ଚେନ୍ନାଇ: ତାମିଲନାଡୁର କୁଡାଲୋର ଜିଲାରେ ଷ୍ଟେଟ୍ ବ୍ୟାଙ୍କ୍ ଅଫ୍ ଇଣ୍ଡିଆର ଏକ ନକଲି ଶାଖାକୁ ପୋଲିସ ସିଲ୍ କରିଛି। ଏହି ମାମଲାରେ ପୋଲିସ ୩ ଜଣଙ୍କୁ ଗିରଫ କରିଛି। ଏହି ଘଟଣାର ମାଷ୍ଟରମାଇଣ୍ଡ୍ ହେଉଛନ୍ତି ପୂର୍ବତନ ଏସ୍ବିଆଇର ଜଣେ କର୍ମଚାରୀଙ୍କ ପୁଅ। ପୋଲିସ ଏହି ଘଟଣାର ଅଧିକ ତଦନ୍ତ ଜାରି ରଖିଛି।
କମଲ ବାବୁ ନାମକ ଜଣେ ୧୯ ବର୍ଷର ଯୁବକ କୁଡାଲୋର ଜିଲାର ପାନ୍ରୁତିରେ ଏସ୍ବିଆଇର ଏକ ନକଲି ଶାଖା ଖୋଲିଥିବା ଅଭିଯୋଗ ହୋଇଥିଲା। ପୋଲିସ କହିଛି ଯେ, କମଲଙ୍କ ମା’-ବାପା ଏସ୍ବିଆଇର କର୍ମଚାରୀ। ୧୦ ବର୍ଷ ପୂର୍ବେ ତାଙ୍କ ବାପାଙ୍କର ମୃତ୍ୟୁ ହୋଇଥିବା ବେଳେ ମା’ ୨ ବର୍ଷ ତଳୁ ଏସ୍ବିଆଇରୁ ଅବସର ନେଇଥିଲେ। କମଲ କୌଣସି କାମ କରୁ ନ ଥିଲେ। ସେ ତାଙ୍କ ବାପାଙ୍କ ସ୍ଥାନରେ ଚାକିରି ପାଇଁ ବ୍ୟାଙ୍କରେ ଏକ ଫର୍ମ ପକାଇଥିଲେ। କିନ୍ତୁ ସେ ଚାକିରି ପାଇଲେ ନାହିଁ। ଏଭଳି ପରିସ୍ଥିତିରେ ସେ ନିଜେ ଏକ ବ୍ୟାଙ୍କ ଖୋଲିବାକୁ ନିଷ୍ପତ୍ତି ନେଲେ। ସେ ପିଲାଦିନରୁ ମା’ ବାପାଙ୍କ ସହିତ ବ୍ୟାଙ୍କକୁ ଯାଉଥିଲେ। ତେଣୁ ବ୍ୟାଙ୍କ ବିଷୟରେ ତାଙ୍କର ଅନେକ ଜ୍ଞାନ ଥିଲା। ଜଣେ ଗ୍ରାହକ ଏ ସମ୍ପର୍କରେ ପୋଲିସକୁ ସୂଚନା ଦେବାରୁ ଘଟଣାର ପର୍ଦ୍ଦାଫାସ ହୋଇଥିଲା।
ପୋଲିସ ସୂଚନାନୁସାରେ, କମଲ ୩ମାସ ପୂର୍ବରୁ ପାନରୁତି ବଜାର ନାମରେ ଏସ୍ବିଆଇର ଏକ ଶାଖା ଖୋଲିଥିଲେ। ଯେତେବେଳେ ଏସ୍ବିଆଇର ଜଣେ ଗ୍ରାହକ ନୂଆ ଶାଖା ଦେଖିଲେ, ସେ ପୁରୁଣା ଶାଖାରେ ଏ ବିଷୟରେ କହିଥିଲେ। ସେହି ବ୍ୟାଙ୍କର ଶାଖା ପରିଚାଳକ ତାଙ୍କ ଜୋନାଲ ହେଡ୍ଙ୍କ ସହିତ ଏକ ନୂତନ ଶାଖା ଖୋଲିବା ବିଷୟରେ କଥା ହୋଇଥିଲେ। ଜୋନାଲ ହେଡ୍ କହିଛନ୍ତି, ପାନ୍ରୁତିରେ ଏସ୍ବିଆଇର କ କୌଣସି ନୂତନ ଶାଖା ଖୋଲିନାହିଁ।
ମ୍ୟାନେଜରଙ୍କ ଅଭିଯୋଗ ପରେ ଏସ୍ବିଆଇ ଅଧିକାରୀମାନେ ନୂତନ ଶାଖା କାର୍ଯ୍ୟାଳୟକୁ ଯାଇଥିଲେ। ସେଠାରେ ଅଫିସ ଦେଖି ଆଶ୍ଚର୍ଯ୍ୟ ହୋଇଯାଇଥିଲେ। କାରଣ ସେଠାରେ ଥିବା ସମସ୍ତ ଜିନିଷ ମୂଳ ବ୍ୟାଙ୍କ ସହିତ ସମାନ ଥିଲା। ଏସବୁ ଦେଖି ପୋଲିସରେ ଅଭିଯୋଗ ହୋଇଥିଲା।
ପୋଲିସ ଏଥିରେ ସଂପୃକ୍ତ କମଲ ବାବୁ, ତାଙ୍କ ସହଯୋଗୀ ୫୩ ବର୍ଷୀୟ ମଣିକାମ ଏବଂ ୪୨ ବର୍ଷୀୟ କୁମାରଙ୍କୁ ଗିରଫ କରିଥିଲା। ଅନୁସନ୍ଧାନ ବେଳେ କମଲ ଏକ ବ୍ୟାଙ୍କ ଖୋଲିବାକୁ ଯୋଜନା କରିଥିଲେ। ମଣିକାମ ବ୍ୟାଙ୍କ ଷ୍ଟାମ୍ପ୍ ଇତ୍ୟାଦି ପ୍ରସ୍ତୁତ କରିଥିବାବେଳେ କୁମାର ବ୍ୟାଙ୍କର ଅନ୍ୟାନ୍ୟ ସାମଗ୍ରୀ, ପାସ୍ବୁକ, ଚାଲାଣ ଆଦି ପ୍ରସ୍ତୁତ କରିଥିଲେ। ନକଲି ଶାଖା ପାଇଁ କମଲ କମ୍ପ୍ୟୁଟର, ଲକର ଏବଂ ଅନ୍ୟାନ୍ୟ ସେଟ୍ଅପ କିଣିଥିଲେ। ଆହୁରି ମଧ୍ୟ ପାନ୍ତୁର ବଜାର ଶାଖା ନାମକ ଏକ ଓ୍ବେବ୍ସାଇଟ୍ ମଧ୍ୟ ତିଆରି କରାଯାଇଥିଲା ।
ପୋଲିସର ତଦନ୍ତରେ ଏପର୍ଯ୍ୟନ୍ତ ଜଣାପଡ଼ିଛି ଯେ, ଏହି ନକଲି ଶାଖାରୁ ଟଙ୍କା କାରବାର ହୋଇନାହିଁ। ଏହି ପରିସ୍ଥିତିରେ କେହି ଟଙ୍କା ହରାଇ ନାହାନ୍ତି। ପଚରାଉଚରା ବେଳେ କମଲ ପୋଲିସକୁ କହିଛନ୍ତି ଯେ, ତାଙ୍କର ଉଦ୍ଦେଶ୍ୟ ଲୋକଙ୍କୁ ଠକିବା ନୁହେଁ। ସେ ନିଜର ବ୍ୟାଙ୍କ ଖୋଲିବାକୁ ଚାହୁଁଥିଲେ। ତେଣୁ ସେ ଏପରି ପଦକ୍ଷେପ ନେଇଥିଲେ।
