ଇସଲାମବାଦ,୧୩।୫: ନିକଟରେ ପାକିସ୍ତାନରେ ବଡ଼ ବଡ଼ ଭୂକମ୍ପ ହୋଇଛି। ଯେଉଁ କାରଣରୁ ଦେଶରେ ବଡ଼ ବଡ଼ କ୍ଷୟକ୍ଷତି ମଧ୍ୟ ହୋଇଛି। ତେବେ କୁହାଯାଉଛି ପାକିସ୍ତାନରେ ସମ୍ପ୍ରତି ଘଟିଥିବା ଭୂମିକମ୍ପଗୁଡ଼ିକ ପରମାଣୁ ପରୀକ୍ଷଣ ଯୋଗୁଁ ହୋଇଛି। କିନ୍ତୁ ଏହାକୁ ନେଇ ଭାରତର ଜାତୀୟ ଭୂକମ୍ପବିଜ୍ଞାନ କେନ୍ଦ୍ର (ଏନସିଏସ) ବଡ଼ ବୟାନ ଦେଇଛି।
ଏନସିଏସ ନିର୍ଦ୍ଦେଶକ ଓ. ପି. ମିଶ୍ର କହିଛନ୍ତି ଯେ, ସୋମବାର ମଧ୍ୟାହ୍ନ ୧:୨୬ରେ ପାକିସ୍ତାନର ପଞ୍ଜାବ ପ୍ରଦେଶର ପୀର ଜୋଙ୍ଗାଲ ନିକଟରେ ୪.୬ ମ୍ୟାଗ୍ନିଚ୍ୟୁଡ ଶକ୍ତିର ଏକ ଭୂମିକମ୍ପ ରେକର୍ଡ ହୋଇଛି। ଏହାର କେନ୍ଦ୍ରବିନ୍ଦୁ ମୁଖ୍ୟ କେନ୍ଦ୍ରୀୟ ଥ୍ରଷ୍ଟ ନାମକ ଭୂତାକ୍ତିକ ଫଲ୍ଟଲାଇନ ନିକଟରେ ଥିଲା, ଯାହା ଭୂମିକମ୍ପ ପ୍ରବଣ ଅଞ୍ଚଳ ଭାବେ ଜଣାଶୁଣା।
ଏନସିଏସ ମୁଖ୍ୟ ଶୁକ୍ଲା ସ୍ପଷ୍ଟ କରିଛନ୍ତି ଯେ, ଗତ ତିନି ଦିନରେ ପାକିସ୍ତାନରେ ହୋଇଥିବା ଭୂମିକମ୍ପଗୁଡ଼ିକ ବିଭିନ୍ନ ସ୍ଥାନରେ ଘଟିଛି ଏବଂ ଏକାଧିକ ପରମାଣୁ ସ୍ଥାପନା ଏତେ ବିସ୍ତୃତ ଅଞ୍ଚଳରେ ଥାଇପାରେ ନାହିଁ। ସେ କହିଛନ୍ତି, ପାକିସ୍ତାନ ଭାରତୀୟ ଓ ଇଉରେସିଆନ ଟେକ୍ଟୋନିକ ପ୍ଲେଟ୍ର ସକ୍ରିୟ ସୀମାରେ ଅବସ୍ଥିତ, ଯେଉଁଠାରେ ବାଲୁଚିସ୍ତାନ, ଖୈବର ପାଖତୁନଖୱା ଓ ଗିଲଗିଟ-ବାଲଟିସ୍ତାନ ପରି ଅଞ୍ଚଳରେ ନିୟମିତ ଭୂମିକମ୍ପ ହୋଇଥାଏ। ସାମାଜିକ ଗଣମାଧ୍ୟମରେ କେତେକ ବ୍ୟବହାରକାରୀ ଦାବି କରିଥିଲେ ଯେ, ଏହି ଭୂମିକମ୍ପ ପାକିସ୍ତାନର ପରମାଣୁ ସ୍ଥାପନାରେ ଘଟିଥିବା ଘଟଣା କିମ୍ବା ଭାରତର ‘ଅପରେସନ ସିନ୍ଦୁର’ ସହ ଜଡ଼ିତ। ଏହାକୁ ଖଣ୍ଡନ କରି ଏନସିଏସ କହିଛି ଯେ, ଏହା ସମ୍ପୂର୍ଣ୍ଣ ଭାବେ ପ୍ରାକୃତିକ ଭୂମିକମ୍ପ ଏବଂ ଏହାର ପରମାଣୁ ପରୀକ୍ଷଣ ସହ କୌଣସି ସମ୍ପର୍କ ନାହିଁ।
