କୋଲକାତା,୨୧।୩ : ଷ୍ଟାର୍ ସ୍ପୋର୍ଟସ ଆଇପିଏଲ-୨୦୨୩ ପାଇଁ କମେଣ୍ଟେଟର୍ସଙ୍କ ନାମ ଘୋଷଣା କରିଛି। ୩୧ ମାର୍ଚ୍ଚରୁ ଆଇପିଏଲ ଆରମ୍ଭ ହେଉଛି। ଏଥିପାଇଁ ବିସିସିଆଇ ସମସ୍ତ ପ୍ରସ୍ତୁତି ଶେଷ କରିଛି। ଆଇପିଏଲ ଦଳ ମଧ୍ୟ ପ୍ରସ୍ତୁତ ଅଛନ୍ତି। ଭାରତରେ ପଡିଆ ମଧ୍ୟ ପ୍ରସ୍ତୁତିର ଶେଷ ପର୍ଯ୍ୟାୟରେ ରହିଛି। ଦକ୍ଷିଣ ଆଫ୍ରିକାର ପୂର୍ବତନ କିମ୍ବଦନ୍ତୀ କ୍ରିକେଟର ଜ୍ୟାକ କଲିସ ପ୍ରଥମ ଥର ପାଇଁ ତାଙ୍କ କମେଣ୍ଟ୍ରି ଟୁର୍ନାମେଣ୍ଟରେ ଦେବେ। ଏହା ସହିତ ପ୍ରଥମ ଥର ପାଇଁ ଇଂଲଣ୍ଡ ଟି-୨୦ ବିଶ୍ୱକପ ଜିତିଥିବା ଅଧିନାୟକ ପଲ କଲିଙ୍ଗଉଡ, ଆରୋନ ଫିଞ୍ଚ, ଡାନି ମୋରିସନ ମଧ୍ୟ କମେଣ୍ଟ୍ରି ବକ୍ସରେ ନଜର ଆସିବେ। କେକେଆର ମେଣ୍ଟର ଡେଭିସ ହୁସେ, ମାଥ୍ୟୁ ହେଡେନ, କେଭିନ ପିଟରସେନ ମଧ୍ୟ ଆଇପିଏଲ ୨୦୨୩ରେ କମେଣ୍ଟ୍ରି ଦେଉଥିବାର ନଜର ଆସିବେ।
ଚେନ୍ନାଇ ସୁପର କିଙ୍ଗ୍ସ ପାଇଁ ଖେଳିଥିବା ଇମ୍ରାନ ତାହିର ଏଥର କମେଣ୍ଟ୍ରି ବକ୍ସରେ ବସି ସ୍ପିନ ଥିଓରୀ ବ୍ୟାଖ୍ୟା କରୁଥିବା ଦେଖିବାକୁ ମିଳିବେ। ଭାରତୀୟ ଖେଳାଳିଙ୍କ ମଧ୍ୟରେ ଇରଫାନ ପଠାନ, ୟୁସୁଫ ପଠାନ, ହରଭଜନ ସିଂ, ସୁନୀଲ ଗାଭାସ୍କର, ଲକ୍ଷ୍ମୀପତି ବାଲାଜୀ ଏବଂ ମୁରଲୀ ବିଜୟଙ୍କ ନାମ କମେଣ୍ଟ୍ରି ପ୍ୟାନେଲରେ ରଖାଯାଇଛି। ଗାଭାସ୍କରଙ୍କ ସହ ତାଙ୍କର ୧୯୮୩ ବିଶ୍ୱକପର ଦୁଇଜଣ ସାଥୀ ଅର୍ଥାତ ସନ୍ଦୀପ ପାଟିଲ ଏବଂ କେ ଶ୍ରୀକାନ୍ତଙ୍କୁ ମଧ୍ୟ ଦେଖିବାକୁ ମିଳିବ।
ମହିଳା କ୍ରିକେଟର ସଚିନ ତେନ୍ଦୁଲକର ଭାବେ ଜଣାଶୁଣା ପୂର୍ବତନ ବ୍ୟାଟ୍ସମ୍ୟାନ ମିତାଲି ରାଜଙ୍କୁ ମଧ୍ୟ ଆଇପିଏଲ ୨୦୨୩ରେ କମେଣ୍ଟ୍ରି କରୁଥିବା ଦେଖିବାକୁ ମିଳିବ। କମେଣ୍ଟ୍ରି କେବଳ ହିନ୍ଦୀ ଏବଂ ଇଂଲିଶରେ ନୁହେଁ, ତେଲୁଗୁ ଭାଷାରେ ମଧ୍ୟ ଭେନୁଗୋପାଲ ରାୟ, ଟି ସୁମନ ଏବଂ ଆଶିଷ ରେଡ୍ଡୀଙ୍କ ଭଳି ପୂର୍ବତନ ଖେଳାଳିମାନେ ନିଜର କମେଣ୍ଟ୍ରି ଦେବେ। ପ୍ରଶଂସକମାନେ ପୂର୍ବତନ ଖେଳାଳି ବିଜୟ ଭରଦ୍ୱାଜ, ଶ୍ରୀନିବାସା ମୁର୍ତ୍ତି ଏବଂ କନ୍ନଡ ବିଗ ବସ ବିଜେତା ରୂପେଶ ଶେଟ୍ଟୀଙ୍କ କମେଣ୍ଟ୍ରି କନ୍ନଡ ଭାଷାରେ ଉପଭୋଗ କରିପାରିବେ।
