ନୂଆଦିଲ୍ଲୀ: ପ୍ରତିଶ୍ରୁତି ମୁତାବକ କେନ୍ଦ୍ର ସରକାର ରାଜ୍ୟଗୁଡ଼ିକ ସାମଗ୍ରୀ ଓ ସେବା ଟିକସ (ଜିଏସ୍ଟି) ଜନିତ କ୍ଷତିପୂରଣ ପ୍ରଦାନକୁ ନେଇ ବର୍ତ୍ତମାନ ଟଣାଓଟରା ଲାଗି ରହିଛି। ଏହି ପ୍ରସଙ୍ଗକୁ ନେଇ ୮ ବିରୋଧୀ ଦଳର ନେତା ଗୁରୁବାର ସଂସଦ ପରିସରରେ ପ୍ରତିବାଦ କରିଛନ୍ତି। ବ୍ୟାନର ଏବଂ ଥାଳି ଧରି ଏମାନେ ପ୍ରତିବାଦ କରିଥିବା ନଜରକୁ ଆସିଥିଲା। ପ୍ରାୟ ୧୫ ମିନିଟ ଧରି ପ୍ରତିବାଦ ହୋଇଥିଲା। ଏଥିରେ ଅଖିଳେଶ ଯାଦବ, ସୁପ୍ରିୟା ସୁଲେ, ମନୋଜ ଝା, ସଞ୍ଜୟ ସିଂ, ଡାରେକ ଓ ବ୍ରାଏନ ପ୍ରମୁଖ ଯୋଗଦେଇଥିଲେ। ଏହି ପ୍ରତିବାଦରେ କଂଗ୍ରେସ ସାମିଲ ହୋଇ ନ ଥିବା ଜଣାପଡିଛି। କେନ୍ଦ୍ର ସରକାର ଜିଏସ୍ଟି କ୍ଷତିପୂରଣ ପ୍ରଦାନ କରିବାକୁ ଏହି ଅବସରରେ ଦାବି କରାଯାଇଛି। ଏହି ପ୍ରତିବାଦରେ ତୃଣମୂଳ କଂଗ୍ରେସ(ଟିଏମ୍ସି),ତେଲଙ୍ଗାନା ରାଷ୍ଟ୍ର ସମିତି(ଟିଆର୍ଏସ୍), ରାଷ୍ଟ୍ରୀୟ ଜନତା ଦଳ (ଆର୍ଜେଡି), ଦ୍ରାବିଡ ମୁନେତ୍ରା କାଜାଘମ(ଡିଏମ୍କେ), ସମାଜବାଦୀ ପାର୍ଟି(ଏସ୍ପି), ନ୍ୟାଶନାଲିଷ୍ଟ କଂଗ୍ରେସ ପାର୍ଟି (ଏନ୍ସିପି) ଏବଂ ଶିବସେନା ସାମିଲ ରହିଥିଲେ। ରାଜ୍ୟ ସଭାରେ ଜିଏସ୍ଟି ପ୍ରସଙ୍ଗରେ ଆଲୋଚନା ହେବାର ଅବ୍ୟବହିତ ପୂର୍ବରୁ ଏଭଳି ପ୍ରତିବାଦ କରାଯାଇଥିବା ଜଣାପଡିଛି। ୨୭ ଅଗଷ୍ଟରେ ଅନୁଷ୍ଠିତ ହୋଇଥିବା ଜିଏସ୍ଟି ପରିଷଦ ବୈଠକରେ ଅର୍ଥମନ୍ତ୍ରୀ ନିର୍ମଳା ସୀତାରାମନ କହିଥିଲେ ଯେ, ଜିଏସ୍ଟି ବାବଦକୁ ଚଳିତ ବର୍ଷ ୩ ଲକ୍ଷ କୋଟି ଟଙ୍କା ନିଅଣ୍ଟ ପଡିବ। କୋଭିଡ୍ ଯୋଗୁ ଅର୍ଥ ବ୍ୟବସ୍ଥା ଖସିବାକୁ ସେ ଦୈବୀକୃତ କାର୍ଯ୍ୟ ବୋଲି କହିଥିଲେ।
