ଗୋପାଳପୁର,୧୧ା୨(ଡି.ଏନ.ଏ.): ବ୍ରହ୍ମପୁର ବିଶ୍ୱବିଦ୍ୟାଳୟ ନିକଟରେ ଥିବା ରଙ୍ଗେଇଲୁଣ୍ଡା ଏୟାରଷ୍ଟ୍ରିପରୁ ବିମାନ ଚଳାଚଳ ପାଇଁ ଦୀର୍ଘ ବର୍ଷ ଧରି ଦାବି ହୋଇଆସୁଥିଲା। ଏନେଇ ଶୁକ୍ରବାର ଗଞ୍ଜାମ ଜିଲାପାଳ ଦିବ୍ୟଜ୍ୟୋତି ପରିଡା ବିଭୀଗୀୟ କର୍ତ୍ତୃପକ୍ଷଙ୍କ ସହ ଏୟାରଷ୍ଟ୍ରିପ ସମ୍ପ୍ରସାରଣ କାର୍ଯ୍ୟ ତଦାରଖ କରିଛନ୍ତି। ବର୍ତ୍ତମାନ ରଙ୍ଗେଇଲୁଣ୍ଡା ଏୟାରଷ୍ଟ୍ରିପ ୯୭୫ ମିଟର ଲମ୍ବା, ଓସାର ୧୫୦ ମିଟର, ରନୱେ ୭୫୦ ମିଟର ରହିଥିବା ହେତୁ ବିମାନ ଉଡ଼ାଣରେ ବାଧା ସୃଷ୍ଟି ହେଉଥିବାରୁ ସଂପ୍ରସାରଣ ନିମନ୍ତେ ବେସରକାରୀ ଓ ସରକାରୀ ଜମି ଚିହ୍ନଟ କରାଯାଇଥିଲା। ସଂପ୍ରସାରଣ ପାଇଁ ଆବଶ୍ୟକ ରହିଥିବା ପାଚେରୀ ଠାରୁ ହଷ୍ଟେଲ ପଟେ ପ୍ରାୟ ୯୦ ମିଟର, ପାଚେରୀ ଠାରୁ ବିଶ୍ୱବିଦ୍ୟାଳୟ ପ୍ରଶାସନିକ କୋଠା ପଟେ ପ୍ରାୟ ୪୦ ମିଟର, ବ୍ରହ୍ମପୁରଠାରୁ ମୁଖ୍ୟ ରାସ୍ତା ପଟେ ପାଚେରୀ ଠାରୁ ପ୍ରାୟ ୨୫୦ ମିଟର ଲମ୍ବା, ମୋନାର୍କ ଛକ ପାଚେରୀ ଠାରୁ ପ୍ରାୟ ୩୦ ମିଟର ଲମ୍ବା ସଂପ୍ରସାରଣ କରାଯିବ। ବିଶ୍ୱବିଦ୍ୟାଳୟର ପ୍ରାୟ ୧୫ ଏକର ଜମି ଦରକାର ପଡୁଥିବାରୁ ଉଚ୍ଚଶିକ୍ଷା ବିଭାଗକୁ ଚିଠି କରାଯାଇଥିଲା। ଉଚ୍ଚଶିକ୍ଷା ବିଭାଗ ଏ ନେଇ ବିଶ୍ୱବିଦ୍ୟାଳୟ କୁଳସଚିବଙ୍କୁ ଜମି ଚିହ୍ନଟ କରି ଚିଠି କରିଛନ୍ତି। ଜିଲାପାଳଙ୍କ ସହ ଯୋଗାଯୋଗ ବେଳେ ରଙ୍ଗେଇଲୁଣ୍ଡା ଏୟାରଷ୍ଟ୍ରିପକୁ ଉନ୍ନତମାନର ପ୍ରସ୍ତୁତି କରାଯିବ, ତାହାସହ ଟେଣ୍ଡର ପ୍ରକ୍ରିୟା ସରିଛି, ରହିଥିବା ଟେକନିକାଲ ସ୍ଥିତିକୁ ସର୍ଭେ କରିବା ପାଇଁ ଆଲୋଚନା କରାଯାଇଛି। ଶୀଘ୍ର କାମ ସରିବା ପରେ ସରକାର ଉଡ଼ାଣ ପାଇଁ ନିଷ୍ପତି ନେବେ ବୋଲି କହିଛନ୍ତି। ଜିଲାପାଳଙ୍କ ସମେତ ବ୍ରହପୁର ଉପଜିଲାପାଳ ଆଶୁତୋଷ କୁଲକର୍ଣ୍ଣି, ଜମି ଅଧିଗ୍ରହଣ ଅଧିକାରୀ ଉମାକାନ୍ତ ବାରିକ, ଡ଼ିଏଫଓ ଅମ୍ଲାନ ନାୟକ, ପୂର୍ତ୍ତ ବିଭାଗର ଏସ୍ଇ ତପନ ପାଣିଗ୍ରାହୀ, ଇଣ୍ଡିଆ ୱାନ ଏୟାରପୋର୍ଟ ଅଧିକାରୀ ରାହୁଲ କୁମାର, ଏନସିସି ଗ୍ରୁପ କମାଣ୍ଡେଣ୍ଟ ସଚିନ ଗୁପ୍ତା, ଇଂ ନିର୍ମଳ ନାୟକ, ଏଇ ଚିନ୍ମୟ ତ୍ରିପାଠୀ, ଜେଇ ଲକ୍ଷ୍ମଣ ମାରାଣ୍ଡି, କନିସି ଆଡିସିନାଲ ତସିଲଦାର କୁଲଦିପ କୁମାର, କରାପଲ୍ଲୀ ଆରଆଇ ନିରାକାର ସେଠୀ ପ୍ରମୁଖ ଉପସ୍ଥିତ ଥିଲେ।
