ଦିଗପହଣ୍ଡି,୨।୧(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ବନ ବିଭାଗ ରେଞ୍ଜ ପାଟପୁର ସେକ୍ସନ ଗଙ୍ଗାପୁର ପଞ୍ଚାୟତ ପ୍ରଥମ ଢେପାଗୁଡ଼ା ଗାଁ ନିକଟ ଆଖୁବାଡରେ ଖଞ୍ଜା ଯାଇଥିବା ବିଦ୍ୟୁତ ତାର ଫାସରେ ଲାଗି ଏକ ମାଈ ହାତୀର ମୃତ୍ୟୁଘଟିଛି। ଗୁରୁବାର ଭୋରରେ ଘଟଣା ପ୍ରଘଟ ହେବାପରେ ହାତୀ ଦେଖିବାକୁ ଲୋକଙ୍କ ଭିଡ଼ ଜମିଥିଲା। ଖବରପାଇ ବ୍ରହ୍ମପୁର ଆଞ୍ଚଳିକ ବନ ସଂରକ୍ଷକ ସଞ୍ଜୟ କୁମାର ସ୍ବାଇଁ, ଡିଏଫଓ ସୋନି ଖୋକ୍କର , ଦିଗପହଣ୍ଡି ରେଞ୍ଜର ଦିବ୍ୟରଞ୍ଜନ ସାହୁ, ବନବିଭାଗ ସାଇଣ୍ଟିଫିକ ଟିମ, ପାଟପୁର ପୋଲିସ, ବିଦ୍ୟୁତ ବିଭାଗ ଅଧିକାରୀ ବୃନ୍ଦ ଏବଂ ପ୍ରାଣୀ ଚିକିତ୍ସକ ଟିମ ଘଟଣାସ୍ଥଳରେ ପହଞ୍ଚି ତଦନ୍ତ କରିଥିଲେ। ପ୍ରଥମ ଢେପାଗୁଡ଼ା ଗ୍ରାମର ଟୁନା ମଲ୍ଲିକ ତାଙ୍କ ଜମିରେ ଆଖୁ ଚାଷ କରିଛନ୍ତି। ବାର୍ହା ପଲ ଚାଷ ନଷ୍ଟ କରୁଥିବାରୁ ବାରହା ଶିକାର ଉଦ୍ଦେଶ୍ୟରେ ସେ ଜମି ଚାରି ପାଖରେ ବିଦ୍ୟୁତ୍ ତାର ସଂଯୋଗ କରିଥିଲେ। ହାତୀଟି ଏହି ଉଚ୍ଚ ଶକ୍ତି ସମ୍ପନ୍ନ ବିଦ୍ୟୁତ ତାର ସଂସ୍ପର୍ଶରେ ଆସିବାରୁ ଘଟଣାସ୍ଥଳରେ ମୃତ୍ୟୁବରଣ କରିଥିବା ବେଳେ ହାତୀର ବୟସ ପ୍ରାୟ ୨୫ ବର୍ଷ ବୋଲି ବନବିଭାଗର ପ୍ରାଥମିକ ତଦନ୍ତରୁ ଜଣାପଡ଼ିଛି। ଘଟଣାସ୍ଥଳରୁ ବନବିଭାଗ ପକ୍ଷରୁ ବିଦ୍ୟୁତ ତାର ଜବତ କରାଯାଇଛି। ପ୍ରାଣୀ ଚିକିତ୍ସକ ଟିମ ଘଟଣାସ୍ଥଳରେ ମୃତ ହାତୀର ବ୍ୟବଚ୍ଛେଦ ପରେ ତାକୁ ନିକଟସ୍ଥ ଜଙ୍ଗଲ ଜମିରେ ପୋତି ଦିଆଯାଇଥିବା ଜଣାପଡିଛି। ଗତ କିଛିବର୍ଷ ହେଲା ନିକଟସ୍ଥ ରତନେଇ ସଂରକ୍ଷିତ ଜଙ୍ଗଲରେ ଗୋଟିଏ ଦନ୍ତାହାତୀ ସମେତ ୫ ଟିକିଆ ହାତୀପଲ ରହୁଛନ୍ତି। ଖାଦ୍ୟ ଅନ୍ବେଷଣରେ ବିଭିନ୍ନ ସମୟରେ ବିଶେଷକରି ଧାନ ଫସଲ ଅମଳ ସମୟରେ ହାତୀପଲ ଧାନ ଖାଇବାକୁ ଜନବସତି ଆଡ଼କୁ ମାଡ଼ି ଆସୁଛନ୍ତି। ଢେପାଗୁଡ଼ା ଗ୍ରାମ ନିକଟ ଜଙ୍ଗଲରେ ବାର୍ହା ଶିକାର ପାଇଁ ବିଦ୍ୟୁତ ତାର ସଂଯୋଗ କରାଯାଉଥିବା ନେଇ ପୂର୍ବରୁ କିଛିବ୍ୟକ୍ତି ବନବିଭାଗ କର୍ମଚାରୀଙ୍କ ନିକଟରେ ଅଭିଯୋଗ କରି ଆସୁଥିଲେ ମଧ୍ୟ ବନ କର୍ମଚାରୀ ମାନେ ସେଥିପ୍ରତି ଧ୍ୟାନ ଦେଉନଥିବାରୁ ଏଭଳି ଅଘଟଣ ଘଟିଲା ବୋଲି ସ୍ଥାନୀୟ ଗ୍ରାମବାସୀ ଅଭିଯୋଗ କରିଛନ୍ତି।
