ନୂଆଦିଲ୍ଲୀ,୨୪।୬: EPFO ସଦସ୍ୟଙ୍କ ପାଇଁ ଏକ ବଡ଼ ଆଶ୍ୱସ୍ତି ଖବର। ଏବେ ଯଦି ଆପଣ ଆପଣଙ୍କର PF ପାଣ୍ଠିରୁ ଆଡଭାନ୍ସ ନେବାକୁ ଚାହାଁନ୍ତି, ତେବେ ଆପଣଙ୍କୁ ଅଧିକ ଅପେକ୍ଷା କରିବାକୁ ପଡ଼ିବ ନାହିଁ। ସରକାର ଅଟୋ ସେଟେଲମେଣ୍ଟ ଲିମିିଟକୁ ୧ ଲକ୍ଷ ଟଙ୍କାରୁ ୫ ଲକ୍ଷ ଟଙ୍କାକୁ ବୃଦ୍ଧି କରିଛନ୍ତି। କେନ୍ଦ୍ର ଶ୍ରମ ଓ ନିଯୁକ୍ତି ମନ୍ତ୍ରୀ ମନସୁଖ ମାଣ୍ଡବ୍ୟ ମଙ୍ଗଳବାର ଏହି ଘୋଷଣା କରିଛନ୍ତି।
”EPFOର ଏହି ନୂଆ ସୀମା ସଦସ୍ୟଙ୍କୁ ୭୨ ଘଣ୍ଟା ମଧ୍ୟରେ ଅର୍ଥ ପ୍ରାପ୍ତିରେ ସାହାଯ୍ୟ କରିବ, ଯାହା ସେମାନଙ୍କ ଜୀବନକୁ ଆହୁରି ସହଜ କରିବ।”
EPFOର ଅଟୋ ସେଟଲମେଣ୍ଟ ସୁବିଧା ପ୍ରଥମେ ୨୦୨୦ ମସିହାରେ କରୋନା ମହାମାରୀ ସମୟରେ ଚିକିତ୍ସା ଆବଶ୍ୟକତା ପାଇଁ ଆରମ୍ଭ ହୋଇଥିଲା। ପରେ ଏହାକୁ ଶିକ୍ଷା, ବିବାହ ଓ ଗୃହ ନିର୍ମାଣ ପରି ଅନ୍ୟ କାରଣ ପାଇଁ ବିସ୍ତାର କରାଯାଇଥିଲା। ୨୦୨୪ ମେ’ରେ ଏହି ସୀମା ₹୫୦,୦୦୦ରୁ ₹୧ ଲକ୍ଷକୁ ବୃଦ୍ଧି କରାଯାଇଥିଲା। ଏବେ ଏହାକୁ ₹୫ ଲକ୍ଷ ପର୍ଯ୍ୟନ୍ତ ବୃଦ୍ଧି କରାଯାଇଛି, ଯାହା ୭.୫ କୋଟିରୁ ଅଧିକ EPFO ସଦସ୍ୟଙ୍କ ପାଇଁ ଏକ ବଡ଼ ଆଶ୍ବସ୍ତି।
ମନ୍ତ୍ରୀ ମାଣ୍ଡବ୍ୟଙ୍କ ଅନୁସାରେ, ଚଳିତ ଆର୍ଥିକ ବର୍ଷ ୨୦୨୫-୨୬ର ପ୍ରଥମ ୨.୫ ମାସରେ EPFO ୭୬.୫୨ ଲକ୍ଷ ଦାବିକୁ ଅଟୋ ସେଟଲମେଣ୍ଟ ମାଧ୍ୟମରେ ସମାଧାନ କରିଛି, ଯାହା ମୋଟ ଅଗ୍ରିମ ଦାବିର ୭୦%। ୨୦୨୪-୨୫ ଆର୍ଥିକ ବର୍ଷରେ EPFO ରେକର୍ଡ ୨.୩୪ କୋଟି ଅଗ୍ରିମ ଦାବି ଅଟୋ ସେଟଲମେଣ୍ଟ ମାଧ୍ୟମରେ ସମାଧାନ କରିଥିଲା, ଯାହା ୨୦୨୩-୨୪ର ୮୯.୫୨ ଲକ୍ଷ ଦାବି ତୁଳନାରେ ୧୬୧% ଅଧିକ।
ଅଟୋ ସେଟଲମେଣ୍ଟ ହେଉଛି ଏକ ହାଇ-ଟେକ୍ ପ୍ରକ୍ରିୟା, ଯେଉଁଥିରେ କୌଣସି ମାନୁଆଲ ଯାଞ୍ଚ ବିନା କମ୍ପ୍ୟୁଟର ସିଷ୍ଟମ ଦ୍ୱାରା ଦାବି ସ୍ୱୟଂଚାଳିତ ଭାବେ ସମାଧାନ ହୁଏ। ଏହା ଦାବି ସମାଧାନର ସମୟକୁ ବହୁତ କମାଇ ଦେଇଥାଏ ଏବଂ ପାରଦର୍ଶିତା ବୃଦ୍ଧି କରିଥାଏ। ଏବେ ୯୯% ଦାବି ଅନଲାଇନ ମାଧ୍ୟମରେ ପ୍ରାପ୍ତ ହେଉଛି ଏବଂ ସ୍ୱୟଂ ସେଟଲମେଣ୍ଟ ମୋଡରେ ଥିବା ଦାବିଗୁଡ଼ିକ ୩ ଦିନ ମଧ୍ୟରେ ସମାଧାନ ହେଉଛି।
EPFO ନିକଟରେ KYC ସଂଶୋଧନ, ଟ୍ରାନ୍ସଫର ଦାବି ଓ ପେନସନ ପେମେଣ୍ଟ ପ୍ରକ୍ରିୟାକୁ ମଧ୍ୟ ସରଳୀକରଣ କରିଛି। ୨୦୨୫ ଜାନୁଆରୀ ୧୫ରୁ ଟ୍ରାନ୍ସଫର ଦାବି ପାଇଁ ନିଯୁକ୍ତିଦାତାଙ୍କ ଅନୁମୋଦନର ଆବଶ୍ୟକତା ଅଧିକାଂଶ କ୍ଷେତ୍ରରେ ହଟାଯାଇଛି। ଏହା ସହିତ, ଚେକ୍ ବୁକ୍ କିମ୍ବା ବ୍ୟାଙ୍କ ପାସବୁକ୍ ଅପଲୋଡ଼ କରିବାର ଆବଶ୍ୟକତା ମଧ୍ୟ ହଟାଯାଇଛି, ଯାହା ଦାବି ପ୍ରତ୍ୟାଖ୍ୟାନକୁ କମାଇବ।
