ମୁମ୍ବାଇ,୨୪।୪ : ୫୪ ବର୍ଷ ଧରି ସଂସଦ ରାଜନୀତିରେ ସକ୍ରିୟ ଥିବା ଶରଦ ପାୱାର ମହା ବିକାଶ ଅଘାଡି (ଏମଭିଏ) ମିଳିତ ମେଣ୍ଟ ସମ୍ପର୍କରେ ଏକ ବଡ଼ ବିବୃତ୍ତି ଦେଇଛନ୍ତି। ମହାରାଷ୍ଟ୍ରରେ ଏମଭିଏ ଆଜି ଅଛି କାଲି ରହିବ କି ନାହିଁ ସନ୍ଦେହ ବୋଲି ସେ କହିଛନ୍ତି। ଏହା ପରେ ରାଜ୍ୟର ରାଜନୈତିକ ସ୍ଥିତି ଚଳଚଞ୍ଚଳ ହେବାରେ ଲାଗିଛି।
ମହାରାଷ୍ଟ୍ରରେ ଏନସିପି, ଶିବସେନା (ଉଦ୍ଧବ ଦଳ) ଏବଂ କଂଗ୍ରେସ ମଧ୍ୟରେ ଏମଭିଏ ମିଳିତ ମେଣ୍ଟର ଭବିଷ୍ୟତ ବିପଦରେ ରହିଛି। ଶରଦ ପାୱାର ଅମରାବତୀରେ କହିଛନ୍ତି, ଆଜି ଆମେଏମଭିଏର ଅଂଶ ଅଟୁ। ଆମେ ଏକାଠି କାମ କରିବାକୁ ଇଚ୍ଛା କରୁ, କିନ୍ତୁ ଇଚ୍ଛା ସହିତ କ’ଣ ହୁଏ। ଆଗାମୀ ଦିନରେ ବିଧାନସଭା ଓ ଲୋକସଭା ନିର୍ବାଚନ ହେବାକୁ ଯାଉଛି। ଏମଭିଏ ଜାରି ରହିବ କି ନାହିଁ ତାହା ଉପରେ ଆଲୋଚନା ହୋଇନାହିଁ।
ପାୱାର ଖବରଦାତାମାନଙ୍କ ପ୍ରଶ୍ନର ଉତ୍ତର ଦେଉଥିଲେ। ଯେତେବେଳେ ତାଙ୍କୁ ପଚରାଗଲା ମହା ବିକାଶ ଅଘାଡି ମିଳିତ ମେଣ୍ଟ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବ କି ନାହିଁ, ସେ ଉତ୍ତର ଦେଇଥିଲେ, ଏହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ।
ଆସନ ବଣ୍ଟନ ଠାରୁ ଆରମ୍ଭ କରି ଅନେକ ପ୍ରସଙ୍ଗ ରହିଛି। ଯାହା ଏପର୍ଯ୍ୟନ୍ତ ଆଲୋଚନା ହୋଇନାହିଁ। ଦଳଗୁଡ଼ିକର ନିଜସ୍ବ ଆଦର୍ଶ ଅଛି। ତେବେ ଆମେ ବର୍ତ୍ତମାନ କିପରି କହିପାରିବା ଏମଭିଏ ମେଣ୍ଟ ୨୦୨୪ ମହାରାଷ୍ଟ୍ର ବିଧାନସଭା ନିର୍ବାଚନରେ ଏକାଠି ଲଢ଼ିବ କି ନାହିଁ।
