ସୋସିଆଲ ମିଡିଆ ଦୁନିଆରେ ପ୍ରତିଦିନ ଏମିତି କିଛି ଭିଡିଓ ସାମ୍ନାକୁ ଆସେ, ଯାହା ମଣିଷକୁ ଚିନ୍ତା କରିବାକୁ ବାଧ୍ୟ କରିଦିଏ। କିଛି ଭିଡିଓ ଆଶ୍ଚର୍ଯ୍ୟଜନକ ହୋଇଥିବା ବେଳେ କିଛି ଦୃଶ୍ୟ ହୃଦୟକୁ ଛୁଇଁଯାଏ। ଏବେ ଜଙ୍ଗଲରୁ ଏଭଳି ଏକ ଚମକାଇ ଦେବା ଭଳି ଦୃଶ୍ୟ ସାମ୍ନାକୁ ଆସିଛି, ଯାହା ସୋସିଆଲ ମିଡିଆରେ ଚର୍ଚ୍ଚାର ବିଷୟ ପାଲଟିଛି। ଏହି ଭିଡିଓରେ ଏକ ବିଶାଳକାୟ ହାତୀ ଏବଂ ବୁଲ୍ଡୋଜର (JCB) ମଧ୍ୟରେ ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଛି, ଯାହାକୁ ଦେଖି ଲୋକେ ନିଜ ଆଖିକୁ ବିଶ୍ୱାସ କରିପାରୁ ନାହାନ୍ତି।
ଆଜିକାଲି ତଥାକଥିତ ବିକାଶ ନାଁରେ ବ୍ୟାପକ ଭାବେ ଗଛକଟା ଚାଲିଛି ଏବଂ ଜଙ୍ଗଲ ସଫା କରାଯାଉଛି। ପ୍ରତିବର୍ଷ ଲକ୍ଷ ଲକ୍ଷ ଗଛ କଟାଯିବା ଫଳରେ ବନ୍ୟଜନ୍ତୁମାନଙ୍କ ବାସସ୍ଥଳୀ ଉଜୁଡ଼ି ଯାଉଛି। ଘର ହରାଇବା ପରେ ଅନେକ ସମୟରେ ବନ୍ୟଜନ୍ତୁ ଜନବସତି ମୁହାଁ ହେଉଛନ୍ତି। ଏସବୁ ଭିତରେ ଭାଇରାଲ ହେଉଥିବା ଏହି ଭିଡିଓ ପ୍ରକୃତି ଏବଂ ମଣିଷର ବିକାଶ ମଧ୍ୟରେ ଚାଲିଥିବା ଲଢ଼େଇକୁ ସ୍ପଷ୍ଟ କରୁଛି। ଜଙ୍ଗଲରେ କାମ କରୁଥିବା ଏକ ଜେସିବି ମେସିନକୁ ଅଟକାଇବା ପାଇଁ ହାତୀଟି ସେଠାରେ ପହଞ୍ଚିଯାଇଥିଲା।
ଭିଡିଓରେ ଦେଖିବାକୁ ମିଳୁଛି ଯେ, ଜେସିବି ମେସିନ ସାମ୍ନାରେ ହାତୀଟି ନିର୍ଭୟରେ ଠିଆ ହୋଇ ରହିଛି। ସେଠାରେ ଉପସ୍ଥିତ ଥିବା ଲୋକଙ୍କ କୋଳାହଳ ସତ୍ତ୍ୱେ ହାତୀଟି ସେଠାରୁ ହଟୁନାହିଁ। ଦୃଶ୍ୟଟିକୁ ଦେଖିଲେ ମନେହେବ ଯେମିତି ଗଜରାଜ ନିଜ ଜଙ୍ଗଲକୁ ଉଜୁଡ଼ିବାରୁ ବଞ୍ଚାଇବା ପାଇଁ ଜେସିବି ସହ ସଂଗ୍ରାମ କରୁଛନ୍ତି।
ଏହି ଭିଡିଓଟି ଏବେ ସୋସିଆଲ ମିଡିଆର ବିଭିନ୍ନ ପ୍ଲାଟଫର୍ମରେ ଭାଇରାଲ ହେବାରେ ଲାଗିଛି। ଇନଷ୍ଟାଗ୍ରାମରେ ‘whattsviral.india’ ନାମକ ଏକ ପେଜ୍ରୁ ଏହାକୁ ଶେୟାର କରାଯାଇଛି, ଯାହାକୁ ଏପର୍ଯ୍ୟନ୍ତ ଲକ୍ଷ ଲକ୍ଷ ଲୋକ ଦେଖିସାରିଲେଣି ଏବଂ ହଜାର ହଜାର ଲୋକ ଏହାକୁ ପସନ୍ଦ କରିବା ସହ ନିଜର ପ୍ରତିକ୍ରିୟା ଦେଉଛନ୍ତି। ଜଙ୍ଗଲ ଧ୍ୱଂସ ହେବା ଦ୍ୱାରା ପଶୁମାନଙ୍କ ଉପରେ କିଭଳି ପ୍ରଭାବ ପଡ଼ୁଛି, ଏହି ଭିଡିଓ ତାର ଏକ ବଡ଼ ଉଦାହରଣ ବୋଲି ୟୁଜର୍ସମାନେ କହୁଥିବା ଦେଖାଯାଉଛି।
