ସମ୍ବଲପୁର,୮।୩(ପ୍ରମୋଦ ବହିଦାର): ସମ୍ବଲପୁରର ବିଶିଷ୍ଟ ସ୍ତ୍ରୀ ରୋଗ ବିଶେଷଜ୍ଞ ତଥା ଜଣାଶୁଣା ସମାଜସେବୀ ଡା. ନାରାୟଣୀ ପଣ୍ଡାଙ୍କର ରବିବାର ପୂର୍ବାହ୍ନରେ ପରଲୋକ ହୋଇଛି। ମୃତ୍ୟୁ ବେଳକୁ ତାଙ୍କୁ ୮୮ ବର୍ଷ ବୟସ ହୋଇଥିଲା। ନିଜର ସମସ୍ତ ସଞ୍ଚିତ ପୁଞ୍ଜିକୁ ଶିକ୍ଷା ଓ ସମାଜସେବା ପାଇଁ ଦାନ କରି ସେ ସାରା ଓଡ଼ିଶାରେ ଚର୍ଚ୍ଚାରେ ଥିଲେ। ଡା. ପଣ୍ଡା ଡାକ୍ତରୀ ଡିଗ୍ରୀ ହାସଲ ପରେ ୧୯୬୩ ମସିହାରୁ ଜଣେ ସଫଳ ଚିକିତ୍ସିକ ଭାବେ ନିଜର କ୍ୟାରିୟର ଆରମ୍ଭ କରିଥିଲେ ଏବଂ ଅବସର ପରେ ମଧ୍ୟ କୋଭିଡ ମହାମାରୀ ସମୟରେ ନିଜର ସେବା ଜାରି ରଖି ଏକ ନିଆରା ଉଦାହରଣ ସୃଷ୍ଟି କରିଥିଲେ। ତାଙ୍କର ଏହି ନିଃସ୍ବାର୍ଥପର ସେବା ଓ ମହାନତା ପାଇଁ ସେ ଅଞ୍ଚଳବାସୀଙ୍କ ପାଇଁ ଜଣେ ଆଦର୍ଶ ବ୍ୟକ୍ତିତ୍ୱ ଭାବେ ପରିଚିତ ଥିଲେ।
ଶିକ୍ଷା କ୍ଷେତ୍ରରେ ତାଙ୍କର ଅବଦାନ ଅତୁଳନୀୟ। ସେ ନିଜେ ଶିକ୍ଷା ଗ୍ରହଣ କରିଥିବା ଅନୁଷ୍ଠାନ ତତ୍କାଳୀନ ଗଙ୍ଗାଧର ମେହେର ବିଶ୍ୱବିଦ୍ୟାଳୟକୁ ‘ଗୁରୁଦକ୍ଷିଣା’ ସ୍ବରୂପ ୩୦ ଲକ୍ଷ ଟଙ୍କା ଦାନ କରିଥିଲେ, ଯାହା ସହାୟତାରେ ସେଠାରେ ‘ନାରାୟଣୀ ପଣ୍ଡା ଆଇଟି ସ୍କିଲ ସେଣ୍ଟର’ ପ୍ରତିଷ୍ଠା କରାଯାଇଛି। ଏହା ବ୍ୟତୀତ ସେ ଲେଡି ଲୁଇସ ଗାଲର୍ସ ହାଇସ୍କୁଲକୁ ୧୫ ଲକ୍ଷ ଟଙ୍କା ଏବଂ ନେତାଜୀ ସୁଭାଷ ଚନ୍ଦ୍ର ବୋଷ କଲେଜକୁ ମଧ୍ୟ ୧୫ ଲକ୍ଷ ଟଙ୍କା ପ୍ରଦାନ କରିଥିଲେ। ଜଣେ ସାଧାରଣ ପେନସନଭୋଗୀ ହୋଇ ମଧ୍ୟ ନିଜ ପରିବାର ପ୍ରତି ଦାୟିତ୍ୱ ସମ୍ପାଦନ ସହ ସମାଜ ପାଇଁ ସର୍ବସ୍ବ ଦାନ କରିବାର ତାଙ୍କର ଏହି ମହାନତା ସବୁଦିନ ପାଇଁ ସ୍ମରଣୀୟ ହୋଇ ରହିବ। ତାଙ୍କ ବିୟୋଗରେ ସମ୍ବଲପୁର ସମେତ ସମଗ୍ର ରାଜ୍ୟରେ ଶୋକର ଛାୟା ଖେଳିଯାଇଛି।