ନୂଆଦିଲ୍ଲୀ, ୧୧ା୧୨: ୟୁନେସ୍କୋର ଅସ୍ପର୍ଶନୀୟ ସାଂସ୍କୃତିକ ଐତିହ୍ୟ ତାଲିକାରେ ଦୀପାବଳି ସ୍ଥାନ ପାଇଛି। ୟୁନେସ୍କୋ ରିପ୍ରେଜେଣ୍ଟିଭ ଲିଷ୍ଟ୍ ଅଫ୍ ଦ ଇନ୍ଟାଞ୍ଜିବଲ କଲ୍ଚ୍ୟୁରାଲ ହେରିଟେଜ୍ ଅଫ୍ ହ୍ୟୁମାନିଟିରେ ଏହାକୁ ଅନ୍ତର୍ଭୁକ୍ତ କରାଯାଇଛି। ନୂଆଦିଲ୍ଲୀରେ ଲାଲକିଲ୍ଲାରେ ବୁଧବାର ଅନୁଷ୍ଠିତ ୨୦ତମ ୟୁନେସ୍କୋ ଆନ୍ତଃସରକାରୀ କମିଟି ଅଧିବେଶନରେ ଏହା ଘୋଷଣା କରାଯାଇଛି। ଏହି ଅନ୍ତର୍ଭୁକ୍ତୀକରଣ ଦୀପାବଳିକୁ ଏକ ଜୀବନ୍ତ ପରମ୍ପରା ଭାବରେ ସ୍ୱୀକୃତି ଦେଇଛି, ଯାହା ଅନ୍ଧକାର ଉପରେ ଆଲୋକର ଏବଂ ଅସତ୍ୟ ଉପରେ ସତ୍ୟର ବିଜୟର
ସାର୍ୱଜନୀନ ବାର୍ତ୍ତା ଦିଏ। ଏହି ପର୍ୱ ଭାରତ ଏବଂ ବିଶ୍ୱର ଅନ୍ୟାନ୍ୟ ଦେଶରେ ଅନେକ ଲକ୍ଷ ଲୋକଙ୍କ ଦ୍ୱାରା କିଛି ଦିନ ଧରି ପାଳନ କରାଯାଏ। ଏଥିରେ ଘର ସଜାଇବା, ଦୀପ ଜଳାଇବା, ପୂଜାର୍ଚ୍ଚନା ଏବଂ ଉପହାର ଆଦାନ ପ୍ରଦାନ ଭଳି ବିଭିନ୍ନ ପ୍ରଥା ସାମିଲ ରହିଛି। ଏହି ପରମ୍ପରା ପରିବାର ଏବଂ ସମ୍ପ୍ରଦାୟ ମଧ୍ୟରେ ପିଢ଼ିରୁ ପିଢ଼ିକୁ ଅନୌପଚାରିକ ଭାବରେ ହସ୍ତାନ୍ତରିତ ହୋଇଆସିଛି, ଯାହା ସାମାଜିକ ବନ୍ଧନ ଏବଂ ଏକ ସାଧାରଣ ପରିଚୟକୁ ସୁଦୃଢ଼ କରିଆସିଛି। ୟୁନେସ୍କୋର ଏହି ସ୍ୱୀକୃତି ଅନ୍ତର୍ଜାତୀୟ ଦୃଶ୍ୟମାନତା ଯୋଗାଇଥାଏ। ଦୀପାବଳିକୁ ମିଶାଇ ଭାରତର ବର୍ତ୍ତମାନ ୟୁନେସ୍କୋ ଅସ୍ପର୍ଶନୀୟ ସାଂସ୍କୃତିକ ଐତିହ୍ୟ ତାଲିକାରେ ୧୬ଟି ବିଷୟ ରହିଛି। ସେଗୁଡ଼ିକ ମଧ୍ୟରେ କୁମ୍ଭମେଳା, କୋଲକାତାର ଦୁର୍ଗାପୂଜା, ଯୋଗ, ଗୁଜରାଟର ଗରବା ନୃତ୍ୟ, ବୈଦିକ ମନ୍ତ୍ର, ରାମଲୀଳା ଆଦି ପ୍ରମୁଖ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ୟୁନେସ୍କୋର ଏହି ଘୋଷଣାକୁ ସ୍ୱାଗତ କରି କହିଛନ୍ତି, ଏହା ଦୀପାବଳିର ବୈଶ୍ୱିକ ଲୋକପ୍ରିୟତାରେ ସହାୟକ ହେବ।
