ମୁମ୍ବାଇ,୧୯।୮ : ଶିବସେନା ଉଦ୍ଧବ ବାଲାସାହେବ ଠାକରେ ପକ୍ଷରୁ ଅଭିଯୋଗ କରିଛି ଉପମୁଖ୍ୟମନ୍ତ୍ରୀ ହେବା ପରେ ଦେବେନ୍ଦ୍ର ଫଡନାଭିସ ଅହଂକାରୀ ଏବଂ ଅସହିଷ୍ଣୁ ହୋଇପଡିଛନ୍ତି। ପୂର୍ବରୁ ଫଡନାଭିସ ଜଣେ ସହନଶୀଳ ବ୍ୟକ୍ତି ଥିଲେ କିନ୍ତୁ ଉପମୁଖ୍ୟମନ୍ତ୍ରୀ ହେବା ପରେ ତାଙ୍କଠାରେ ଏଭଳି ପରିବର୍ତ୍ତନ ଦେଖାଦେଇଛି ବୋଲି ଶିବସେନା ମୁଖପତ୍ର ସାମନାରେ ଏକ ଲେଖା ପ୍ରକାଶ ପାଇଛି। ଅପରପକ୍ଷରେ, ଶିବସେନାଙ୍କ ଦାବିକୁ ନେଇ ଭାଜପା ଦୃଢ଼ ପ୍ରତିକ୍ରିୟା ପ୍ରକାଶ କରିଛି ଏବଂ ବିରୋଧୀଙ୍କୁ ସମାଲୋଚନା କରିବାବେଳେ ମର୍ଯ୍ୟାଦା ବଜାୟ ରଖିବା ଉଚିତ ବୋଲି କହିଛି। ଏହି ପ୍ରସଙ୍ଗରେ ଅଭିଯୋଗ ପଞ୍ଜିକରଣ ବିଷୟରେ ମଧ୍ୟ ଭାଜପା ସୂଚନା ପ୍ରଦାନ କରିଛି।
ସାମନାରେ ଲେଖାଯାଇଛି ଯଦି ଦେବେନ୍ଦ୍ର ଫଡନାଭିସ ଶିବସେନା ସହିତ ପ୍ରତାରଣା କରି ନ ଥାନ୍ତେ, ତେବେ ସେ କ୍ଷମତାକୁ ଫେରିଥାନ୍ତେ। ତେବେ ତାଙ୍କ ଦଳର ସର୍ବୋଚ୍ଚ ନେତୃତ୍ୱ ତାଙ୍କୁ ଅଲଗା କରି ତାଙ୍କୁ ଉପମୁଖ୍ୟମନ୍ତ୍ରୀ କରାଇଛନ୍ତି । ତାଙ୍କୁ ଅଜିତ ପାୱାରଙ୍କ ସହ ଉପମୁଖ୍ୟମନ୍ତ୍ରୀ ପଦ ବାଣ୍ଟିବାକୁ ପଡିଛି।
ଫଡନାଭିସ ଥରେ କହିଥିଲେ ସେ ଅଜିତ ପାୱାରଙ୍କୁ ଜେଲକୁ ପଠାଇବେ ଏବଂ ତାଙ୍କୁ କଠୋର ଦଣ୍ଡ ମିଳିବ ବୋଲି ନିଶ୍ଚିତ କରିଛନ୍ତି କିନ୍ତୁ ଫଡନାଭିସ ବର୍ତ୍ତମାନ କଣ କରୁଛନ୍ତି, ସେ ଅଜିତ ପାୱାରଙ୍କ ସହ ପଦବୀ ବାଣ୍ଟୁଛନ୍ତି। ଅଜିତ ପାୱାରଙ୍କ ନାମ ନ ଲେଖି ଏହା ଲେଖାଯାଇଛି ଯାହାଙ୍କ ବିରୋଧରେ ଦୁର୍ନୀତି ଏବଂ ମହିଳାଙ୍କ ଉପରେ ନିର୍ଯାତନା ଅଭିଯୋଗ ରହିଛି, ଆଜି ସେ ଫଡନାଭିସଙ୍କର ସହଯୋଗୀ ଅଛନ୍ତି।
ସାମନା ଅଭିଯୋଗର ଜବାବ ଭାଜପା ଦେଇଛି। ଭାଜପା ରାଜ୍ୟ ସଭାପତି ଚନ୍ଦ୍ରଶେଖର ବାୱାନକୁଲେ କହିଛନ୍ତି କ୍ଷମତା ହରାଇବା ପରେ ଉଦ୍ଧବ ଠାକରେଙ୍କ ଚେତନା ଶକ୍ତି ମଧ୍ୟ ଚାଲିଯାଇଛି। ନାଗପୁରରେ ଗଣମାଧ୍ୟମ ସହ କଥାବାର୍ତ୍ତା କରି ବାୱାନକୁଲେ କହିଛନ୍ତି ଯେତେବେଳେ ବି ଉଦ୍ଧବ ଠାକରେ କାହାକୁ ସମାଲୋଚନା କରିବାକୁ ପଡେ, ସେ ସାମାନାରେ ଏକ ଲେଖା ଲେଖନ୍ତି କିମ୍ବା ସଞ୍ଜୟ ରାଉତଙ୍କୁ ଏକ ବିବୃତ୍ତି ପଠାନ୍ତି। ଠାକରେ ନିରାଶ ହୋଇଛନ୍ତି । ସେ ତାଙ୍କ ଦଳର ନିର୍ବାଚନ ଚିହ୍ନ ମଧ୍ୟ ହରାଇଛନ୍ତି ଏବଂ ସେ କ୍ଷମତାକୁ ଫେରିବାରେ ସକ୍ଷମ ନ ଥିବାରୁ ଦୁଃଖିତ ଅଛନ୍ତି। ଏନସିପି ଭାଜପା ସହ ହାତ ମିଳାଇଛି ଏବଂ ବର୍ତ୍ତମାନ ଠାକରେ ହୃଦୟଙ୍ଗମ କରିଛନ୍ତି ସେ ୨୦୧୯ ରେ ଦେବେନ୍ଦ୍ର ଫଡନାଭିସଙ୍କୁ ପଛରୁ ଛୁରୀ ଭୁସି କରି ଭୁଲ କରିଛନ୍ତି।
ସାମନାରେ ପ୍ରକାଶିତ ଭାଷା ନେଇ ଆପତ୍ତି ଜଣାଇ ବାୱାନକୁଲେ କହିଛନ୍ତି ଖବରକାଗଜରେ ରାଜନୈତିକ ବିରୋଧୀଙ୍କୁ ସମାଲୋଚନା କରିବାବେଳେ ମର୍ଯ୍ୟାଦା ଉପରେ ଧ୍ୟାନ ଦେବା ଉଚିତ। ଆମର ନେତାମାନେ ଶୀଘ୍ର ଏହା ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବେ। ଏ ସମ୍ପର୍କରେ ମୁମ୍ବାଇରେ ବିରୋଧ ମଧ୍ୟ ହୋଇପାରେ। ସାମନାରେ ଅଭିବ୍ୟକ୍ତିର ସ୍ବାଧୀନତା ନାମରେ ଯାହା ଲେଖାଯାଉଛି ତାହା ବରଦାସ୍ତ କରାଯିବ ନାହିଁ ।
