ଭଞ୍ଜନଗର,୧୫।୩(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର ଘୁମୁସର ଉତ୍ତର ବନଖଣ୍ଡ ତାରସିଂ ରେଞ୍ଜର ନାରାୟଣପ୍ରସାଦ ରାସ୍ତା କଡ ଜଙ୍ଗଲରେ ଏକ ହାତୀ ମୃତ୍ୟୁ ବରଣ କରିଥିବା ଖବର ଶନିବାର ରାତିରେ ଲୋକ ଲୋଚନକୁ ଆସିଛି। ଖବରପାଇ ବନ ବିଭାଗ କର୍ମଚାରୀ ରବିବାର ସକାଳେ ଘଟଣାସ୍ଥଳରେ ପହଞ୍ଚି ଘଟଣାର ତଦନ୍ତ ଆରମ୍ଭ କରିଛନ୍ତି। ଏଥିସହ ଜେଟିଏଫଟିମ୍ ଭୁବନେଶ୍ୱରରୁ ଆସି ପହଞ୍ଚିବା ପରେ ହାତୀର ବ୍ୟବଚ୍ଛେଦ ପ୍ରକ୍ରିୟା ଚାଲିଛି। ହାତୀଟି କେଉଁଭଳି ପରିସ୍ଥିତିରେ ମୃତ୍ୟୁବରଣ କରିଛି ସେନେଇ ସଠିକ କିଛି ଜଣାପଡ଼ିନାହିଁ। ୫ ଦିନ ପୁର୍ବରୁ ହାତୀଟି ମୃତ୍ୟୁବରଣ କରିଥିବା ଆଶଙ୍କା କରାଯାଉଛି।
ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର ସଠିକ କାରଣ ଜଣାପଡିବ ବୋଲି ବିଭାଗ ସୂତ୍ରରୁ ଜଣାପଡ଼ିଛି।
ଡିଏଫଓ ହିମାଂଶୁ ଶେଖର ମହାନ୍ତି ଘଟଣାସ୍ଥଳରେ ରହି ଘଟଣାର ଟିକିନିଖି ଯାଞ୍ଚ କରୁଛନ୍ତି। ଅପରପକ୍ଷେ ବିଗତ କିଛି ବର୍ଷ ହେବ ଏହି ବନଖଣ୍ଡରେ ଏକାଧିକ ହାତୀଙ୍କ ମୃତ୍ୟୁ ଘଟିଛି। କେଉଁଠି ବିଦ୍ୟୁତ୍ ଆଘାତରେ ହାତୀ ମରୁଚି ତ ଆଉ କେଉଁଠି ଶିକାରୀ ଗୁଳିରେ ହାତୀ ମରୁଛି। ଏଥିସହ କିଛି ହାତୀ ସ୍ବଭାବିକ ଭାବେ ମୃତ୍ୟୁବରଣ କରୁଛନ୍ତି।
ପରେ ବିଭାଗ ପକ୍ଷରୁ ଘଟଣାର ତଦନ୍ତ କରାଯାଇ ଦୋଷୀ ବିରୋଧରେ କାର୍ଯ୍ୟନୁଷ୍ଠାନ ନିଆଯାଉଛି। ମାତ୍ର ଟାଟା ପାୱାର କିମ୍ବା ବନ କର୍ମଚାରୀଙ୍କ ଅବହେଳା ପାଇଁ କାହା ବିରୋଧରେକାର୍ଯ୍ୟନୁଷ୍ଠାନ ନିଆଯାଉନାହିଁ । ଏହିଭଳି ପରିସ୍ଥିତିରେ ଆଉ ଏକ ହାତୀ ମରିଛି। ହାତୀଟି ସ୍ବଭାବିକ ମରିଛି ନା କିଏ ତାକୁ ମାରିଛି ବ୍ୟବଚ୍ଛେଦ ରିପୋର୍ଟ ଆସିବା ପରେ ଜଣାପଡ଼ିବ। ଏହା ପୂର୍ବରୁ ହାତୀ ମୃତ୍ୟୁନେଇ ନାନା ପ୍ରକାର ଆଲୋଚନା ହେଉଛି। ଡିଏଫଓ ହିଂମାଶୁ ଶେଖର ମହାନ୍ତି, ଏସିଏଫ ବିବେକ ଦାସ, ବିମଳ ପ୍ରସାଦ ପ୍ରଧାନ, ମୁଜାଗଡ ରେଞ୍ଜର ବିମ୍ବାଧର ସାହୁ, ତାର ସିଂ ରେଞ୍ଜର ପ୍ରଶାନ୍ତ କୁମାର ବେହେରା ପ୍ରମୁଖ ଘଟଣାସ୍ଥଳରେ ପହଞ୍ଚି ଘଟଣାର ତଦନ୍ତ ଚଳାଇଛନ୍ତି।
Dharitri – Odisha’s No.1 Odia Daily