ନୂଆଦିଲ୍ଲୀ, ୨୨ା୫: ବିଶ୍ୱ ସ୍ତରରେ ପାମ୍ ତୈଳର ବୃହତ୍ତମ ରପ୍ତାନିକାରୀ ଇଣ୍ଡୋନେସିଆ ରପ୍ତାନି ଉପରେ କଟକଣା ହଟାଇବା ପରେ ଜୁନ୍ରୁ ରନ୍ଧନ ତୈଳ ଦର ହ୍ରାସ ହେବା ନେଇ ଆଶା ଦେଖାଦେଇଛି। ୨୩ ତାରିଖରୁ ଇଣ୍ଡୋନେସିଆ ପାମ୍ ତୈଳ ରପ୍ତାନି ନେଇ ଲଗାଇଥିବା କଟକଣା ହଟାଇବା ନେଇ ଘୋଷଣା କରିଛି। ଏହାଛଡ଼ା ୟୁକ୍ରେନ୍-ରୁଷିଆ ଯୁଦ୍ଧ ସ୍ଥିତି ସ୍ଥିର ହେବା ପରେ ୟୁକ୍ରେନ୍ରୁ ସୂର୍ଯ୍ୟମୁଖୀ ତୈଳ ରପ୍ତାନିରେ ମଧ୍ୟ ସୁଧାର ଆସିପାରିବ ବୋଲି ବ୍ୟବସାୟୀମାନେ ଆଶା ରଖିଛନ୍ତି। ଏହିସବୁ ରପ୍ତାନି ପ୍ରତିବନ୍ଧକ ହଟାଇଯିବା ପରେ ଖାଇବା ତେଲର ବଜାର ଉପଲବ୍ଧତା ବୃଦ୍ଧି ଘଟିବ। ସୂଚନାଯୋଗ୍ୟ, ଇଣ୍ଡୋନେସିଆ ବାର୍ଷିକ ୪୬ ମିଲିୟନ ଟନ୍ ପାମ୍ ତୈଳ ଉତ୍ପାଦନ କରିଥାଏ। ସେଥିମଧ୍ୟରୁ ୯ ମିଲିୟନ ଟନ୍ ଖାଇବା ତେଲ ଏବଂ ଅନ୍ୟ ୯ ମିଲିୟନ ଟନ୍ ବାୟୋଡିଜେଲ କାର୍ଯ୍ୟକ୍ରମରେ ଉପଯୋଗ କରିଥାଏ। ଅବଶିଷ୍ଟ ୨୮ ମିଲିୟନ ଟନ ତୈଳ ଅନ୍ୟ ଦେଶକୁ ରପ୍ତାନି କରିବା କାର୍ଯ୍ୟରେ ଲଗାଇଥାଏ।
