ନୂଆଦିଲ୍ଲୀ,୧୧।୧୨: ଓଡ଼ିଶା ସରକାରଙ୍କ ହସ୍ତତନ୍ତ, ବୟନ ଓ ହସ୍ତକଳା ବିଭାଗ ସହ ଫ୍ୟାବ୍ ଇଣ୍ଡିଆ ଲିମିଟେଡ୍ ଏକ ବୁଝାମଣାପତ୍ର (ଏମ୍ଓୟୁ) ସ୍ବାକ୍ଷର କରିଛି। ଏହା ଜରିଆରେ ଫ୍ୟାବ୍ ଇଣ୍ଡିଆ ଗ୍ରୁପ୍ ପକ୍ଷରୁ ଏକ ଗୋଷ୍ଠୀ ମାଲିକାନାଭିତ୍ତିକ କମ୍ପାନୀ ଗଠନ କରାଯାଇଛି ଏବଂ ଏକ ଘରୋଇ ସରକାରୀ ସହଭାଗିତା କମ୍ପାନୀ ଓଡ଼ିଶା ଆର୍ଟିସାନ୍ସ ଆଣ୍ଡ୍ ଉଇଭର୍ସ ଲିମିଟେଡ୍ (ଓଏଡବ୍ଲ୍ୟୁଏଲ୍) ଗଠନ କରାଯାଇଛି। ୨୦୧୧ରେ ଗୋପାଳପୁରରେ ପ୍ରଥମ କ୍ଲଷ୍ଟର (ପୁଞ୍ଜ) ଗଠନ କରିବା ପରେ ଏବେ ବରଗଡ଼, କଟକ, ଭୁବନେଶ୍ୱର, କେନ୍ଦୁଝର, ବୌଦ୍ଧ, ସୋନପୁର, ଗୋପାଳପୁର, ନୂଆପାଟଣା ଆଦିରେ କ୍ଲଷ୍ଟର ସଂଖ୍ୟା ୧୬କୁ ବୃଦ୍ଧି କରାଯାଇଛି। ଏ ସମ୍ପର୍କରେ ଫ୍ୟାବ୍ ଇଣ୍ଡିଆ ଲିମିଟେଡ୍ର ମାର୍କେଟ୍ ରିଜିଅନ୍ସ ହେଡ୍ କେ.ପି. ରାଜେନ୍ଦ୍ରନ କହିଛନ୍ତି, ଓଡ଼ିଶାର ହସ୍ତକଳା ଓ ପରମ୍ପରାକୁ ବଜାୟ ଓ ପ୍ରାସଙ୍ଗିକ ରଖିବା ଲାଗି ରହିଥିବା ଲକ୍ଷ୍ୟର ଅଂଶ ପାଲଟିଥିବା ହଜାର ହଜାର କାରିଗର, ବୁଣାକାର ଏବଂ ଗୋଷ୍ଠୀଗୁଡ଼ିକ ପ୍ରତି ଆମେ ଫ୍ୟାବ୍ ଇଣ୍ଡିଆର ଅଭିବୃଦ୍ଧି ଓ ସଫଳତାକୁ ସମର୍ପିତ କରୁଛୁ। ନିଜେ ବଢ଼ିଲେ ସମସ୍ତ ଅଂଶୀଦାର ବଢ଼ିବେ ଓ ସମୃଦ୍ଧ ରହିବାକୁ ନିଶ୍ଚିତ କରିବା ଲାଗି ଫ୍ୟାବ୍ ଇଣ୍ଡିଆ ପ୍ରତିବଦ୍ଧ ରହିଛି। ଏପରିକି ବରଗଡ଼ରୁ ଫ୍ୟାବ୍ ଇଣ୍ଡିଆ ସହ ଯୋଡ଼ିହୋଇଥିବା କାରିଗର ମକରଧ୍ୱଜ ମେହେର ନିଜ ଅଭିଜ୍ଞତା ବର୍ଣ୍ଣନାକରି କହିଛନ୍ତି, ଓଡ଼ିଶା ଆର୍ଟିସାନ୍ସ ଏବଂ ଉଇଭର୍ସ ଲିମିଟେଡ୍ (ଫ୍ୟାବ୍ ଇଣ୍ଡିଆ) ସହିତ ଦୀର୍ଘ ୧୦ବର୍ଷ ହେବ ବେପାର କରିଆସୁଛି। ମୁଁ କଟନ ଶାଢ଼ି, ଦୁପଟା ଏବଂ କପଡ଼ା ବିକ୍ରିକରେ। ଆଗରୁ ମୋତେ ବେପାର ପାଇଁ ଓଡ଼ିଶା ବାହାରକୁ ଯିବାକୁ ପଡ଼ୁଥିବା।
