ଆଇଜୋଲ, ୬।୧:ଗତ ୧ ତାରିଖ ମଧ୍ୟରାତ୍ର ୧୨.୦୩ ସମୟରେ ଭାରତର ପ୍ରଥମ ‘ଜେନେରେଶନ ବେଟା’ ଶିଶୁ ଜନ୍ମ ହୋଇଛି। ମିଜୋରାମର ରାଜଧାନୀ ଆଇଜୋଲର ଡର୍ଟଲାଙ୍ଗସ୍ଥିତ ସିନୋଡ ହସ୍ପିଟାଲରେ ଜନ୍ମ ହୋଇଥିବା ଏହି ଶିଶୁର ନାମ ଫ୍ରେକି ରଖାଯାଇଛି। ଜନ୍ମ ହେବା ସମୟରେ ଫ୍ରେକିର ଓଜନ ୩.୧୨ କେ.ଜି. ରହିଥିବାବେଳେ ସେ ସମ୍ପୂର୍ଣ୍ଣ ସୁସ୍ଥ ଥିବା ନେଇ ହସ୍ପିଟାଲର ନର୍ସ ଲାଲ୍ଛୁଆନାଓମୀ କହିଛନ୍ତି। ଫ୍ରେକିଙ୍କ ପରିବାର ଆଇଜୋଲର ଖଟ୍ଲା ଇଷ୍ଟ ଅଞ୍ଚଳରେ ରୁହନ୍ତି। ମା’ ରାମଜିରମାଓ୍ବି ଏବଂ ବାପା ରେମରୁଅତ୍ସଙ୍ଗା ଜେଡଙ୍ଗ୍ଙ୍କର ଫ୍ରେକି ହେଉଛନ୍ତି ପ୍ରଥମ ପୁତ୍ର ସନ୍ତାନ। ଉଭୟଙ୍କର ଏକ କନ୍ୟା ସନ୍ତାନ ମଧ୍ୟ ରହିଛନ୍ତି। ଫ୍ରେକି ‘ଜେନେରେଶନ ବେଟା’ରେ ଭାରତର ପ୍ରଥମ ଶିଶୁ ଭାବେ ଜନ୍ମ ହୋଇଥିବା ଜାଣି ଉଭୟ ରାମଜିରମାଓ୍ବି ଏବଂ ରେମରୁଅତ୍ସଙ୍ଗାଙ୍କର ଖୁସି ଦ୍ୱିଗୁଣିତ ହୋଇଛି। ପ୍ରକାଶ ଯେ, ଜେନେରେଶନ ବେଟା’ ହେଉଛି ୨୦୨୫ରୁ ୨୦୩୯ ମଧ୍ୟରେ ଜନ୍ମ ହେବାକୁ ଥିବା ଶିଶୁଙ୍କ ପିଢ଼ି। ଏହି ପିଢ଼ିରେ ଜନ୍ମିତ ଶିଶୁମାନେ ବୈଷୟିକ ଦୃଷ୍ଟିରୁ ସକ୍ଷମ ହେବା ସହ ସେମାନଙ୍କ ଜୀବନ କୃତ୍ରିମ ବୁଦ୍ଧିମତ୍ତା (ଏଆଇ) ଦ୍ୱାରା ବିଶେଷ ପ୍ରଭାବିତ ହେବ। ୨୦୧୦ରୁ ୨୦୨୪ ପର୍ଯ୍ୟନ୍ତ ଜନ୍ମ ହୋଇଥିବା ଶିଶୁଙ୍କୁ ‘ଜେନେରେଶନ ଆଲ୍ଫା’ କୁହାଯାଉଥିଲା।
