ଭଞ୍ଜନଗର,୩୧ା୫(ବାବୁଲା ପ୍ରଧାନ): କ୍ରୀଡ଼ାର ବିକାଶ ପାଇଁ ରାଜ୍ୟ ସରକାର ଅନେକ ସହର ଓ ଜିଲା ସଦର ମହକୁମାରେ ବିଜୁ ପଟ୍ଟନାୟକ ବହୁମୁଖୀ ଇନ୍ଡୋର ଷ୍ଟାଡିୟମ ନିର୍ମାଣ କରିଛନ୍ତି। ଗଞ୍ଜାମ ଜିଲା ଭଞ୍ଜନଗର ବିଜୁ ପଟ୍ଟନାୟକ ବହୁମୁଖୀ ଇନ୍ଡୋର ଷ୍ଟାଡିୟମରେ ଦୁଇଟି ପର୍ଯ୍ୟାୟରେ ଚାଲିଥିବା ଗ୍ରୀଷ୍ମକାଳୀନ ବ୍ୟାଡ୍ମିଣ୍ଟନ ତାଲିମ ଶିବିର ଶନିବାର ଉଦ୍ଯାପିତ ହୋଇଯାଇଛି। ଗତ ଏପ୍ରିଲ ୨୫ରୁ ମେ ୧୧ ପର୍ଯ୍ୟନ୍ତ ପ୍ରଥମ ପର୍ଯ୍ୟାୟ ଶିବିର ହୋଇଥିଲା। ମେ ୧୫ ତାରିଖରୁ ଆଜି ପର୍ଯ୍ୟନ୍ତ ଦ୍ୱିତୀୟ ପର୍ଯ୍ୟାୟ ଶିବିର ଚାଲିଥିଲା।
ରାଜ୍ୟ ସରକାରଙ୍କ କ୍ରୀଡ଼ା ଓ ଯୁବ ବ୍ୟାପାର ବିଭାଗ ପକ୍ଷରୁ ରାଜ୍ୟର ୨୮ ଜିଲାରେ ଏହି କାର୍ଯ୍ୟକ୍ରମ ହୋଇଥିଲା। କୋଚ ବିଶ୍ବ ମୋହନ ଆଚାରୀଙ୍କ ନେତୃତ୍ୱରେ ଭଞ୍ଜନଗରରେ ଶିବିର ହୋଇଥିଲା। ଏଥିରେ ମୁଖ୍ୟଅତିଥି ଭାବେ ଅବସରପ୍ରାପ୍ତ କ୍ୟାପ୍ଟେନ ମହେନ୍ଦ୍ର ସ୍ବାଇଁ, ସମ୍ମାନିତ ଅତିଥି ଭାବେ ରୋଟାରିୟନ ଶ୍ରୀନିବାସ ସୁବୁଦ୍ଧି, ବିପଦର ବନ୍ଧୁ ଉପଦେଷ୍ଟା କେ. ଶଙ୍କର ନାରାୟଣ ପାତ୍ର ଯୋଗଦେଇଥିଲେ। ସରକାରଙ୍କ ଦ୍ୱାରା ଏହିଭଳି କ୍ରୀଡ଼ା ଶିବିର ଆୟୋଜନ ଦ୍ୱାରା ଲୁକ୍କାୟିତ ଅବସ୍ଥାରେ ଥିବା ଅନେକ କ୍ରୀଡ଼ା ପ୍ରତିଭାକୁ ଖୋଜି ବାହାର କରାଯାଇପାରିଛି। ପରବର୍ତ୍ତୀ ପର୍ଯ୍ୟାୟରେ ସେମାନେ ଆଗକୁ ବଢ଼ିପାରୁଛନ୍ତି ବୋଲି ମୁଖ୍ୟଅତିଥି ସ୍ବାଇଁ କହିଥିଲେ। ଏହି ଅବସରରେ ଶିବିରରେ ଅଂଶଗ୍ରହଣ କରିଥିବା ଖେଳାଳିମାନଙ୍କୁୁ ପୁରସ୍କୃତ କରାଯାଇଥିଲା। ଅରକ୍ଷିତ ପରିଚ୍ଛା ସଂଯୋଜନା କରିଥିଲେ।
