ନୂଆଦିଲ୍ଲୀ,୨୫।୬: କେନ୍ଦ୍ର ସରକାରଙ୍କ ପକ୍ଷରୁ ପ୍ରଧାନମନ୍ତ୍ରୀ କିଷାନ ସମ୍ମାନ ନିଧି ଯୋଜନା ଦ୍ୱାରା କୃଷକମାନଙ୍କୁ ଆର୍ଥିକ ସହାୟତା ଯୋଗାଇ ଦିଆଯାଉଛି। ୨୦୧୯ରୁ ଆରମ୍ଭ ହୋଇଥିବା ଏହି ଯୋଜନାରେ କୃଷକମାନଙ୍କ ଖାତାକୁ ବର୍ଷକୁ ୬ହଜାର ଟଙ୍କା ପଠାଯାଉଛି। ଏହା ୨ହଜାର ଲେଖାଏ ତିନୋଟି କିସ୍ତିରେ ମିଳୁଛି। ଏବେ ସୁଦ୍ଧା ଏହି ଯୋଜନାରେ ୫ଟି କିସ୍ତି ଦିଆଯାଇସାରିଛି।
ଏହି ଯୋଜନା ନେଇ ଲୋକଙ୍କ ମନରେ ଅନେକ ପ୍ରଶ୍ନ ରହିଥାଏ। ଯେପରିକି ପିଏମ୍ କିଷାନ୍ ଖାତାର ବାଲାନ୍ସ କିପରି ଜାଣିବେ। ଏଥିପାଇଁ କି କି ସୁବିଧା ରହିଛି ଆଦି। ତେବେ ଯଦି ଆପଣଙ୍କ ମନରେ ଏଭଳି ପ୍ରଶ୍ନ ଥାଏ, ତେବେ ସେ ବିଷୟରେ ଜାଣିରଖନ୍ତୁ ।
ଏହା ଜାଣିବା ପାଇଁ ସବୁଠାରୁ ସହଜ ଉପାୟ ହେଲା ଏସ୍ଏମ୍ଏସ୍। କହିବାର ଅର୍ଥ ପଇସା ଆସିଛି ଅଥବା ନାହିଁ ତାହା ଆପଣ ମେସେଜ୍ ପଠାଇ ଜାଣିପାରିବେ। କାରଣ ଯଦି ଆପଣ ନିଜ ଖାତା ସହ ମୋବାଇଲ ନଂ ରେଜିଷ୍ଟର କରିଥାନ୍ତି, ତେବେ ଆପଣଙ୍କୁ ଏହି ସୂଚନା ମିଳିଯିବ। ଏଣୁ ଏହି ସୁବିଧାର ଲାଭ ଉଠାଇବା ଲାଗି ଆପଣଙ୍କୁ ନିଜ ବ୍ୟାଙ୍କ ଖାତା ସହ ମୋବାଇଲ ନଂ ରେଜିଷ୍ଟର କରିବାକୁ ପଡ଼ିବ।
ଯଦି ଆପଣ ଏଭଳି କରିନାହାନ୍ତି ତେବେ ଆପଣ ନିଜ ପାସ୍ବୁକ୍ ଅପ୍ଡେଟ୍ କରି ନଚେତ ଏଟିଏମ୍ରୁ ମିନି ଷ୍ଟେଟ୍ମେଣ୍ଟ ବାହାର କରି ଖାତାର ସବିଶେଷ ସୂଚନା ପାଇପାରିବେ।
