଭିଯୁକ୍ତ ଦୋଷୀ…

ନୂଆଦିଲ୍ଲୀ,୨୭।୧୦: ବିହାର ପଟନାର ଗାନ୍ଧୀ ମଇଦାନରେ ୮ ବର୍ଷ ତଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନିର୍ବାଚନ ରାଲିରେ ହୋଇଥିବା ବୋମା ବିସ୍ଫୋରଣ ଘଟଣାରେ ୯ ଅଭିଯୁକ୍ତ...

ଉତ୍ତରାଖଣ୍ଡ ବିଧାନସଭା ନିର୍ବାଚନ: ୫୯ ପ୍ରାର୍ଥୀଙ୍କ ନାମ ଘୋଷଣା କଲା ଭାଜପା, ଖଟିମାରୁ ନିର୍ବାଚନ ଲଢିବେ ମୁଖ୍ୟମନ୍ତ୍ରୀ

ଡେରାଡୁନ,୨୦ ।୧: ଉତ୍ତରାଖଣ୍ଡ ବିଧାନସଭା ନିର୍ବାଚନ ଲାଗି ଗୁରୁବାର ଭାରତୀୟ ଜନତା ପାର୍ଟି(ଭଜପା) ୫୯ଜଣ ପ୍ରାର୍ଥୀଙ୍କ ନାମ ଘୋଷଣା କରିଛି । ଉତ୍ତରାଖଣ୍ଡର ମୁଖ୍ୟମନ୍ତ୍ରୀ ପୁଷ୍କର...

Advertisement
Archives

Model This Week