ମୁମ୍ବାଇ,୪।୧୨: ମହାରାଷ୍ଟ୍ର ନିର୍ବାଚନର ଠିକ ୧୧ଦିନ ପରେ ମହାୟୁତି ମୁଖ୍ୟମନ୍ତ୍ରୀ ଘୋଷଣା କରିଛି। ଦଳ ଦେବେନ୍ଦ୍ର ଫଡନଭିସଙ୍କୁ ମୁଖ୍ୟମନ୍ତ୍ରୀ ବାଛିଛି। ତେବେ ଆସନ୍ତାକାଲି ମୁମ୍ବାଇର ଆଜାଦ ମଇଦାନରେ ସେ ଶପଥ ଗ୍ରହଣ କରିବେ ଏବଂ ଦ୍ୱିତୀୟ ଥର ପାଇଁ ମହାରାଷ୍ଟ୍ରର ସିଏମ ହେବେ। ତାଙ୍କର ରାଜନୈତିକ ଯାତ୍ରା ବିଷୟରେ ଆପଣ ନିଶ୍ଚୟ ଜାଣିଥିବେ କିନ୍ତୁ ଆଜି ଆମେ ଆପଣଙ୍କୁ ତାଙ୍କ ଲଭଷ୍ଟୋରୀ ବିଷୟରେ କହିବାକୁ ଯାଉଛୁ । ଦେବେନ୍ଦ୍ର ଫଡନଭିସଙ୍କ ସ୍ତ୍ରୀ ହେଉଛନ୍ତି ଅମୃତା ଫଡନଭିସ। ଯିଏକି ସବୁବେଳେ ଚର୍ଚ୍ଚାରେ ରୁହନ୍ତି। କାରଣ ସେ ଜଣେ ଅଭିନେତ୍ରୀ ଅଯନ୍ତି। ରାଜନୀତିରେ ସମ୍ପୂର୍ଣ୍ଣ ଭାବେ ବୁଡି ରହିଥିବା ଫଡନଭିସଙ୍କୁ ଲାଇମ ଲାଇଟ୍ର ଅମୃତା କିପରି ଭେଟିଲେ? ଆସନ୍ତୁ ଜାଣିବା।
ଫଡନଭିସ ଓ ଅମୃତା ୨୦୦୫ରେ ବିବାହ କରିଥିଲେ। ଅମୃତା ମହାରାଷ୍ଟ୍ରର ପ୍ରସିଦ୍ଧ ଚକ୍ଷୁ ବିଶେଷଜ୍ଞ ଶରଦ ରନାଡେ ଏବଂ ସ୍ତ୍ରୀ ରୋଗ ବିଶେଷଜ୍ଞ ଚାରୁଲତା ରନାଡେଙ୍କ ଝିଅ ଅଟନ୍ତି। ଯେତେବେଳେ ଦୁହିଁଙ୍କର ସାକ୍ଷାତ ହୋଇଥିଲେ, ଅମୃତା ଜଣେ ବ୍ୟାଙ୍କର ଥିଲେ। ଉଭୟଙ୍କ ଆରେଞ୍ଜ ମ୍ୟାରେଜ ହୋଇଥିଲା। ଏଥିପାଇଁ ଦୁହିଁଙ୍କୁ ଜଣେ ସାଧାରଣ ବନ୍ଧୁଙ୍କ ଘରେ ପରିଚିତ କରାଯାଇଥିଲା। ଅମୃତା ବହୁ ବ୍ୟସ୍ତରେ ଥିଲେ। ତାଙ୍କୁ ଏଠାରେ କାମ ସାରି ଅନ୍ୟ ସ୍ଥାନକୁ ଯିବାର ଥିଲା। କିନ୍ତୁ ଯେତେବେଳେ ଦୁହେଁ କଥାବାର୍ତ୍ତା ଆରମ୍ଭ କଲେ, ଅଜାଣତରେ ଦେଢଘଣ୍ଟା ବିତି ଯାଇଥିଲା। ଦେବେନ୍ଦ୍ର ସେତେବେଳେ ବିଧାୟକ ହୋଇ ସାରିଥିଲେ ଏବଂ ଅମୃତା ରାଜନୀତିକୁ ନେଇ ନିଶ୍ଚିତ ନଥିଲେ।
ଏକ ଜାତୀୟ ଗଣମାଧ୍ୟମମୁ ସାକ୍ଷାତକାର ନେଇ ଅମୃତା କହିଥିଲେ, ମୁଁ ତାଙ୍କୁ ଭେଟିବା ପୂର୍ବରୁ ଟେନସନ ଏବଂ ଚାପରେ ଥିଲି। ମୁଁ ଭାବୁଥିଲି ଦେବେନ୍ଦ୍ର କେଉଁ ପ୍ରକାରର ବ୍ୟକ୍ତି, କାରଣ ନେତାଙ୍କ ବିଷୟରେ ମୋ ମନରେ ଏକ ନକାରାତ୍ମକ ଭାବନା ଥିଲା। କିନ୍ତୁ ତାଙ୍କୁ ଭେଟିବା ପରେ, ଏହି ଭୟ ଅଦୃଶ୍ୟ ହୋଇଗଲା କାରଣ ମୁଁ ଦେଖିଲି ସେ ଜଣେ ସରଳ ବ୍ୟକ୍ତି ଅଟନ୍ତି।
ତେବେ ଅମୃତାଙ୍କ ଅନୁଯାୟୀ ଫଡନଭିସ ରେମାଣ୍ଟିକ ନୁହନ୍ତି। ସେ ବହୁତ ପ୍ରାକ୍ଟିକାଲ ଅଟନ୍ତି। ସବୁବେଳେ ନିଜ କାମରେ ବ୍ୟସ୍ତ ରୁହନ୍ତି। ସେ କେବଳ ରାଜନୀତି ଜାଣିଛନ୍ତି। ନା ବିବାହ ପୂର୍ବରୁ ନା ପରେ ସେ କେବେ ବି ରୋମାଣ୍ଟିକ ନୁହନ୍ତି ବୋଲି ଅମୃତା କହିଛନ୍ତି। ତେବେ ଦେବେନ୍ଦ୍ର ଫଡନଭିସ ତାଙ୍କ ରାଜନୀତିରେ ବ୍ୟସ୍ତ ଥିବାବେଳେ ତାଙ୍କ ସ୍ତ୍ରୀ ଗୀତ, ଅଭିନୟ ଏବଂ ବିଭିନ୍ନ କାର୍ଯ୍ୟ ପାଇଁ ହେଡଲାଇନରେ ରହିଛନ୍ତି।
