ଭୁବନେଶ୍ୱର,୪ା୯ (ରବିନାରାୟଣ ଜେନା): ରାଜ୍ୟରେ ବିଦ୍ୟୁତ୍ ସେବାରେ ଖୁବ୍ଶୀଘ୍ର ସଂସ୍କାର ଆସିବ। ଏନେଇ ଓଡ଼ିଶା ବିଦ୍ୟୁତ୍ ନିୟାମକ ଆୟୋଗ(ଓଇଆର୍ସି)ଙ୍କ ପକ୍ଷରୁ ଏକ ଚିଠା ବିଜ୍ଞପ୍ତି ଜାରି ହୋଇଛି। ସେଥିରେ ସେପ୍ଟେମ୍ବର ୨୨ ସୁଦ୍ଧା ରାଜ୍ୟର ପ୍ରାୟ ୧କୋଟି ଉପଭୋକ୍ତାଙ୍କଠାରୁ ସୁଚିନ୍ତିତ ମତାମତ ଲୋଡ଼ାଯାଇଛି। ତେବେ ଓଇଆର୍ସି ପକ୍ଷରୁ ଜାରି ବିଜ୍ଞପ୍ତିରେ ବହୁ ଗୁରୁତ୍ୱପୂର୍ଣ୍ଣ କଥା ରହିଛି। ବିଦ୍ୟୁତ୍ ସେବା ବ୍ୟାହତ କ୍ଷେତ୍ରରେ ଉପଭୋକ୍ତା ଯଦି ଫୋନ୍ କରୁଛନ୍ତି, ତେବେ ୩ ମିନିଟ୍ ମଧ୍ୟରେ ବିଦ୍ୟୁତ୍ ବଣ୍ଟନକାରୀ ସଂସ୍ଥା ପକ୍ଷରୁ ତା’ର ପ୍ରତିଜବାବ ତଥା ରେସ୍ପଣ୍ଡ କରାଯିବାକୁ ରହିଛି। ଯଦି ଏହି ସମୟ ମଧ୍ୟରେ ବିଦ୍ୟୁତ୍ ବଣ୍ଟନକାରୀ ସଂସ୍ଥା ରେସ୍ପଣ୍ଡ ନ କରନ୍ତି ତେବେ ଜରିମାନା ହେବେ। ସେହିପରି ୫ ମିନିଟ୍ ମଧ୍ୟରେ ଯଦି ଅଭିଯୋଗଟି
ପଞ୍ଜୀକରଣ ନ ହେବ, ତେବେ ବିଦ୍ୟୁତ୍ ବଣ୍ଟନକାରୀ ସଂସ୍ଥା ଦଣ୍ଡିତ ହେବାକୁ ରହିଥିବାବେଳେ ଗ୍ରାମାଞ୍ଚଳ ଉପଭୋକ୍ତାଙ୍କ ପାଇଁ ନୂତନ ବିଦ୍ୟୁତ୍ ସଂଯୋଗ ଆବେଦନ କ୍ଷେତ୍ରରେ ୩ ଦିନ ଏବଂ ସହରାଞ୍ଚଳ ଓ ମହାନଗର ନିଗମରେ ୩ରୁ ୧୫ ଦିନ ଦିନ ମଧ୍ୟରେ ବିଦ୍ୟୁତ୍ ସଂଯୋଗ କରିବାକୁ ବିଜ୍ଞପ୍ତିରେ ଦର୍ଶାଯାଇଛି। ଅନୁରୂପ ଭାବେ ବିଦ୍ୟୁତ୍ ବିଚ୍ଛିନ୍ନ ଓ ମିଟରଜନିତ ସମସ୍ୟା କ୍ଷେତ୍ରରେ ୩ ଦିନରେ ତା’ର ସମାଧାନ କରିବାକୁ କୁହାଯାଇଛି।
ଦୀର୍ଘ ୨୧ ବର୍ଷ ପରେ ବିଦ୍ୟୁତ୍ ବିତରଣ କମ୍ପାନୀଗୁଡ଼ିକ ପାଇଁ ପ୍ରଣିତ ହୋଇଥିବା କାର୍ଯ୍ୟଦକ୍ଷତା ମାନଦଣ୍ଡ ଅଧିନିୟମ-୨୦୦୪କୁ ରଦ୍ଦକରି ନୂତନ କାର୍ଯ୍ୟଦକ୍ଷତା ମାନଦଣ୍ଡ ଅଧିନିୟମ-୨୦୨୫ ପ୍ରସ୍ତୁତ କରାଯାଇଛି। ତେବେ ସଂପ୍ରତି ଟାଟା ବିତରଣ କମ୍ପାନୀଗୁଡ଼ିକ ପାଇଁ ମାନଦଣ୍ଡକୁ ପାଳନ କରିବା ବାଧ୍ୟତାମୂଳକ ରହିବ। ଯଦି ଆବଣ୍ଟନ କମ୍ପାନୀଗୁଡ଼ିକ ଆୟୋଗ ଧାର୍ଯ୍ୟ କରିଥିବା ମାନଦଣ୍ଡକୁ ପାଳନ କରିବାରେ ବିଫଳ ହୁଅନ୍ତି, ତେବେ ସେମାନେ ଉପଭୋକ୍ତାଙ୍କୁ କେତେ କ୍ଷତିପୂରଣ ଓ କେଉଁ ସମୟ ଅବଧିରେ ପଇଠ କରିବେ ତାହା ମଧ୍ୟ ଉଲ୍ଲେଖ ରହିଛି।
ଓଡ଼ିଶା ବିଦ୍ୟୁତ୍ ସେବାରେ ନିୟୋଜିତ ବିତରଣ କମ୍ପାନୀଗୁଡ଼ିକର କାର୍ଯ୍ୟଦକ୍ଷତା ମାନଦଣ୍ଡ ଅଧିନିୟମ, ଯାହାକି ଉପଭୋକ୍ତାଙ୍କୁ ନିରବଚ୍ଛିନ୍ନ ଓ ଗୁଣାତ୍ମକ ମାନର ବିଦ୍ୟୁତ୍ସେବା ଯୋଗାଇବାର ଏକ ପ୍ରମୁଖ କାର୍ଯ୍ୟପ୍ରକ୍ରିୟାକୁ ଏପର୍ଯ୍ୟନ୍ତ ଆୟୋଗ ଠିକ୍ ଭାବେ ଗୁରୁତ୍ୱ ଦେଇ ନ ଥିଲେ। ଏହାର ସଂଶୋଧନ ନିମନ୍ତେ ପୂର୍ବ ସରକାର ସମୟରେ ଆୟୋଗଙ୍କ ପାଖରେ ବାରମ୍ବାର ଅଭିଯୋଗ ହୋଇଥିଲେ ହେଁ ଆୟୋଗ କର୍ଣ୍ଣପାତ କରି ନ ଥିଲେ। ତେବେ ଆୟୋଗ ଏବେ ନିଜଆଡୁ କେସ୍ ଦାଏର କରି ଟାଟା ବିତରଣ କମ୍ପାନୀଗୁଡ଼ିକର କାର୍ଯ୍ୟଦକ୍ଷତା ସମୀକ୍ଷା କରିବା ପାଇଁ କାର୍ଯ୍ୟକ୍ରମ ହାତକୁ ନେଇଛନ୍ତି। ତେବେ ଚିଠା ବିଜ୍ଞପ୍ତି ମାନଦଣ୍ଡରେ ଗ୍ରାମାଞ୍ଚଳ ଉପଭୋକ୍ତାଙ୍କ କ୍ଷେତ୍ରରେ କେତେକ କ୍ଷେତ୍ରରୁ ଅବହେଳା କରାଯାଇଥିବା ନେଇ ପ୍ରଶ୍ନ ଉଠିଛି। ଆୟୋଗ ଧାର୍ଯ୍ୟ କରିଥିବା କ୍ଷତିପୂରଣ ଜରିମାନା ଭାରତର ଅନ୍ୟ ଆୟୋଗଗୁଡ଼ିକ ଧାର୍ଯ୍ୟ କରିଥିବା ଜରିମାନାଠାରୁ ବହୁତ୍ କମ୍ ରହିଛି। ମାସକୁ କେତେଘଣ୍ଟା ବିଦ୍ୟୁତ୍ ଯୋଗାଣ ହେଉଛି ଓ କେତେଥର ବ୍ୟାହତ ହେଉଛି ତା’ର ତଥ୍ୟ ମାସିକ ବିଲ୍ରେ ଉପଭୋକ୍ତାଙ୍କୁ ଦେବା ପାଇଁ ମାନଦଣ୍ଡରେ ଆୟୋଗ ଦର୍ଶାଇ ନାହାନ୍ତି। ଏଥିପ୍ରତି ଆୟୋଗ ପରବର୍ତ୍ତୀ ଚୂଡ଼ାନ୍ତ ବିଜ୍ଞପ୍ତିରେ ଦୃଷ୍ଟିଦେବାକୁ ଶକ୍ତି ସମୀକ୍ଷକ ଆନନ୍ଦ ମହାପାତ୍ର କହିଛନ୍ତି।