ନୂଆଦିଲ୍ଲୀ,୬।୧୦: ରୋଷେଇ ଘରେ ପୁଣି ମହଙ୍ଗା ମାଡ଼ ହୋଇଛି। ଘରେ ରୋଷେଇ ପାଇଁ ବ୍ୟବହୃତ ହେଉଥିବା ସିଲିଣ୍ଡର ଦାମ୍ ପୁଣି ବଢ଼ିଛି। ୧୪.୨ କିଲୋଗ୍ରାମ୍ ସିଲଣ୍ଡର ଦାମ୍ ୧୫ ଟଙ୍କା ବଢ଼ିଛି। ଫଳରେ ଏବେ ଏହାର ଦାମ୍ ଦିଲ୍ଲୀ-ମୁମ୍ବାଇରେ ୮୯୯.୫୦ ଟଙ୍କା ଛୁଇଁଛି। ପୂର୍ବରୁ ଏହା ୮୮୪.୫୦ ଟଙ୍କା ଥିଲା। ସେହିପରି ୫ କିଲୋଗ୍ରାମ୍ ସିଲିଣ୍ଡର ଦାମ୍ ୫୦୨ ଟଙ୍କା ହୋଇଛି। ବିହାର ପାଟନାରେ ଏବେ ଏହା ଦାମ୍ ବଢ଼ି ୯୯୮ ଟଙ୍କାରେ ପହଞ୍ଚିଛି।
ଚଳିତବର୍ଷ ଜାନୁୟାରୀରେ ଗ୍ୟାସ୍ ସିଲିଣ୍ଡର ଦାମ୍ ୬୯୪ ଟଙ୍କା ଥିଲା। ସେପ୍ଟେମ୍ବର ୧ରେ ଏହା ୮୮୪ ଟଙ୍କାରେ ପହଞ୍ଚିଥିଲା। ଜାନୁୟାରୀଠାରୁ ୮ ମାସ ମଧ୍ୟରେ ଗ୍ୟାସ୍ ସିଲିଣ୍ଡର ୧୯୦ ଟଙ୍କା ମହଙ୍ଗା ହୋଇଛି।
ଅପରପକ୍ଷରେ କମର୍ସିଆଲ ଭାବେ ବ୍ୟବହୃତ ହେଉଥିବା ୧୯ କିଲୋଗ୍ରାମ୍ ସିଲିଣ୍ଡର ଦାମ୍ ବିଲ୍ଲୀରେ ୧୬୭୩ ଟଙ୍କାରୁ ୧୭୩୬.୫୦ ଟଙ୍କାକୁ ବୃଦ୍ଧି ହୋଇଛି। କୋଲକାତାରେ ଏହା ୧୮୦୫.୫୦ ଟଙ୍କା, ମୁମ୍ବାଇରେ ୧୬୮୫ ଟଙ୍କା ଏବଂ ଚେନ୍ନାଇରେ ୧୮୬୭.୫୦ ଟଙ୍କାରେ ପହଞ୍ଚିଛି।
ସୂଚନାଯୋଗ୍ୟ, ସରକାରଙ୍କ ଅନୁରୋଧ ପରେ ବହୁ ମଧ୍ୟମ ବର୍ଗର ଲୋକେ ସବସିଡ୍ ଛାଡ଼ି ଦେଇଥିଲେ। ଏହା ଦ୍ୱାରା ଗରିବଙ୍କ ଘରେ ଚୂଲା ଜଳିବ ବୋଲି ସରକାର କହିଥିଲେ। ମାତ୍ର ସବସିଡ୍ ଛାଡ଼ିଥିବା ମଧ୍ୟମ ବର୍ଗ, ନିମ୍ନ ମଧ୍ୟମ ବର୍ଗର ଲୋକେ ଏବେ ବଢ଼ନ୍ତା ଗ୍ୟାସ୍ ସିଲିଣ୍ଡର ଆଗରେ କିଂକର୍ତ୍ତବ୍ୟମୂଢ଼ ହୋଇ ଯାଇଛନ୍ତି।
