ବେଜିଂ, ୭।୫ : ଚାଇନାରେ ଶୂନ-କୋଭିଡ ନୀତି ଜାରି ଯୋଗୁ ଲୋକେ ଆତଙ୍କିତ ହେବାରେ ଲାଗିଛନ୍ତି। ସାଂଘାଇ ଏବଂ ଦେଶର ଅନ୍ୟାନ୍ୟ ଅଞ୍ଚଳରେ ସାଧାରଣ ନାଗରିକଙ୍କ ଏହା ପାଳନ କରିବାକୁ ରାଷ୍ଟ୍ରପତି ଶି ଜିନପିଙ୍ଗ କଡା ଚେତାବନୀ ଦେଇଛନ୍ତି। ଜିନପିଙ୍ଗ କହିଛନ୍ତି ଯେ ଚାଇନାକୁ ଯେପରି କେହି ବଦନାମ୍ ନ କରନ୍ତି। ଯେଉଁମାନେ ଦେଶର ଏହି ନୀତି ଉପରେ ପ୍ରଶ୍ନ କରୁଛନ୍ତି ସେମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ସିଏନଏନ ରିପୋର୍ଟ ଅନୁଯାୟୀ, କରୋନା ମହାମାରୀ ସଂକ୍ରମଣ ଯୋଗୁ ସାଂଘାଇର ବହୁ ଲୋକ ଖାଦ୍ୟ ଏବଂ ଚିକିତ୍ସା ସୁବିଧା ଅଭାବରୁ ଗତ ପାଞ୍ଚ ସପ୍ତାହ ଧରି ସୋସିଆଲ ମିଡିଆ ମାଧ୍ୟମରେ ନିଜର କ୍ରୋଧ ପ୍ରକାଶ କରୂଛନ୍ତି। ସାଂଘାଇରେ ଶୂନ-କୋଭିଡ ନୀତି ମାନବିକ ଅଧିକାରର ଉଲ୍ଲଂଘନ ବୋଲି ଏକ ଭାଇରାଲ ଭିଡିଓରେ ପ୍ରକାଶ ପାଇଛି। ଏନେଇ ଜିନ୍ ପିଙ୍ଗ୍ କ୍ରୋଧ ପ୍ରକାଶ କରିଛନ୍ତି।
ରାଷ୍ଟ୍ରପତି ଜିନପିଙ୍ଗଙ୍କ ଅଧ୍ୟକ୍ଷତାରେ ଶାସକ କମ୍ୟୁନିଷ୍ଟ ପାର୍ଟିର ସର୍ବୋଚ୍ଚ ସଂସ୍ଥା ପଲିଟବୁରୋର ଷ୍ଟାଣ୍ଡିଂ କମିଟିର ଏକ ବୈଠକରେ ଦେଶର ଶୂନ-କୋଭିଡ ନୀତିକୁ ଦୃଢ଼ଭାବରେ ପାଳନ କରିବାକୁ ନିଷ୍ପତ୍ତି ହୋଇଛି। ଏହି ନୀତିକୁ ଯେ କୌଣସି ପ୍ରକାରେ ଭ୍ରାନ୍ତ ଧାରଣା ପ୍ରକାଶ ପରିବା, ସନ୍ଦେହ କିମ୍ବା ବଦନାମ କରିବା ବିରୋଧରେ କମିଟି କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ନିଷ୍ପତ୍ତି ନେଇଛି।
ରାଜ୍ୟ ଗଣମାଧ୍ୟମ ଅନୁଯାୟୀ, ଜିନପିଙ୍ଗ ଏହି ସଭାରେ ପ୍ରଥମ ଥର ପାଇଁ ଏକ ଗୁରୁତ୍ୱପୂର୍ଣ୍ଣ ବିବୃତ୍ତି ଦେଇଛନ୍ତି।
ସରକାରୀ ନ୍ୟୁଜ ଏଜେନ୍ସି ଶିଂହୁଆ ଅନୁଯାୟୀ, ସାତଜଣିଆ କମିଟି କହିଛି ଯେ କରୋନାକୁ ନିୟନ୍ତ୍ରଣ କରିବା ପାଇଁ ଏଭଳି ନିଷ୍ପତ୍ତି ନିଆଯାଇଛି। କମିଟି ଏହା ମଧ୍ୟ କହିଛି ଯେ ଉହାନରେ କରୋନା ଯୁଦ୍ଧରେ ଆମେ ଜିତିଛୁ ଏବଂ ସାଂଘାଇରେ ମଧ୍ୟ ଜିତିବୁ। ସାଂଘାଇରେ କଡ଼ା ଲକଡାଉନ ଯୋଗୁୁ ଲୋକଙ୍କ ଅସନ୍ତୋଷ ବଢ଼ିିବାରେ ଲାଗିଛି ।
