ନୂଆଦିଲ୍ଲୀ, ୭।୭: ଯଦି ଆପଣଙ୍କର ମଧ୍ୟ EPFରେ ପଇସା ଜମା ହେଉଛି, ତେବେ ଆପଣଙ୍କ ପାଇଁ ବଡ଼ ଖୁସି ଖବର। EPFO ଆର୍ଥିକ ବର୍ଷ ୨୦୨୫-୨୬ ପାଇଁ PF ଆକାଉଣ୍ଟରେ ୮.୨୫% ସୁଧ ଜମା କରିବା ପ୍ରକ୍ରିୟା ଆରମ୍ଭ କରିବାକୁ ନିର୍ଦ୍ଦେଶ ଜାରି କରିଦେଇଛି। ଏବେ କୋଟି କୋଟି କର୍ମଚାରୀଙ୍କ PF ଆକାଉଣ୍ଟରେ ଖୁବ ଶୀଘ୍ର ସୁଧ ଟଙ୍କା ଦେଖାଯିବାକୁ ଲାଗିବ ଏବଂ ଏହାଦ୍ୱାରା ପିଏଫ ଆକାଉଣ୍ଟରେ ଥିବା ପଇସା ମଧ୍ୟ ବଢ଼ିଯିବ। ଆପଣଙ୍କର ପିଏଫ ବାଲାନ୍ସ ଏବଂ ଆସିଥିବା ସୁଧ କେମିତି ଚେକ କରିବେ, ତାହା ଆପଣ ଏଠାରୁ ଜାଣିପାରିବେ। ଏହାସହ ଯଦି ସୁଧ ଦେଖା ନଯାଏ ତେବେ କଣ କରିବାକୁ ହେବ, ତାହା ମଧ୍ୟ ଏଠାରେ ବୁଝାଯାଇଛି।
ସୂଚନାଯୋଗ୍ୟ ଯେ, EPFO ପକ୍ଷରୁ ଫିଲ୍ଡ ଅଫିସଗୁଡ଼ିକୁ ଆକାଉଣ୍ଟରେ ୮.୨୫% ସୁଧ କ୍ରେଡିଟ କରିବାକୁ ଆଦେଶ ଦିଆଯାଇଛି। ସୁଧ ଟଙ୍କା ଅଲଗା ଅଲଗା ଆକାଉଣ୍ଟରେ ଗୋଟିଏ ପରେ ଗୋଟିଏ ଅପଡେଟ୍ ହେବ। ଯଦି ଆପଣଙ୍କ ଆକାଉଣ୍ଟରେ ଏବେ ସୁଧ ଦେଖାଯାଉ ନାହିଁ, ତେବେ ବ୍ୟସ୍ତ ହେବାର କୌଣସି ଆବଶ୍ୟକତା ନାହିଁ। ସବୁ ଆକାଉଣ୍ଟରେ ସୁଧ ଧୀରେ ଧୀରେ ଜମା କରାଯିବ।
୧. EPFO ୱେବସାଇଟ- EPFOର ମେମ୍ବର ପାସବୁକ ୱେବସାଇଟ୍କୁ ଯାଆନ୍ତୁ। ସେଠାରେ UAN ଏବଂ ପାସୱାର୍ଡ ଦେଇ ଲଗଇନ କରନ୍ତୁ। ଏହାପରେ ’Member ID’ ବାଛିବା ମାତ୍ରେ ପିଏଫ ବାଲାନ୍ସ ଏବଂ ସୁଧ ଦେଖାଯିବ।
୨. ଉମଙ୍ଗ (UMANG) ଆପ- ଉମଙ୍ଗ ଆପ ଖୋଲନ୍ତୁ, EPFO ସର୍ଭିସ ବାଛନ୍ତୁ ଏବଂ ‘View Passbook’ ଉପରେ କ୍ଲିକ କରନ୍ତୁ। ଏବେ UAN ଜରିଆରେ ଲଗଇନ କରିବା ପରେ ବାଲାନ୍ସ ଦେଖିପାରିବେ।
୩. ମିସ୍ଡ କଲ- ଆପଣଙ୍କର ପଞ୍ଜୀକୃତ (Registered) ମୋବାଇଲ ନମ୍ବରରୁ 9966044425 କୁ ଏକ ମିସ୍ଡ କଲ ଦିଅନ୍ତୁ। କିଛି ସମୟ ମଧ୍ୟରେ ମେସେଜ ମାଧ୍ୟମରେ ପିଏଫ ବାଲାନ୍ସର ସୂଚନା ମିଳିଯିବ।
୪. ମେସେଜ ଜରିଆରେ ବାଲାନ୍ସ- ଯଦି ଆପଣଙ୍କର UAN ଆକ୍ଟିଭ ଅଛି ଏବଂ ଏହା ଆଧାର, ପ୍ୟାନ କିମ୍ବା ବ୍ୟାଙ୍କ ଆକାଉଣ୍ଟ ସହ ଲିଙ୍କ ଅଛି, ତେବେ ପଞ୍ଜୀକୃତ ମୋବାଇଲରୁ ’EPFOHO UAN’ ଲେଖି 7738299899କୁ ମେସେଜ ପଠାନ୍ତୁ। କିଛି ସମୟ ମଧ୍ୟରେ ବାଲାନ୍ସ ସୂଚନା ମିଳିଯିବ।
