କେନ୍ଦୁଝର,୩୦ା୧୨(ନରେଶ ଚନ୍ଦ୍ର ପଟ୍ଟନାୟକ): କିଛିଦିନ ହେଲା ଭୁବନେଶ୍ୱର-କେନ୍ଦୁଝର ମେମୁ ଟ୍ରେନ୍ ବିଳମ୍ବରେ କେନ୍ଦୁଝରରେ ପହଞ୍ଚୁଥିବାରୁ ଜନଅସନ୍ତୋଷ ବଢୁଛି। ଟ୍ରେନ୍ କେନ୍ଦୁଝର ଗଡ଼ ରେଳ ଷ୍ଟେଶନରେ ରାତି ୯.୪୦ ରେ ପହଞ୍ଚିବା ପାଇଁ ଧାର୍ଯ୍ୟ ହୋଇଥିବା ବେଳେ ଶୁକ୍ରବାର ରାତି ୧୨.୩୦ରେ ପହଞ୍ଚିଥିଲା। ସେହିପରି ଗୁରୁବାର ରାତି ୧୦.୪୯, ବୁଧବାର ୧୦.୪୧, ମଙ୍ଗଳବାର ୧୧.୨୧ରେ ପହଞ୍ଚିଥିଲା। ଏଭଳି ବର୍ଷ ତମାମ ବିଳମ୍ବରେ ଟ୍ରେନ୍ ପହଞ୍ଚିଥିବାରୁ ଅସନ୍ତୋଷ ପ୍ରକାଶ ପାଇଛି। ସେହିପରି ଟ୍ରେନ୍ରେ କମ୍ ବଗି ସହିତ ଅସ୍ବାସ୍ଥ୍ୟକର ପାଇଖାନା ଯୋଗୁ ଲୋକେ ଅକଥନୀୟ ଅସୁବିଧା ଭୋଗୁଛନ୍ତି।
ପ୍ରକାଶ ଯେ, କେନ୍ଦୁଝର ଜିଲାର ଲୋକେ କଟକ ଓ ଭୁବନେଶ୍ବରକୁ ବିଭିନ୍ନ କାମରେ ଯାଇ ଫେରିଥାନ୍ତି। ବିଶେଷ କରି ମେଡ଼ିକାଲ, ହାଇକୋର୍ଟ, ଅଫିସ ତଥା ବ୍ୟବସାୟିକ କାମ, ସାମଗ୍ରୀ କିଣାବିକା କରିବାକୁ ଯାଇଥାନ୍ତି। ତେବେ ବହୁ ବିଳମ୍ବରେ ଟ୍ରେନ ପହଞ୍ଚୁଥିବାରୁ ଲୋକମାନେ ରାତିରେ ଘରକୁ ଫେରିବା, ଖାଇବା, ରହିବା ଭଳି ସମସ୍ୟା ଭୋଗୁଛନ୍ତି। ସେହିପରି ରାତିରେ ଦୂର ଦୂରାନ୍ତକୁ ଯିବା ପାଇଁ କୌଣସି ସୁବିଧା ନାହିଁ କିମ୍ବା ରହିବାକୁ ବ୍ୟବସ୍ଥା ରେଳ ବିଭାଗ କିମ୍ବା ସ୍ଥାନୀୟ ପ୍ରଶାସନ ପକ୍ଷରୁ ବ୍ୟବସ୍ଥା କରାଯାଉ ନାହିଁ ବୋଲି ଅଭିଯୋଗ ହେଉଛି। ଜିଲାକୁ ରେଳବାଇ କ୍ଷେତ୍ରରେ ଅବହେଳା କରାଯାଉଥିବାରୁ ଅସନ୍ତୋଷ ପ୍ରକାଶ ପାଇଛି।
