ନୂଆଦିଲ୍ଲୀ,୧୮।୧୧: ସାମୟିକ ଭାବେ ବନ୍ଦ ହୋଇଛି ଲୋକପ୍ରିୟ ସୋସିଆଲ ମିଡିଆ ପ୍ଲାଟଫର୍ମ ଟୁଇଟରର ସମସ୍ତ କାର୍ଯ୍ୟାଳୟ। ନୂତନ ମାଲିକ ଏଲୋନ ମସ୍କ କମ୍ପାନୀରେ ଅନେକ ନିୟମ ଲାଗୁ କରିଛନ୍ତି। ଯେଉଁ କର୍ମଚାରୀମାନେ ନୂତନ ନିୟମ ପାଳନ କରିବାକୁ ମନା କରନ୍ତି ସେମାନେ କମ୍ପାନୀ ଛାଡ଼ି ପାରିବେ ବୋଲି ମସ୍କ କହିଛନ୍ତି। ଏହାକୁ ନେଇ ପ୍ରତିକ୍ରିୟା ପ୍ରକାଶ ପାଇବା ପରେ ବର୍ତ୍ତମାନ ଏହାର କାର୍ଯ୍ୟାଳୟ ବନ୍ଦ ରହିଥିବା ଜଣାପଡ଼ିଛି।
ନିକଟରେ ଟୁଇଟର କର୍ମଚାରୀଙ୍କୁ ମସ୍କ ୧୨ ଘଣ୍ଟା କାମ, ଓ୍ବାର୍କ ଫ୍ରମ୍ ହୋମ୍ ଶେଷ ହେବା ଭଳି ଅନେକ ନିୟମକୁ ନେଇ ଏକ ଇମେଲ୍ ପଠାଇଥିଲେ। ଗୁରୁବାର ସୁଦ୍ଧା ସାଇନ୍ ନ କଲେ ତିନି ମାସର ଦରମା ନେଇ କର୍ମଚାରୀ କମ୍ପାନୀ ଛାଡ଼ି ପାରିବେ ବୋଲି କୁହାଯାଇଥିଲା। ତେବେ ତାଙ୍କର ଏହି ଆଦେଶ ପରେ ଶହ ଶହ କର୍ମଚାରୀ ଟୁଇଟରରୁ ଇସ୍ତଫା ଦେଇଥିଲେ। ଏଥିନେଇ ମସ୍କ ଅନ୍ୟ ଏକ ଇମେଲ୍ରେ ସମସ୍ତ କାର୍ଯ୍ୟାଳୟକୁ ସାମୟିକ ଭାବେ ବନ୍ଦ କରି ନଭେମ୍ବର ୨୧ ଯାଏ ପ୍ରବେଶକୁ ସ୍ଥଗିତ ରଖିଛି।
କହିରଖୁଛୁ ଯେ, ମସ୍କ ଟୁଇଟରକୁ ଅଧିଗ୍ରହଣ କରିବା ପୂର୍ବରୁ ପ୍ରାୟ ୭୫୦୦ କର୍ମଚାରୀ ଏଥିରେ କାମ କରୁଥିଲେ। ହେଲେ ବହୁ ସଂଖ୍ୟାରେ କର୍ମଚାରୀଙ୍କ ଛଟେଇ ପରେ ଏହି ସଂଖ୍ୟା ପ୍ରାୟ ୫୦%କୁ ଖସି ଆସିଥିଲା। ଏବେ ବହୁ କର୍ମଚାରୀ କମ୍ପାନୀ ଛାଡ଼ିବା ପରେ ଏହି ସଂଖ୍ୟା ଆହୁରି ହ୍ରାସ ପାଇଛି।
