ବ୍ରସେଲ୍ସ, ୧୫ା୯: ଲୋକଙ୍କୁ ଜବରଦସ୍ତି ଶ୍ରମିକ ସଜାଇ ସେମାନଙ୍କ ଦ୍ୱାରା ଉତ୍ପାଦିତ ସାମଗ୍ରୀ ଉପରେ କଟକଣା ଲଗାଇବାକୁ ୟୁରୋପିଆନ୍ ୟୁନିୟନ୍(ଇୟୁ) ଯୋଜନା ପ୍ରସ୍ତୁତ କରିଛି। ମହାମାରୀ, ଯୁଦ୍ଧ ପ୍ରଭାବ, ଜଳବାୟୁ ପରିବର୍ତ୍ତନ ଆଦି ଯୋଗୁ ବିଶ୍ୱରେ ବଢ଼ୁଥିବା ଆଧୁନିକ ଦାସତ୍ୱ ବା ମର୍ଡନ ସ୍ଲେଭେରି ହ୍ରାସ କରିବାକୁ ଏହି ପଦକ୍ଷେପ ଜରୁରୀ ବୋଲି ଇୟୁ କହିଛି। ଗତବର୍ଷ ବିଶ୍ୱର ୨ କୋଟି ୭୦ ଲକ୍ଷ ଲୋକଙ୍କୁ ଦାସତ୍ୱ ଗ୍ରହଣ କରିବାକୁ ବାଧ୍ୟ କରାଯାଇଛି। ସେମାନଙ୍କୁ ଇଚ୍ଛା ବିରୋଧରେ ତଥା ଅତ୍ୟାଚାର ବଳରେ ଶ୍ରମିକ ସଜାଯାଇଥିବା ଜାତିସଂଘର ଅନ୍ତର୍ଜାତୀୟ ଶ୍ରମ ସଙ୍ଗଠନ (ଆଇଏଲ୍ଓ) କହିଛି। ଶିଞ୍ଜିଆଙ୍ଗ୍ ପ୍ରଦେଶରେ ବସବାସ କରୁଥିବା ସଂଖ୍ୟାଲଘୁ ଉଇଗର ମୁସଲମାନଙ୍କ ଉପରେ ଚାଇନାର ଅତ୍ୟାଚାର ଓ ସେମାନଙ୍କୁ ଜୋରଜବରଦସ୍ତି ଶ୍ରମିକ ସଜାଉଥିବା ସାରା ବିଶ୍ୱ ଜାଣିଛି। ତେଣୁ ଇୟୁର ଏପରି ପଦକ୍ଷେପ ଯୋଗୁ ଚାଇନା ଉପରେ ଚାପ ପଡ଼ିବ ବୋଲି କୁହାଯାଉଛି। ହେଲେ ୟୁରୋପୀୟ ସଂଘ ନିର୍ଦ୍ଦିଷ୍ଟ ଭାବେ କୌଣସି ଦେଶର ନାଁ ଦର୍ଶାଇନାହିଁ।
ଏହି ନିୟମ ଆଣିବା ନିମନ୍ତେ ୟୁରୋପିଆନ୍ କମିଶନ ପ୍ରସ୍ତାବ ଦେଇଛି। ୨୭ ରାଷ୍ଟ୍ର ସଦସ୍ୟ ଥିବା ଏହି ବ୍ଲକ୍ର ମାର୍କେଟରୁ ବାଧ୍ୟ ଶ୍ରମ ଦ୍ୱାରା ପ୍ରସ୍ତୁତ ଉତ୍ପାଦକୁ ହଟାଯିବ ବୋଲି ୟୁରୋପୀୟ କମିଶନ କହିଛି। ଏହାଦ୍ୱାରା ବିଶ୍ୱର ସବୁଠୁ ବଡ଼ ବଜାର ବାଣିଜି୍ୟକ ବ୍ଲକ୍ରେ ବାଧ୍ୟତାମୂଳକ ଶ୍ରମ ଦ୍ୱାରା ପ୍ରଡକ୍ଟ ଉତ୍ପାଦନ କିମ୍ବା ଏହି ମାର୍କେଟ ଦେଇ ଏହାର ପରିବହନକୁ ରୋକାଯାଇପାରିବ। ଏଥିରେ କୌଣସି ନିର୍ଦ୍ଦିଷ୍ଟ କମ୍ପାନୀ, ଶିଳ୍ପ କିମ୍ବା ଦେଶକୁ ଟାର୍ଗେଟ କରାଯାଇନାହିଁ ବୋଲି କୁହାଯାଇଛି। ଇୟୁ ବଜାରରୁ ଏଭଳି ଭାବେ ପ୍ରସ୍ତୁତ ଉତ୍ପାଦକୁ ସମ୍ପୂର୍ଣ୍ଣ ଭାବେ ବ୍ୟାନ୍ କରିବା ଏହାର ଉଦ୍ଦେଶ୍ୟ ବୋଲି କମିଶନର କାର୍ଯ୍ୟନିର୍ବାହୀ ଉପାଧ୍ୟକ୍ଷ ଭାଲ୍ଡିସ୍ ଡୋମ୍ବ୍ରୋଭ୍ସ୍କିସ୍ କହିଛନ୍ତି।
