ଅମରପାଲି,୧୦ା୯(ପୀତାମ୍ବର ସାହୁ): ସୁବର୍ଣ୍ଣପୁର ଜିଲା ବୀରମହାରାଜପୁର ଥାନା ଅନ୍ତର୍ଗତ ବହଳପଦର ପଞ୍ଚାୟତର ଗୌଡ଼ଗାଡ଼ ଗ୍ରାମର ଶତାଧିକ ମହିଳା ଜଣେ ମଦ୍ୟପଙ୍କ ବିରୋଧରେ ଅଭିଯୋଗ କରି ଥାନାର ଦ୍ବାରସ୍ଥ ହୋଇଛନ୍ତି। ଅଭିଯୋଗ ଅନୁସାରେ ଗତ ବର୍ଷଠାରୁ ଗୌଡ଼ଗାଡ଼ ଗ୍ରାମର ମହିଳାମାନେ ଏକତ୍ରିତ ହୋଇ ଗ୍ରାମରେ ମଦ ବିକ୍ରିକୁ ବନ୍ଦ କରାଇଥିଲେ। ଏହା ସହିତ ଯିଏ ବି ମଦପିଇ ଗାଳିଗୁଲଜ କଲା ତାହାର ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ନିଷ୍ପତ୍ତି ନିଆଯାଇଥିଲା। ଫଳରେ ଗ୍ରାମରେ ମଦ ବିକ୍ରି ସମ୍ପୂର୍ଣ୍ଣ ବନ୍ଦ ହୋଇଛି। ମାତ୍ର କିଛି ଦିନ ପୂର୍ବରୁ ଗ୍ରାମର ଜଣେ ଯୁବକ ମଦ ପିଇ ଗାଁ ଦାଣ୍ଡରେ ଅସଭ୍ୟ ଭାଷାରେ ଗାଳିଗୁଲଜ କରିବା ସହିତ କେତେକଙ୍କୁ ହାଣି ଦେବି, ମାରିଦେବି କହି ଆତଙ୍କ ଖେଳାଇଥିଲେ। ଏନେଇ ଗ୍ରାମରେ ଏକ ସଭା ବସିଥିଲା। ଏହି ସଭାରେ ସଂପୃକ୍ତ ଯୁବକ ଜଣକ ନିଜ ଦୋଷ ସ୍ବୀକାର କରି ଦୋଷୀ ସାବ୍ୟସ୍ତ ହୋଇଥିଲେ। ଆଗକୁ ମଦ ପିଇ ଗାଳିଗୁଲଜ ନ କରିବାକୁ ମଧ୍ୟ ପ୍ରତିଶ୍ରୁତି ଦେଇଥିଲୋ। ମାତ୍ର ଏବେ ପୁଣି ସଂପୃକ୍ତ ଯୁବକ ମଦ୍ୟପାନ କରି ସମାନ ଢଙ୍ଗରେ ଗାଁ ଦାଣ୍ଡରେ ଗାଳିଗୁଲଜ କରିବା ସହିତ ଆତଙ୍କ ଖେଳାଇଥିଲେ। ଗ୍ରାମର ପରିଚାଳନା କମିଟିର ସଭାପତି ସମେତ ଅନ୍ୟ ସଭ୍ୟମାନେ ତାଙ୍କୁ ମନା କରିବାକୁ କାହାରି କଥା ଶୁଣି ନ ଥିଲା। ଫଳରେ ମଙ୍ଗଳବାର ଗ୍ରାମର ଶତାଧିକ ମହିଳା ଠେଙ୍ଗୋ ଡ୍ୟାମ ଫାଣ୍ଡି ଅଧିକାରୀଙ୍କୁ ଅଭିଯୋଗ କରିଥିଲେ। ମାତ୍ର ଫାଣ୍ଡିରେ ଏହାର କୌଣସି ସମାଧାନ ନ ହେବାରୁ ସଂପୃକ୍ତ ଯୁବକଙ୍କ ନାମରେ ଏକ ମାମଲା ରୁଜୁ କରାଯାଇଛି।
ତେବେ ବୁଧବାର ପୁଣି ଥରେ ଗ୍ରାମର ଶତାଧିକ ମହିଳା ଓ ପୁରୁଷ ବୀରମହାରାଜପୁର ଥାନାକୁ ଯାଇ ଏହି ବିଷୟରେ ଅଭିଯୋଗ କରିବା ସହିତ ସଂପୃକ୍ତ ଯୁବକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଛନ୍ତି। ଗ୍ରାମ୍ୟ ପରିଚାଳନା କମିଟିର ସଭାପତି ବାବୁଲାଲ ଦେହୁରୀଙ୍କ ସମେତ ବହଳପଦର ସରପଞ୍ଚ ନିରୂପମା ସେଠୀ, ସମିତି ସଭ୍ୟା ସୁଗନ୍ଧା ଘିବିଲା,ଶୁକଦେବ ସାହୁ, ଗୋପାଳ ସେଠୀ, ନଳିନୀ ସାହୁ, ନିରୁପମା ଦେହୁରୀ, ମମତା ବାରିକ, ଚଞ୍ଚଳ ବସ୍ତିଆ, ମଙ୍ଗୁଳୁ ଘିବିଲା ସମେତ ଶତାଧିକ ମହିଳା ଓ ପୁରୁଷ ଯାଇ ବୀରମହାରାଜପୁର ଥାନା ଅଧିକାରୀଙ୍କୁ ଏକ ଦାବିପତ୍ର ପ୍ରଦାନ କରିଛନ୍ତି। ଦାବିପତ୍ର ପ୍ରଦାନ ସମୟରେ ବ୍ଲକ ଉପାଧ୍ୟକ୍ଷ ନାରାୟଣ ଲୁହା ମଧ୍ୟ ଗ୍ରାମର ମହିଳାଙ୍କ ସହିତ ସାମିଲ ଥିଲେ।
