ନଟିଂହାମ,୫।୮: ଭାରତ-ଇଂଲଣ୍ଡ ମଧ୍ୟରେ ଖେଲାଯାଉଥିବା ପାଞ୍ଚ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜର ପ୍ରଥମ ମ୍ୟାଚ୍ ସ୍ଥାନୀୟ ଟ୍ରେଣ୍ଟ ବ୍ରିଜ୍ ଗ୍ରାଉଣ୍ଡରେ ଖେଳାଯାଉଛି। ମ୍ୟାଚ୍ର ପ୍ରଥମ ଦିନ ଷ୍ଟାଡିୟମରେ ଏକ ଖାଲି ଚଉକି ସମସ୍ତଙ୍କ ଦୃଷ୍ଟି ଆକର୍ଷଣ କରିଥିବା ବେଳେ ସୋସିଆଲ ମିଡିଆରେ ଭାଇରାଲ ହୋଇଥିଲା। ଏବେ ଏହାର କାହାଣୀ ସମସ୍ତଙ୍କୁ ଭାବୁକ କରୁଛି।
ଘଟଣାଟି ଏପରି। ଏହି ଚୌକି କ୍ରିକେଟର ଜଣେ ବହୁତ ବଡ଼ ପ୍ରଶଂସକ ଜନ୍ କ୍ଲାର୍କଙ୍କ ପାଇଁ ଖାଲି ଛଡ଼ାଯାଇଛି। ନିକଟରେ କରୋନାରେ ସେ ପ୍ରାଣ ହରାଇଛନ୍ତି। ଜନ୍ କ୍ରିକେଟର ବହୁତ ବଡ଼ ପ୍ରଶଂସକ ଥିଲେ। ସେ ଟ୍ରେଣ୍ଟ ବ୍ରିଜ୍ ଗ୍ରାଉଣ୍ଡରେ ଖେଳାଯାଉଥିବା ପ୍ରତ୍ୟେକଟି ମ୍ୟାଚ୍କୁ ଦେଖିବା ଲାଗି ଆସୁଥିଲେ। ଏଣୁ ତାଙ୍କ ମୃତ୍ୟୁ ପରେ ସାଙ୍ଗମାନେ ସ୍ମୃତିରେ ଜନ୍ଙ୍କ ପାଇଁ ଟିକେଟ କିଣିଥିଲେ। ଏପରିକି ତାଙ୍କ ସିଟ୍ଟିକୁ ଖାଲି ଛାଡ଼ି ଦେଇଥିଲେ। ଆଜି ବି ସେ ପୂର୍ବଭଳି ତାଙ୍କ ସହ ମ୍ୟାଚ୍ ଦେଖୁଛନ୍ତି ବୋଲି ଅନୁଭବ ହେଉଥିବା ବନ୍ଧୁମାନେ କହିଛନ୍ତି।
ପ୍ରକାଶ ଯେ, ଟସ୍ ଜିତି ଇଂଲଣ୍ଡ ଅଧିନାୟକ ଜୋ ରୁଟ୍ ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିଲେ। ଭାରତୀୟ ବୋଲରଙ୍କ ସମ୍ମୁଖୀନ ହୋଇ ନ ପାରି ଇଂଲଣ୍ଡ ୬୫.୪ ଓଭରରେ ୧୮୩ ରନ୍ କରି ଅଲଆଉଟ୍ ହୋଇଥିଲା। ଜବାବରେ ଭାରତ ପ୍ରଥମ ଦିବସ ଖେଳ ଶେଷ ସୁଦ୍ଧା ୧୩ ଓଭରରେ କୌଣସି ଉଇକେଟ ନ ହରାଇ ୨୧ ରନ୍ କରିଥିଲା। ଗୁରୁବାର ଏହିଠାରୁ ଖେଳ ଜାରି ରହିଛି।
