ଭୁବନେଶ୍ୱର, ୯।୫ (ବ୍ୟୁରୋ): ରାଜଧାନୀ ଭୁବନେଶ୍ୱରକୁ ଏକ ସ୍ବଚ୍ଛ ଓ ସୁନ୍ଦର ସହର କରି ଗଢି ତୋଳିବା ସହ ୧ନଂ ସ୍ମାର୍ଟସିଟିରେ ପରିଣତ କରିବା ପାଇଁ ବିଏମ୍ସି ଚେଷ୍ଟା ଜାରି ରଖିଛି। ଏଥିପାଇଁ ବିଭିନ୍ନ ଯୋଜନା ହାତକୁ ନେବା ସହିତ ଲୋକଙ୍କ ମଧ୍ୟରେ ସଚେତନତା ସୃଷ୍ଟି କରାଯାଉଛି। ବିଶେଷକରି ସ୍ବଚ୍ଛ ସର୍ବେକ୍ଷଣ ପ୍ରତିଯୋଗିତାକୁ ଲକ୍ଷ୍ୟ ରଖି ସହରର ସ୍ବଚ୍ଛତା ଉପରେ ଗୁରୁତ୍ୱ ଦିଆଯାଉଛି। ଏହି କ୍ଷେତ୍ରରେ ଡୋର୍-ଟୁ-ଡୋର ଅଳିଆ ସଂଗ୍ରହକୁ ଆହୁରି ବ୍ୟାପକ କରିବା ପାଇଁ ବିଏମ୍ସି ମାଷ୍ଟର ପ୍ଲାନ୍ ପ୍ରସ୍ତୁତ କରୁଛି। ପ୍ରତ୍ୟେକ ଦିନ ବିଏମ୍ସିର ସଫେଇ ଗାଡ଼ି ଘର ଘର ବୁଲି ଅଳିଆ ସଂଗ୍ରହ କରୁଥିଲେ ବି ତାହା ଶତ ପ୍ରତିଶତ ସଫଳ ହୋଇ ପାରିନାହିଁ। ତେଣୁ ଏହାକୁ କିଭଳି ଶତ ପ୍ରତିଶତ କାର୍ଯ୍ୟକାରୀ କରାଯିବ ଏବଂ ବାହାରେ କେଉଁଠାରେ ଅଳିଆ ପଡିବ ନାହିଁ ସେ ନେଇ କମିଶନର ବିଜୟ ଅମୃତା କୁଲାଙ୍ଗେ ନିର୍ଦ୍ଦେଶ ଦେଇଛନ୍ତି।
ସୋମବାର ବିଏମ୍ସି ମୁଖ୍ୟାଳୟରେ କମିଶନରଙ୍କ ଅଧ୍ୟକ୍ଷତାରେ ଏକ ବୈଠକ ଅନୁଷ୍ଠିତ ହୋଇଯାଇଛି। ଏଥିରେ ବିଏମ୍ସିରେ ନିୟୋଜିତ ସ୍ବଚ୍ଛ ସୁପରଭାଇଜର ଓ ଏନ୍ଜିଓଗୁଡ଼ିକ ସମୀକ୍ଷା କରାଯାଇଥିଲା। ସହରବାସୀ ଓଦା ଓ ଶୁଖିଲା ଅଳିଆ ପୃଥକ କରି ନିୟମିତ ଭାବେ ସଫେଇ ଗାଡ଼ିରେ ଦେଲେ ହିଁ ବାହାରେ ଅଳିଆ ପଡିବା ବନ୍ଦ ହୋଇ ପାରିବ। ତେବେ ଏଥିପାଇଁ କିଭଳି ଲୋକଙ୍କୁ ସଚେତନ କରାଯିବ ବା କେଉଁ ପଦ୍ଧତିରେ ଯୋଜନାର ସଫଳ ରୂପାୟନ ହୋଇ ପାରିବ ସେ ନେଇ ସ୍ବଚ୍ଛ ସୁପରଭାଇଜର, ଏନ୍ଜିଓ, ସାନିଟାରୀ ଇନ୍ସପେକ୍ଟର, ସାନିଟେଶନ୍ ଏକ୍ସପର୍ଟ, ଓ୍ବାର୍ଡ ଅଫିସର ସମସ୍ତେ ଟିମ୍ ଭାବେ କାମ କରି ଯଥାଶୀଘ୍ର ନିଜର ଷ୍ଟ୍ରାଟେଜି ରିପୋର୍ଟ ପ୍ରଦାନ କରିବେ। ଷ୍ଟ୍ରାଟେଜି ଅନୁଯାୟୀ ତାହାକୁ କାର୍ଯ୍ୟକାରୀ କରାଯିବ ବୋଲି ସୂଚନା ଦିଆଯାଇଛି। ବୈଠକରେ ଅତିରିକ୍ତ କମିଶନର (ପରିମଳ) ଶୁଭେନ୍ଦୁ ସାହୁ, ଡେପୁଟି କମିଶନର ମନୋରଞ୍ଜନ ସାହୁ, ଆସିଷ୍ଟାଣ୍ଟ କମିଶନର ମୃତ୍ୟୁଞ୍ଜୟ ମହାପାତ୍ର ପ୍ରମୁଖ ଉପସ୍ଥିତ ଥିଲେ।
