ନୂଆଦିଲ୍ଲୀ,୨୬।୩: ରପ୍ତାନି ପ୍ରସ୍ତୁତି ସୂଚକାଙ୍କ (ଇପିଆଇ) ୨୦୨୧ରେ ଓଡ଼ିଶା ୧୩ତମ ସ୍ଥାନକୁ ଖସିଛି। ନୀତି ଆୟୋଗ ପକ୍ଷରୁ ଶୁକ୍ରବାର ଏହି ସୂଚକାଙ୍କ ପ୍ରକାଶ ପାଇଛି। ୨୦୨୦ ଇପିଆଇରେ ଓଡ଼ିଶା ପଞ୍ଚମ ସ୍ଥାନରେ ରହିଥିଲା। ଉପକୂଳ ରାଜ୍ୟ ମଧ୍ୟରେ ଓଡ଼ିଶା ଷଷ୍ଠ ସ୍ଥାନରେ ରହିଛି। ସେହିପରି ରପ୍ତାନି ପ୍ରଦର୍ଶନ ସ୍ତମ୍ଭରେ ରାଜ୍ୟର ର଼୍ୟାଙ୍କ ୧୦ରେ ରହିଛି। ଗୁଜରାଟ, କର୍ନାଟକ ଏବଂ ତାମିଲନାଡୁର ସର୍ବାଧିକ ପ୍ରଦର୍ଶନ ଯୋଗୁ ଓଡ଼ିଶାର ର଼୍ୟାଙ୍କ ହ୍ରାସ ପାଇଥିବା ନୀତି ଆୟୋଗ ପକ୍ଷରୁ କୁହାଯାଇଛି। ଗୁଜରାଟ, କର୍ନାଟକ, ତାମିଲନାଡୁ ଓ ଆନ୍ଧ୍ରପ୍ରଦେଶର ରପ୍ତାନି ପରିମାଣ ଦେଶର ମୋଟ ରପ୍ତାନିର ୫୪ ପ୍ରତିଶତରୁ ଅଧିକ। ୨୦୨୧ର ରପ୍ତାନି ପ୍ରସ୍ତୁତି ସୂଚକାଙ୍କରେ ଗୁଜରାଟ ଶୀର୍ଷରେ ରହିଥିବାବେଳେ ପ୍ରଥମ ୧୦ ସ୍ଥାନରେ ମହାରାଷ୍ଟ୍ର, କର୍ନାଟକ, ତାମିଲନାଡୁ, ହରିୟାଣା, ଉତ୍ତରପ୍ରଦେଶ, ମଧ୍ୟପ୍ରଦେଶ, ପଞ୍ଜାବ, ଆନ୍ଧ୍ରପ୍ରଦେଶ ଓ ତେଲଙ୍ଗାନା ରହିଛନ୍ତି। କେନ୍ଦ୍ରଶାସିତ ଅଞ୍ଚଳ ମଧ୍ୟରେ ଦିଲ୍ଲୀ ଶୀର୍ଷରେ ଥିବାବେଳେ ଏହା ପଛକୁ ଗୋଆ, ଜମ୍ମୁ-କଶ୍ମୀର, ଚଣ୍ଡିଗଡ଼ ଓ ପୁଡ଼ୁଚେରି ରହିଛି।
