ଲଣ୍ଡନ,୨୩।୪ : କୋଟି କୋଟି ମୋବାଇଲରେ ଜରୁରୀକାଳୀନ ଆଲର୍ଟ ସିଷ୍ଟମ ବ୍ରିଟେନରେ ରବିବାର ଅପରାହ୍ନ ୩ଟାରେ ଯାଞ୍ଚ କରାଯିବ। ଏହି ସମୟରେ, ସମସ୍ତ ଫୋନରେ ଏକାସାଙ୍ଗରେ ଏକ ଆଲାର୍ମ ବାଜିବ। ସମାନ ଜରୁରୀକାଳୀନ ଆଲର୍ଟ ସିଷ୍ଟମ ଜାପାନ, କାନାଡା, ନେଦରଲାଣ୍ଡ ଏବଂ ଆମେରିକାରେ ମଧ୍ୟ ଅଛି। ଏହି ଜରୁରୀକାଳୀନ ଆଲର୍ଟ ସିଷ୍ଟମର ଉଦ୍ଦେଶ୍ୟ ହେଉଛି ଯଦି କୌଣସି ବିପଦ ଉପୁଜେ, ଲୋକଙ୍କୁ ଏହି ଆଲାର୍ମ ମାଧ୍ୟମରେ ସତର୍କ କରାଯିବ। ଯାହା ଦ୍ୱାରା ସେମାନେ ନିଜକୁ ରକ୍ଷା କରିପାରିବେ।
ଜରୁରୀକାଳୀନ ଆଲର୍ଟ ସିଷ୍ଟମର ପରୀକ୍ଷା ପାଇଁ ଲୋକଙ୍କୁ ପଠାଯାଇଥିବା ବାର୍ତ୍ତାରେ କୁହାଯାଇଛି ଯେ ଏହା ଏକ ଜରୁରୀକାଳୀନ ଆଲର୍ଟ ପରୀକ୍ଷା। ବ୍ରିଟେନ ସରକାରଙ୍କ ଏହି ନୂତନ ସେବା ମାଧ୍ୟମରେ ଲୋକଙ୍କୁ ବିପର୍ଯ୍ୟୟ କିମ୍ବା ଜରୁରୀକାଳୀନ ପରିସ୍ଥିତି ବିଷୟରେ ସୂଚନା ଦିଆଯିବ ଯାହା ଫଳରେ ଜୀବନ ଓ ସମ୍ପତ୍ତି ନଷ୍ଟ ହେବ ନାହିଁ। ବନ୍ୟା, ଅଗ୍ନିକାଣ୍ଡ ଇତ୍ୟାଦି ସମସ୍ୟା ସମୟରେ ଏହି ଆଲର୍ଟ ସିଷ୍ଟମ ବହୁତ ସାହାଯ୍ୟ କରିବ ।
ବ୍ରିଟେନ ସରକାରଙ୍କ ଏହି ପରୀକ୍ଷା ସମୟରେ ଫୋନ ସାଇଲେଣ୍ଟ ରହିଲେ ବି ଆଲାର୍ମ ବାଜିବ। ଏହି ସମୟରେ ବ୍ରିଟେନରେ ଚାଲିଥିବା କ୍ରୀଡା ଇଭେଣ୍ଟ ମଧ୍ୟ କିଛି ସମୟ ପାଇଁ ବାଧାପ୍ରାପ୍ତ ହେବ। ବିଶ୍ୱ ସ୍ନୁକର ଚାମ୍ପିୟନଶିପ ମଧ୍ୟ ସତର୍କ ସମୟରେ କିଛି ସମୟ ପାଇଁ ବନ୍ଦ ରଖାଯିବ। ଅନ୍ୟପକ୍ଷରେ, ଯେଉଁମାନେ ଜରୁରୀକାଳୀନ ଆଲାର୍ମ ନିଜ ଫୋନରେ ବଜାଇବାକୁ ଚାହୁଁନାହାଁନ୍ତି, ସେମାନଙ୍କୁ ରବିବାର ଅପରାହ୍ନ ୩ ଟାରେ ଫୋନ ବନ୍ଦ କରିବାକୁ ପରାମର୍ଶ ଦିଆଯାଇଛି।
ଏଥି ସହିତ ଏହି ଜରୁରୀକାଳୀନ ଆଲର୍ଟ ସିଷ୍ଟମକୁ ବିରୋଧ ମଧ୍ୟ ଆରମ୍ଭ ହୋଇଛି। କଞ୍ଜରଭେଟିବ ଦଳର ଅନେକ ନେତା ସରକାରଙ୍କ ପଦକ୍ଷେପ ଉପରେ ପ୍ରଶ୍ନ ଉଠାଇଛନ୍ତି ଏବଂ ସରକାରଙ୍କ ନିର୍ଦ୍ଦେଶକୁ ଉଲ୍ଲଂଘନ କରି ଫୋନ ବନ୍ଦ କରିବାକୁ ଲୋକଙ୍କୁ ନିବେଦନ କରିଛନ୍ତି। କିଛି ଲୋକ ଜରୁରୀକାଳୀନ ଆଲର୍ଟ ସିଷ୍ଟମକୁ ନୈନି ଷ୍ଟେଟ ବୋଲି କହୁଛନ୍ତି, ଯେଉଁଠାରେ ସାଧାରଣ ଲୋକଙ୍କ ପାଇଁ ସରକାର ଆବଶ୍ୟକତାଠାରୁ ଅଧିକ ଚିନ୍ତା କରିଥାନ୍ତି।
