ନୂଆଦିଲ୍ଲୀ,୨୭।୩: ବିଗତ କିଛି ବର୍ଷ ହେବ ଭାରତୀୟ ଅଟୋଶିଳ୍ପରେ ଇଲେକ୍ଟ୍ରି ଭେଇକିଲ (ଇଭି)ର ଚାହିଦା ବୃଦ୍ଧି ପାଇଚାଲିଛି। ଏପରିକି ଉଭୟ କେନ୍ଦ୍ର ଓ ରାଜ୍ୟ ସରକାର ମଧ୍ୟ ଉଭୟ ଇଭି ନିର୍ମାତା ଓ ଗ୍ରାହକଙ୍କୁ ବିଭିନ୍ନ ପ୍ରକାରର ସୁବିଧା ପ୍ରଦାନ କରୁଛନ୍ତି। ଫଳରେ ଇଭି ଯାନର ଚାହିଦା ପ୍ରତି ବର୍ଷ ବଢ଼ିଚାଲିଛି। ବିଶେଷକରି ପରିବେଶ ସୁରକ୍ଷା ଓ ତୈଳ ଦର ବୃଦ୍ଧି ଯୋଗୁ ଇଭି ବଜାରରେ ଚାହିଦା କ୍ରମାଗତ ଭାବେ ବୃଦ୍ଧି ପାଉଛି। ସେହିଭଳି ୨୦୨୩-୨୪ ଆର୍ଥିକ ବର୍ଷରେ ଇଭି ଚାହିଦା ବଢିବା ସହ ବିକ୍ରି ମଧ୍ୟ ବୃଦ୍ଧି ପାଇବ ବୋଲି ବଜାର ବିଶେଷଜ୍ଞମାନେ ଆକଳନ କରିଛନ୍ତି।
ଏପରିକି ଚଳିତ ଆର୍ଥିକ ବର୍ଷ ଅପେକ୍ଷା ଆସନ୍ତା ଆର୍ଥିକ ବର୍ଷରେ ଏହି ସଂଖ୍ୟା ୨ ମିଲିୟନ ଅତିକ୍ରମ କରିବ ବୋଲି ଆଶା କରାଯାଉଛି। ବିଶେଷକରି ବର୍ତ୍ତମାନର ଇଭି ଚାହିଦା ଓ ଆଗାମୀ ଦିନର ବଜାରକୁ ଲକ୍ଷ୍ୟ ରଖି ଦେଶର ପ୍ରମୁଖ ଇଭି ନିର୍ମାତାମାନେ ସବୁ ବର୍ଗର ଇଭି ମଡେଲ ବଜାରକୁ ଛାଡିବାକୁ ଆଗ୍ରହ ପ୍ରକାଶ ସହ ପ୍ରୟାସ ଜାରି ରଖିଛନ୍ତି। ସେହିପରି ଫାଷ୍ଟର ଆଡପସନ ଆଣ୍ଡ ମାନୁଫାକ୍ଚରିଙ୍ଗ ଅଫ ଇଲେକ୍ଟ୍ରି ଭେଇକିଲ୍ସ (ଏଫଏଏମଇ)-୨ ପ୍ରୋଗାମ ଜରିଆରେ ଉକ୍ତ ପ୍ରକ୍ରିୟା ଦ୍ରୁତ ଅଗ୍ରଗତି କରୁଛି। ଏପରିକି ଖୁବଶୀଘ୍ର ଉକ୍ତ ପ୍ରକ୍ରିୟା ଶେଷ ହେବାକୁ ଯାଉଥିବା ବେଳେ ଇଭି ନିର୍ମାତାମାନେ ମଧ୍ୟ ସେମାନଙ୍କର ଆଗାମୀ କାର୍ଯ୍ୟଧାରା ବିଷୟରେ ଯୋଜନା କରୁଥିବା ଜଣାପଡିଛି।
ଅପରପକ୍ଷରେ ଇଭିଗୁଡିକର ଖୁଚୁରା ବିକ୍ରୟ ୨୦୨୨-୨୩ ଆର୍ଥିକ ବର୍ଷରେ ୧.୧୧ ମିଲିୟନ ୟୁନିଟ୍ ଅତିକ୍ରମ କରିସାରିଛି। ଯାହା ମୋଟ ଅଟୋମୋବାଇଲ୍ ବିକ୍ରିର ୫%ରୁ ଅଧିକ। ବିଶେଷ କରି ୨୦୨୧-୨୨ ଆର୍ଥିକ ବର୍ଷରୁ ୧୪୭% ଅଭିବୃଦ୍ଧି କରିଥିବା ଜଣାପଡିଛି। ଏପରିକି ସରକାରଙ୍କ ବାହାନ ୱେବ୍ସାଇଟରେ ଉଲ୍ଲେଖ କରାଯାଇଥିବା ତଥ୍ୟ ଅନୁଯାୟୀ ୨୦୨୨-୨୩ ଆର୍ଥିକ ବର୍ଷରେ ଦେଶର ସମସ୍ତ ଆଞ୍ଚଳିକ ପରିବହନ କାର୍ଯ୍ୟାଳୟରେ ପ୍ରାୟ ୧.୧ ମିଲିୟନ ଇଭି ପଞ୍ଜୀକୃତ ହୋଇଥିବା ସୂଚନା ମିଳିଛି। ଉଲ୍ଲେଖଯୋଗ୍ୟ ଇଭି ଫ୍ଲିଟ ଅପରେଟର ଏବଂ ଦୁଇ ଓ ତିନି ଚକିଆ ଯାନ କିଣୁଥିବା ବ୍ୟକ୍ତିମାନେ ଉକ୍ତ ଅଭିବୃଦ୍ଧିର ମୁଖ୍ୟ ଡ୍ରାଇଭର ହୋଇସାରିଛନ୍ତି। ଫଳରେ ନୂତନ ଲଞ୍ଚ ଏବଂ ଚାର୍ଜିଂ ପଏଣ୍ଟଗୁଡିକର ଉପଲବ୍ଧତା ସହ ସ୍ବଳ୍ପ ମୂଲ୍ୟରେ ଚାଲୁଥିବା ସହିତ କ୍ରେତାଙ୍କୁ ଆକର୍ଷିତ କରୁଛି। ଇଭି ଦୁଇ ଏବଂ ତିନି ଚକିଆ ଯାନ ୨୦୨୨-୨୩ ଆର୍ଥିକ ବର୍ଷରେ ସର୍ବାଧିକ ବିକ୍ରି ପାଇଁ ଯଥାକ୍ରମେ ୬,୯୦,୦୦୦ ୟୁନିଟ୍ ଏବଂ ୩,୭୨,୦୦୦ ୟୁନିଟ୍ ରହିଥିଲା।
