ଟେନ୍ସା,୭ା୨(ସମୀର କୁମାର ପାଢ଼ୀ): ସୁନ୍ଦରଗଡ଼ ଜିଲା କୋଇଡ଼ା ଅଞ୍ଚଳରୁ ଶନିବାର ୩୦ଲକ୍ଷରୁ ଊର୍ଦ୍ଧ୍ୱ ଟଙ୍କାର ଅଫିମ ଗଛ ପୋଲିସ ଓ ଅବକାରୀ ବିଭାଗ ପକ୍ଷରୁ ନଷ୍ଟ କରାଯାଇଛି।
ସୂଚନାଯୋଗ୍ୟ, କୋଇଡ଼ା ଥାନା ଅନ୍ତର୍ଗତ ଗତ ପୁଣ୍ଢି ପୋଖରୀ ଜଙ୍ଗଲ ଅଞ୍ଚଳରେ ଗଛ କାଟି ପ୍ରାୟ ୫ ଏକର ଜମିରେ ଅଫିମ ଚାଷ କରାଯାଇଥିଲା। ଯାହାକି ଗଛଗୁଡ଼ିକ ବଡ଼ ହୋଇ ଫୁଲ ମଧ୍ୟ ଆସି ଯାଇଥିଲା। କୌଣସି ସୂତ୍ରରୁ ରାଉରକେଲା ଏସ୍ପି ନିତେଶ ଓ୍ବାଧଓ୍ବାନୀଙ୍କ ନିର୍ଦ୍ଦେଶ କ୍ରମେ କୋଇଡା ଥାନା ଅଧିକାରୀ ରାଜେନ୍ଦ୍ର ସ୍ବାଇଁ , କେ ବଲାଙ୍ଗ ଥାନା ଅଧିକାରୀ ଅଶୋକ ବେହେରା ଏବଂ ଅବକାରୀ ବିଭାଗ ମିଳିତରେ ଆଜି ଅଫିମ ଚାଷ ଉପରେ ଚଢ଼ାଉ କରିଥିଲେ। ଏହି ଚାଷ ପଛରେ ଓଡ଼ିଶାରୁ ପଶ୍ଚିମବଙ୍ଗ ଓ ଝାଡ଼ଖଣ୍ଡ ପର୍ଯ୍ୟନ୍ତ ଚେର ଲମ୍ବି ଥିବା ପ୍ରାଥମିକ ତଦନ୍ତରୁ ଜାଣିବାକୁ ମିଳିଛି ବୋଲି ପୋଲିସ ପ୍ରକାଶ କରିଛି। ଦୁଇ ଜଣକୁ ଅଟକ ରଖି ତଦନ୍ତ ଆରମ୍ଭ କରିଛି।
ଏଠାରେ ପ୍ରଶ୍ନ ଉଠେ ଏହି ଅଞ୍ଚଳରେ ହାତୀଙ୍କ ରାଜ ଚାଲିଛି। ହାତୀଙ୍କୁ ଘୋଉଡ଼ାଇବା ପାଇଁ ସ୍କ୍ବାଡ୍ ଗଠନ ହୋଇଛି। ଏତେ ଗଛ କାଟି ୫ ଏକର ଜାଗାରେ ଅଫିମ ଚାଷ ହେଲା ଜଙ୍ଗଲ ବିଭଗ ଜାଣି ପାରିଲା ନାହିଁ କେମିତି ଏହା ପଛରେ କି ରହସ୍ୟ ଲୁଚି ରହିଛି ତାହା ଲୋକଲୋଚନକୁ ଆସିବା ଦରକାର ବୋଲି କୋଇଡ଼ାବାସୀ ଦାବି କରିଛନ୍ତି।