ନୂଆଦିଲ୍ଲୀ,୩।୧୨: ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ପାଇଁ ଏକ ବଡ଼ ନିଷ୍ପତ୍ତି ନେବାର ସମୟ ଆସିଯାଇଛି। ପ୍ରଦର୍ଶନ କରିପାରୁ ନ ଥିବା ସିନିୟର ଖେଳାଳିଙ୍କୁ ଦଳରୁ ବିଦା କର। ସେମାନଙ୍କ ସ୍ଥାନରେ ଯୁବ ଖେଳାଳିଙ୍କୁ ଆଣ। ବିସିସିଆଇକୁ ଏଭଳି ପରାମର୍ଶ ଦେଇଛନ୍ତି ୧୯୮୩ ବିଶ୍ୱକପ୍ ଚାମ୍ପିୟନ ଦଳର ଅଧିନାୟକ କପିଳ ଦେବ।
ଚଳିତ ଟି୨୦ ବିଶ୍ୱକପ୍ରେ ଲଗାତାର ଦୁଇଟି ମ୍ୟାଚ୍ରେ ଶୋଚନୀୟ ପରାଜୟ ବରଣ କରିବା ପରେ ଭାରତୀୟ ଦଳର ଖେଳାଳିଙ୍କୁ ପ୍ରବଳ ସମାଲୋଚିତ ହେବାକୁ ପଡ଼ୁଛି।
ମୋ ମତରେ ବଡ଼ ଖେଳାଳିଙ୍କ ଭବିଷ୍ୟତ ଉପରେ ନିଷ୍ପତ୍ତି ନେବାର ସମୟ ଆସିଯାଇଛି। ଆଇପିଏଲରେ କ୍ରମାଗତ ଭଲ ପ୍ରଦର୍ଶନ କରୁଥିବା ଯୁବ ଖେଳାଳିଙ୍କୁ ସୁଯୋଗ ଦିଆଯିବା ଉଚିତ୍। ନ ହେଲେ ଆମେ ପରବର୍ତ୍ତୀ ପୀଢ଼ିର ଦଳ କେଉଁଭଳି ଗଢ଼ିବା। ଯଦି ସେମାନେ ହାରି ଯାଆନ୍ତି, ତେବେ ସେଥିରେ କିଛି କ୍ଷତି ହେବ ନାହିଁ। ସେମାନେ ଅଭିଜ୍ଞତା ହାସଲ କରିବେ। କିନ୍ତୁ ଯଦି ବଡ଼ ଖେଳାଳିମାନେ ପ୍ରଦର୍ଶନ କରିବେ ନାହିଁ ଓ ଏଭଳି ଖରାପ କ୍ରିକେଟ ଖେଳିବେ, ତେବେ ଖୁବ୍ ସମାଲୋଚନାର ସମ୍ମୁଖୀନ ହେବାକୁ ପଡ଼ିବ। ଏଣୁ ବିସିସିଆଇକୁ ଅଧିକରୁ ଅଧିକ ଯୁବ ଖେଳାଳିଙ୍କ କଥା ଚିନ୍ତା କରିବାକୁ ପଡ଼ିବ ବୋଲି କପିଳ କହିଛନ୍ତି।
