ପାଟଣା,୨୯। ୧୨(ବୀର କିଶୋର ଦାଶ): କେନ୍ଦୁଝର ଜିଲା ପାଟଣା ରେଞ୍ଜରେ ୨୩ ଟିକିଆ ହାତୀପଲଙ୍କ ଉପଦ୍ରବ ଏକ ସପ୍ତାହ ହେଲା ଜାରି ରହିଛି । ହାତୀପଲ ଗତ ରବିବାର ସାହିର ମିଥୁନ ମହାନ୍ତଙ୍କ ୩ ବଖରା ଘର ଭାଙ୍ଗି ଧାନ, ଚାଉଳ ଖାଇ ଦେଇଥିଲେ। ଗୁରୁବାର ରାତିରେ ପୁଣି ମିଥୁନଙ୍କ ୨ବଖରା ଘର ଭାଙ୍ଗିବା ସହ ୩ ମରେଇ ଧାନ ଓ ୨ ବସ୍ତା ଚାଉଳ ଖାଇବା ସହ ଘର ଭାଙ୍ଗି ଚୁର୍ମାର କରିଛନ୍ତି। ପରିବାର ଲୋକେ ଭୟରେ ଘର ଛାଡି ଅନ୍ୟତ୍ର ଆଶ୍ରୟ ନେଇଛନ୍ତି।
ଏଥିସହ ହାତୀପଲ ସରାସ କୋଲା ଗ୍ରାମ ଜିଆଣି ସାହିରେ ମନୁ ଦେହୁରୀଙ୍କ ଘର ଭାଙ୍ଗି ଘର ଭିତରୁ ହାଣ୍ଡିଆ ଖାଇଦେଇଛନ୍ତି। ହାତୀପଲଙ୍କ ଉପଦ୍ରବରେ ଏବେ ଅଞ୍ଚଳବାସୀ ଆତଙ୍କିତ ଅବସ୍ଥାରେ ରହିଛନ୍ତି। ଏବେ ହାତୀପଲ ୨ ଭାଗ ହୋଇ ମଙ୍ଗଳପୁର ଏବଂ ଝାଟିପଡା ଗାଁ ନିକଟରେ ଥିବା ଜଙ୍ଗଲରେ ଡେରା ପକାଇଛନ୍ତି। ବନ ବିଭାଗ ହାତୀପଲଙ୍କୁ ଘଉଡାଇବାରେ ବିଫଳ ହେଉଥିବାରୁ ଜନ ଅସନ୍ତୋଷ ବୃଦ୍ଧି ପାଇବାରେ ଲାଗିଛି।
