ଜେନେଭା,୩୦।୩ : ମେଦବହୁଳତାର ମୁକାବିଲା କରିବା ପାଇଁ ଅତ୍ୟାବଶ୍ୟକ ଔଷଧ ତାଲିକାରେ ପ୍ରଥମ ଥର ପାଇଁ ମେଦବହୁଳତା ଔଷଧ ସାମିଲ ହୋଇପାରେ। ବିଶ୍ୱ ସ୍ବାସ୍ଥ୍ୟ ସଂଗଠନ (ଡବ୍ଲୁଏଚଓ)ର ଔଷଧ ତାଲିକାରେ ଏହି ଔଷଧକୁ ଅନ୍ତର୍ଭୁକ୍ତ କରାଯାଇପାରେ। ସ୍ବଳ୍ପ ଏବଂ ମଧ୍ୟବିତ୍ତ ଦେଶରେ ସରକାରୀ କ୍ରୟ ନିଷ୍ପତ୍ତିଗୁଡିକୁ ମାର୍ଗଦର୍ଶନ କରିବା ପାଇଁ ଏହା ବ୍ୟବହୃତ ହେବ।
ସେପ୍ଟେମ୍ବରରେ ଔଷଧର ଅପଡେଟ ତାଲିକା ପ୍ରକାଶ ପାଇବ । ଏହାକୁ ଦୃଷ୍ଟିରେ ରଖି ଡବ୍ଲୁଏଚଓ ପରାମର୍ଶଦାତାମାନଙ୍କର ଏକ କମିଟି ଆସନ୍ତା ମାସରେ ଏସବୁ ଔଷଧକୁ ଅନ୍ତର୍ଭୂକ୍ତ କରାଯିବା ପାଇଁ ନୂତନ ଅନୁରୋଧର ସମୀକ୍ଷା କରିବ। ମେଦବହୁଳତା ଔଷଧକୁ ତାଲିକାରେ ସାମିଲ କରିବା ବିଷୟରେ ବିଚାର କରିବାକୁ ଆମେରିକାର ତିନିଜଣ ଡାକ୍ତର ଏବଂ ଜଣେ ଅନୁସନ୍ଧାନକାରୀଙ୍କ ଦ୍ୱାରା ଏକ ଅନୁରୋଧ କରାଯାଇଛି। ଏଥିରେ ନୋଭୋ ନର୍ଡିସ୍କର ମେଦବହୁଳତା ଔଷଧ ସାକ୍ସେଣ୍ଡାର ସକ୍ରିୟ ଉପାଦାନ ଲିରାଗ୍ଲୁଟାଇଡ ଅନ୍ତର୍ଭୁକ୍ତ ।
ଡବ୍ଲୁଏଚଓ ମୁଖପାତ୍ର କହିଛନ୍ତି ଯେ ମେଦବହୁଳତା ଅନେକ ଦେଶରେ ଦ୍ରୁତ ଗତିରେ ବଢୁଥିବା ଏକ ସ୍ବାସ୍ଥ୍ୟ ସମସ୍ୟା ଅଟେ। ଅବଶ୍ୟ, ମେଦବହୁଳତାର ଚିକିତ୍ସା ପାଇଁ ଔଷଧ ପରିଚାଳନା ସହିତ ଏହାର ପ୍ରତିରୋଧ ମଧ୍ୟ ଗୁରୁତ୍ୱପୂର୍ଣ୍ଣ। ଡବ୍ଲୁଏଚଓ ଅନୁଯାୟୀ, ବିଶ୍ୱରେ ୬୫କୋଟିରୁ ଅଧିକ ବୟସ୍କ ବ୍ୟକ୍ତିଙ୍କ ଠାରେ ମେଦବହୁଳତା ସମସ୍ୟା ରହିଛି।
