ବ୍ରହ୍ମପୁର ଅଫିସ,୧୮।୧: ସିଲ୍କ ସିଟି ଫେଷ୍ଟ ମଙ୍ଗଳବାର ଉଦଯାପିତ ହୋଇଯାଇଛି। ଶେଷ ସନ୍ଧ୍ୟାରେ ମୁଖ୍ୟ ଅତିଥି ରୂପେ ଶ୍ରମମନ୍ତ୍ରୀ ଶ୍ରୀକାନ୍ତ ସାହୁ ମୁଖ୍ୟ ଅତିଥି ରୂପେ ଯୋଗ ଦେଇଥିଲେ। ମହୋତ୍ସବ ମାଧ୍ୟମରେ ଗଞ୍ଜାମ ଜିଲାର ଲୋକ କଳା, ସଂସ୍କୃତିର ପ୍ରଚାରପ୍ରସାର ହୋଇପାରିଛି। ମହୋତ୍ସବ ମାଧ୍ୟମରେ ଏସ୍ଏଚ୍ଜି ମହିଳାମାନେ ସ୍ବାବଲମ୍ବୀ ହୋଇପାରିଛନ୍ତି ବୋଲି ସେ କହିଥିଲେ। ମୁଖ୍ୟମନ୍ତ୍ରୀଙ୍କ ପ୍ରଚେଷ୍ଟାରୁ ରାଜ୍ୟରେ ୨ଥର ଲେଖାଏଁ ହକି ବିଶ୍ୱକପ ଅନୁଷ୍ଠିତ ହୋଇପାରିଛି ବୋଲି ଶ୍ରମ ମନ୍ତ୍ରୀ କହିଥିଲେ। ଅନ୍ୟମାନଙ୍କ ମଧ୍ୟରେ ବିଇଏମ୍ସି ମେୟର ସଂଘମିତ୍ରା ଦଳେଇ, ଡେପୁଟି ମେୟର ଇ ବିବେକ ରେଡି, ବିଧାୟକ ବିକ୍ରମ କୁମାର ପଣ୍ଡା, ଦକ୍ଷିଣାଞ୍ଚଳ ଆଇଜି ସତ୍ୟବ୍ରତ ଭୋଇ, ଜିଲାପାଳ ଦିବ୍ୟଜ୍ୟୋତି ପରିଡା, ଉପଜିଲାପାଳ ଆଶୁତୋଷ କୁଲକର୍ଣ୍ଣି, ବିଇଏମ୍ସି କମିଶନର ଜେ ସୋନାଲ, ଜିଲା ପରିଷଦ କାର୍ଯ୍ୟନିର୍ବାହୀ ଭି କୀର୍ତ୍ତିୱାସନ ପ୍ରମୁଖ ମଞ୍ଚାସୀନ ଥିଲେ। ଏହି ଅବସରରେ ଫେଷ୍ଟକୁ ନେଇ ଅନୁଷ୍ଠିତ ହୋଇଥିବା ବିଭିନ୍ନ ପ୍ରତିଯୋଗିତାରେ କୃତୀ ପ୍ରତିଯୋଗୀଙ୍କୁ ପୁରସ୍କୃତ କରାଯାଇଥିଲା। ଏଥିସହ ଭାରୋତ୍ତୋଳନକାରୀ ସୀତା ଦାଶଙ୍କୁ ମଧ୍ୟ ସମ୍ବର୍ଦ୍ଧିତ କରାଯାଇଥିଲା।
ସନ୍ଧ୍ୟାରେ ଆୟୋଜିତ ସାଂସ୍କୃତିକ କାର୍ଯ୍ୟକ୍ରମରେ ଘଟ କଳସୀ ନୃତ୍ୟ, ଓଡିଶୀ, ଟାଇକୋଣ୍ଡୋ, ଫ୍ୟାସନ ଶୋ, ସମ୍ବଲପୁରୀ, ସ୍କେଟିଂ ମାଧ୍ୟମରେ ସଚେତନତା, ମଡର୍ଣ୍ଣ ନୃତ୍ୟ, ଲୋକ ନୃତ୍ୟ, ବିହୁ ନୃତ୍ୟ ଓ ଘୁମୁରା ନୃତ୍ୟ ପରିବେଶିତ ହୋଇଥିଲା। ମେଗା ସେଲିବ୍ରିଟି କାର୍ଯ୍ୟକ୍ରମରେ ପ୍ରଥମେ ବ୍ରହ୍ମପୁର ପ୍ରିନ୍ସ ଡ୍ୟାନ୍ସ ଗ୍ରୁପ ଦ୍ୱାରା ଶ୍ରୀକୃଷ୍ଣଙ୍କ ଦଶ ଅବତାର ନୃତ୍ୟ ପରିବେଷଣ କରାଯାଇଥିଲା। ଏହାପରେ ବଲିଓଡର ପ୍ରଚ୍ଛଦପଟ ଗାୟକ ଶାନ ଷ୍ଟେଜରେ ରୋମାଞ୍ଚକ ଭରା ପ୍ରବେଶ କରିଥିଲେ। ଶାନ ପ୍ରଥମେ ଶାହାରୁଖ ଖାନଙ୍କ ଡନ ଚଳଚ୍ଚିତ୍ରର ମେ.. ହୁ.. ଡନ ଗୀତ ଗାଇ ଷ୍ଟେଜ ଉପରକୁ ଆସିଥିଲେ। ଯାହାକୁ ନେଇ ଦର୍ଶକଙ୍କ କୋଳାହଳ ଜମି ଉଠିଥିଲା। ଏହାପରେ ସେ ଚାନ୍ଦ..ସିପାରିସ, ଆଜ..ଉନସେ.. ମିଲନା..ହେ, ବେହେତି..ହାୱା..,କସମ..କି..କସମ ଭଳି ସୁପରହିଟ ଗୀତ ପରିବେଷଣ କରିଥିଲେ।
