ଭଞ୍ଜନଗର,୧୦।୨(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର ଘୁମୁସର ଉତ୍ତର ବନଖଣ୍ଡ ପକ୍ଷରୁ ମଙ୍ଗଳବାର ବନଖଣ୍ଡସ୍ତରୀୟ ବନାଗ୍ନି ପ୍ରଶମନ ଓ ପରିଚାଳନା ସଚେତନତା ସଭା ଅନୁଷ୍ଠିତ ହୋଇଯାଇଛି । ଏଥିରେ
ଡିଏଫଓ ହିମାଂଶୁ ଶେଖର ମହାନ୍ତି ଅଧ୍ୟକ୍ଷତା କରିଥିଲେ। ଉପଜିଲାପାଳ ଉମାଶଙ୍କର ବେହେରା ମୁଖ୍ୟ ଅତିଥି ଭାବେ ଯୋଗଦେଇ ଜଙ୍ଗଲ ନିଆଁକୁ ରୋକିବାକୁ ହେଲେ ସମସ୍ତଙ୍କ ସହଯୋଗ ଲୋଡ଼ା ବୋଲି କହିଥିଲେ । ଏଥିପ୍ରତି ସମସ୍ତେ ସଚେତନ ହୋଇ ପଦକ୍ଷେପ ନେବାକୁ ଉପଜିଲାପାଳ ଉପସ୍ଥିତ କର୍ମଚାରୀ ଏବଂ ଅନ୍ୟମାନଙ୍କୁ ଆହ୍ବାନ କରିଥିଲେ। ଅନ୍ୟମାନଙ୍କ ମଧ୍ୟରେ ଭଞ୍ଜନଗର ବିଡିଓ ଭାରତୀ ଦେବୀ, ତହସିଲଦାର ଅଭିପ୍ସା ପଟ୍ଟନାୟକ, ବେଲଗୁଣ୍ଠା ବିଡିଓ, ଏସଡିପିଓ ଦୀପକ କୁମାର ମିଶ୍ର, ଭଞ୍ଜନଗର ଦମକଳ କେନ୍ଦ୍ରର ହାବିଲଦାର କେ ଦଣ୍ଡବାବୁ, ଭଞ୍ଜନଗର ଅତିରିକ୍ତ ଜିଲା କୃଷି ଅଧିକାରୀ , ଏସିଏଫ ବିମଳ ପ୍ରଧାନ,ବିବେକ ଦାସ, ଉପଖଣ୍ଡ ପ୍ରାଣୀ ଚିକିତ୍ସା ଅଧିକାରୀ,ରଙ୍କନିଧି ପାତ୍ର, ସୁଶାନ୍ତ ସାହୁ
ପ୍ରମୁଖ ଆଲୋଚନାରେ ଭାଗ ନେଇ ଜଙ୍ଗଲ ନିଆଁକୁ କିଭଳି ରୋକାଯାଇପାରିବ ସେନେଇ କହିଥିଲେ।
ସୂଚନାଯୋଗ୍ୟ , ବିଭିନ୍ନ ସାଟେଲାଇଟ ମାଧ୍ୟମରେ ବନ ବିଭାଗକୁ ଜଙ୍ଗଲ ନିଆଁ କେଉଁଠି ଲାଗୁଛି ସେନେଇ ସୂଚନା ଆସୁଛି। ଏହାକୁ ଭିତ୍ତିକରି ଜଙ୍ଗଲ ନିଆଁକୁ ନିୟନ୍ତ୍ରଣ ପାଇଁ ପଦକ୍ଷେପ ନିଆଯାଉଛି। ସାଟେଲାଇଟରୁ ଆସୁଥିବା ଚିତ୍ର ଜଙ୍ଗଲ ନିଆଁକୁ ନିୟନ୍ତ୍ରଣ କରିବା ବର୍ତ୍ତମାନ ସହଜ ହୋଇପଡିଛି। ଗତବର୍ଷ ଜାନୁୟାରୀ ମାସରୁ ଜୁନ ମାସ ମଧ୍ୟରେ ଏହି ବନଖଣ୍ଡରେ ୨୫୭ ରୁ ଅଧିକ ସ୍ଥାନରେ ଜଙ୍ଗଲ ନିଆଁ ଲାଗିଥିଲା। ପୂର୍ବ ବର୍ଷ ଅପେକ୍ଷା ଏହା ବହୁତ କମ୍। ତେଣୁ ଚଳିତ ବର୍ଷ ମଧ୍ୟ ଯେଭଳି ଅଧିକ କ୍ଷତି ଯେଭଳି ନହେବ ସେଥିପ୍ରତି ବର୍ତ୍ତମାନ ଠାରୁ ପ୍ରସ୍ତୁତି ଆରମ୍ଭ ହୋଇଯାଇଛି । ବିଗତ ଦିନରେ ଦମକଳବାହିନୀ ଏବଂ ବନ ବିଭାଗ ମିଳିତ ଭାବେ ଜଙ୍ଗଲ ନିଆଁ ଲିଭାଉଥିଲେ। ଚଳିତବର୍ଷ ପୋଲିସକୁ ଏଥିରେ ସାମିଲ କରିବା ପାଇଁ ବୈଠକରେ ନିଷ୍ପତ୍ତି ହୋଇଥିଲା। ଏଥିସହ ସହର ମଧ୍ୟରେ ସଚେତନତା କାର୍ଯ୍ୟକ୍ରମ କରାନଯାଇ ଜଙ୍ଗଲ ନିକଟବର୍ତ୍ତୀ ଗ୍ରାମ ଗୁଡିକରେ ଏହିଭଳି କାର୍ଯ୍ୟକ୍ରମ କରାଗଲେ ସରକାରଙ୍କ ଲକ୍ଷ୍ୟ ସାଧନ ହୋଇପାରିବ ବୋଲି କେତେକ ବକ୍ତା ମତପ୍ରକାଶ କରିଥିଲେ।
