କଟକ ଅଫିସ,୯।୬: ନରସିଂହପୁରରେ ହାତୀକୁ ଗୁଳିମାଡ଼ ଘଟଣାକୁ ନେଇ ହାଇକୋର୍ଟରେ ମାମଲା ରୁଜୁ ହୋଇଛି । ଆଇନରେ ଶିକାରୀଙ୍କୁ କଠୋର ଦଣ୍ଡ ଦେବାର ବ୍ୟବସ୍ଥା ନ ଥିବାରୁ ଦିନକୁ ଦିନ ହାତୀ ଶିକାର ବଢି ଚାଲିଛି । ତେଣୁ ହାତୀଙ୍କ ସୁରକ୍ଷା ପାଇଁ ଆସାମ ଭଳି ଓଡ଼ିଶାରେ କଠୋର ଆଇନ ପାଇଁ ସାନି ବିଜ୍ଞପ୍ତି ଜାରି କରାଯାଉ ବୋଲି ପ୍ରାର୍ଥନା କରି କଟକର ସାମାଜିକ କର୍ମୀ ଗୀତା ରାଉତ ଏହି ମାମଲା ରୁଜୁ କରିଛନ୍ତି।
ଓଡ଼ିଶାରେ ହାତୀଙ୍କର ଶିକାର ନଚେତ ରେଳଲାଇନ୍ ଧାରଣାରେ କଟି ମୃତ୍ୟୁ ଭଳି ଅଘଟଣ ନିତିଦିନିଆରେ ପରିଣତ ହୋଇଛି । ଯଦି ବନ୍ୟପ୍ରାଣୀ ସୁରକ୍ଷା ଆଇନ-୧୯୭୨କୁ କଠୋର କରା ନ ଯାଏ ତାହେଲେ ହାତୀ ଶିକାର ହ୍ରାସ ପାଇବ ନାହିଁ । ଆସାମରେ ହାତୀ ଶିକାରକୁ ରୋକିବ ପାଇଁ ସେଠାକାର ସରକାର ୨୦୧୦ ଅକ୍ଟୋବର ୨୦ ଏକ ସଂଶୋଧିତ ବିଜ୍ଞପ୍ତି ଜରିଆରେ କଠୋର ଆଇନ ଲାଗୁ କରିଛନ୍ତି । ଯେଉଁଥିରେ ଜରିମାନା ଓ ଜେଲ ଦଣ୍ଡକୁ ଅଧିକ ପ୍ରଭାବଶାଳୀ କରାଯାଇଛି । ଏପରିକି ପୁନର୍ବାର ସମାନ ଅପରାଧ କରୁଥିବା ଅଭିଯୁକ୍ତମାନଙ୍କୁ ଆଜୀବନ ଜେଲ ଦଣ୍ଡ ମଧ୍ୟ ଦିଆଯିବାର ବ୍ୟବସ୍ଥା ରହିଛି । କେବଳ ସେତିକି ନୁହେଁ, ଆସାମର ପ୍ରତି ନିମ୍ନ ଅଦାଲତରେ ବନ୍ୟପ୍ରାଣୀ ସଂକ୍ରାନ୍ତ ସମସ୍ତ ମାମଲାରେ ପ୍ରାଥମିକତା ଭିତ୍ତିରେ ଶୁଣାଣି କରାଯାଉଛି । ସେହି ଆଧାରରେ ପଦକ୍ଷେପ ପାଇଁ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେବାକୁ ଆବେଦନକାରିଣୀ ଗୀତା ତାଙ୍କ ପିଟିସନ୍ରେ ଉଲ୍ଲେଖ କରିଛନ୍ତି।
ପ୍ରକାଶ ଯେ, ଆଠଗଡ ବନଖଣ୍ଡ ଅନ୍ତର୍ଗତ ନରସିଂହପୁର ପୂର୍ବ ବନାଞ୍ଚଳ ଜୟପୁର ସେକ୍ସନରେ ଗୁଳି ମାଡ଼ ପରେ ଏକ ଦନ୍ତା ଜଙ୍ଗଲ ଭିତରେ ଥିବା ନାଳରେ ପଡ଼ି ରହିଥିଲା। ନାଳରୁ ଉଠିବାକୁ ଚେଷ୍ଟା କରୁଥିଲେ ହେଁ ହାତୀଟି ନାଳରୁ ଉଠି ପାରୁ ନ ଥିଲା। ଏନେଇ ବଡ଼ମ୍ବା ବିଧାୟକ ଦେବୀ ପ୍ରସାଦ ମିଶ୍ର ଫେସବୁକ୍ରେ ପୋଷ୍ଟ କରିଥିଲେ। ଦନ୍ତାର ତୁରନ୍ତ ଚିକିତ୍ସା ପାଇଁ ଜଙ୍ଗଲ ଓ ପରିବେଶ ମନ୍ତ୍ରୀ ପ୍ରଦୀପ ଅମାତଙ୍କୁ ଅନୁରୋଧ କରି ଥିଲେ ।
