ବଣାଇଁ,୨ା୨(ପ୍ରଦୀପ ତ୍ରିପାଠୀ): ବଣାଇଁ ବନଖଣ୍ଡର ତାମଡ଼ା ବନାଞ୍ଚଳରେ ୨୩ ଟିକିଆ ହାତୀପଲ ରାତିଦିନ ଘୂରି ବୁଲୁଛନ୍ତି। ଏହା ଭିତରୁ ଏକ ଗୋଠଛଡ଼ା ଦନ୍ତା କେତେବେଳେ ଗାଁ ଭିତରେ ତ କେତେବେଳେ ଗାଁ ଜମିରେ ଘୂରି ବୁଲୁଛି।
ସବୁଠୁ ଆଶ୍ଚର୍ଯ୍ୟଜନକ କଥା ହେଲା ଦନ୍ତା ସହ ଲୋକେ ସେଲ୍ଫି ନେବାକୁ ବି ପଛାଉ ନାହାନ୍ତି। ଅପରପକ୍ଷରେ ରାତିରେ ଗାଁ ମୁହାଁ ୨୩ ଟିକିଆ ହାତୀପଲ ଘର ଭାଙ୍ଗୁଥିବା, ଘରେ ଗଚ୍ଛିତ ଧାନ ଚାଉଳ ବୋହି ନେଇ ନଷ୍ଟ କରିବା ଆତଙ୍କରେ ଅଞ୍ଚଳବାସୀଙ୍କ ନିଦ ହଜି ଯାଇଛି। ପରିଣାମ ସ୍ବରୂପ ଭୟ ଭିତରେ ତାମଡା ବନାଞ୍ଚଳର ପ୍ରାୟ ୮ରୁ ୧୦ ଟି ଗ୍ରାମ ଯଥା ରୁଷିମଠ, କଣ୍ଟାପାଲି, ବ କୋଇଲିଝର, ଢ଼ିଙ୍କିଆମ, ପୁରୁଣାପାଣି ଇତ୍ୟାଦିର ଗ୍ରାମବାସୀ ଦିନ କାଟୁଛନ୍ତି। ଆଜିକୁ ୮ ଦିନ ହେଲାଣି ଏହି ବନାଞ୍ଚଳରେ କେତେବେଳେ ଗୋଟିକିଆ ଦନ୍ତା ତ କେତେବେଳେ ୨୩ ଟିକିଆ ହାତୀପଲ ଉତ୍ପାତ ଚଳାଇ ଆସୁଥିଲେ ହେଁ ବନବିଭାଗ ଘଉଡ଼ାଇବା କ୍ଷେତ୍ରରେ ବିଫଳ ରହୁଛି। ହାତୀ ଘଉଡ଼ାଇବା ପାଇଁ ବନବିଭାଗ ଓ ଗ୍ରାମବାସୀ ମିଳିତ ଭାବେ ପ୍ରଚେଷ୍ଟା କଲେ ମଧ୍ୟ ବ୍ୟାପକ କ୍ଷୟକ୍ଷତି ଘଟିବା ଓ ଜୀବନ ପ୍ରତି ବିପଦ ସୃଷ୍ଟି ହୋଇଥିବା ନେଇ ଅସନ୍ତୋଷ ବୃଦ୍ଧି ପାଇ ଚାଲିଛି।
ଦୁଇଦିନ ତଳେ ସମ୍ପୃକ୍ତ ଅଞ୍ଚଳରେ ଉତ୍ପାତ ଚଳାଇଥିବା ୧୨ ଟିକିଆ ହାତୀପଲରେ ଆଉ ୧୧ଟି ହାତୀ ମିଶି ଏବେ ୨୩ ଟିକିଆ ଦଳରେ ପରିଣତ ହୋଇ ତାଣ୍ଡବ ଜାରି ରଖିଛନ୍ତି। ଅନୁରୂପ ଭାବେ ଏକ ଗୋଟିକିଆ ଗୋଠଛଡ଼ା ଦନ୍ତା ଦିନରେ ଗୃହପାଳିତ ପ୍ରାଣୀ ଭଳି ଗାଁ ଦାଣ୍ଡରେ ଘୂରି ବୁଲୁଥିବା ଦେଖାଯାଇଛି। ରାତି ଅନିଦ୍ରା ଗ୍ରାମବାସୀଙ୍କ ଧନଜୀବନ ଆଶଙ୍କା ଓ ଶାନ୍ତ ଦନ୍ତା ସହିତ ସେଲ୍ଫି ଉଠା ଘଟଣା କ୍ରମରେ ବୁଦ୍ଧିଜୀବୀ କାହାପାଇଁ ମଜା ଆଉ କାହାପାଇଁ ସଜା ବୋଲି ମତ ଦେଇ ତୁରନ୍ତ ପ୍ରତୀକାତ୍ମକ ବ୍ୟବସ୍ଥା ବନବିଭାଗ ଗ୍ରହଣ କରୁ ବୋଲି ଦାବି କରିଛନ୍ତି।