ନୂଆଦିଲ୍ଲୀ,୨୩।୩: ମୋରେଟୋରିୟମ୍ ମାମଲାରେ ମଙ୍ଗଳବାର ସୁପ୍ରିମ୍କୋର୍ଟ ଏକ ଗୁରୁତ୍ୱପୂର୍ଣ୍ଣ ରାୟ ଦେଇଛନ୍ତି। ସୁପ୍ରିମ୍କୋର୍ଟ କହିଛନ୍ତି ଯେ, ଋଣ ନେଇଥିବା ବ୍ୟକ୍ତି ବିଶେଷ ଅବା ସଂସ୍ଥାଙ୍କ ସୁଧକୁ କରୋନା ମହାମାରୀ ଯୋଗୁ ସମ୍ପୂର୍ଣ୍ଣ ଛାଡ କରାଯାଇ ପାରିବ ନାହିଁ। ମହାମାରୀ ଯୋଗୁ କେବଳ କମ୍ପାନୀ ନୁହେଁ ସରକାରଙ୍କର ମଧ୍ୟ କ୍ଷତି ହୋଇଛି। ସରକାର ଏବଂ ଭାରତୀୟ ରିଜର୍ଭ ବ୍ୟାଙ୍କ ଉପରେ ଆଉ ଅଧିକ ଚାପ ପକାଯାଇ ପାରିବ ନାହିଁ। କୋର୍ଟଙ୍କ ନିଷ୍ପତ୍ତି ଯୋଗୁ ସମ୍ପୂର୍ଣ୍ଣ ସୁଧ ଛାଡ ନେଇ କୋର୍ଟଙ୍କ ଦ୍ୱାରସ୍ଥ ହୋଇଥିବା ରିୟଲ ଇଷ୍ଟେଟ୍ ଭଳି କେତେକ ସେକ୍ଟରର କମ୍ପାାନୀଙ୍କୁ ବଡ଼ ଝଟ୍କା ଲାଗିଛି। ବିଚାରପତି ଅଶୋକ ଭୂଷଣ, ସୁଭାଷ ରେଡ୍ଡୀ ଏବଂ ଏମ୍.ଆର୍. ଶାହାଙ୍କ ନେତୃତ୍ୱରେ ଗଠିତ ହୋଇଥିବା ଖଣ୍ଡପୀଠ ଦେଶର ଆର୍ଥିକ ନୀତି ସମ୍ପର୍କିତ ଯୋଜନାରେ ସୁପ୍ରିମ୍କୋର୍ଟଙ୍କ ହସ୍ତକ୍ଷେପକୁ ମନା କରିଦେଇଛନ୍ତି। କୌଣସି ଯୋଜନା ଠିକ ଅବା ଭୁଲ୍ ତାହାର ନିର୍ଣ୍ଣୟ କୋର୍ଟ ନେଇ ପାରିବେ ନାହିଁ। ଯୋଜନା ଆଇନ ସମ୍ମତ କି ନୁହେଁ ତାହା କେବଳ କୋର୍ଟ ସୂଚିତ କରିପାରିବେ ବୋଲି ଖଣ୍ଡପୀଠ କହିଛନ୍ତି। ଏହି ମାମଲାରେ ସରକାରଙ୍କ ପକ୍ଷରୁ କୋର୍ଟରେ ଏକ ସତ୍ୟପାଠ ଦାଖଲ କରାଯାଇଥିଲା। ଏଥିରେ ଲଲ୍ଲେଖ କରାଯାଇଛି ଯେ, ମହାମାରୀ ଯୋଗୁ ସରକାରଙ୍କ ପକ୍ଷରୁ ବିଭିନ୍ନ ସେକ୍ଟର ପାଇଁ ପ୍ରର୍ଯ୍ୟାପ୍ତ ଆର୍ଥିକ ସହାୟତା ପ୍ୟାକେଜ ଘୋଷଣା କରାଯାଇଛି। ସାମ୍ପ୍ରତିକ ସ୍ଥିତିରେ ଅଧିକ ଆର୍ଥିକ ସହାୟତା ପ୍ରଦାନ କରିବାକୁ ସରକାର ସକ୍ଷମ ନୁହନ୍ତି ବୋଲି ଏଥିରେ ଦର୍ଶାଯାଇଛି।
