କେନ୍ଦୁଝର,୨୨ା୫(ନରେଶ ଚନ୍ଦ୍ର ପଟ୍ଟନାୟକ):କେନ୍ଦୁଝର ଜିଲା ମୁଖ୍ୟାଳୟ ସର୍କିଟ ହାଉସ୍ରେ କାର୍ ଧକ୍କାରେ ସେଠାକାର କର୍ମଚାରୀଙ୍କ ବାଇକ୍ ଭାଙ୍ଗିବା ଏବଂ ଜଗୁଆଳିଙ୍କୁ ଜାତିଆଣ ଆକ୍ଷେପ କରିବା ଅଭିଯୋଗରେ ୟୁଟ୍ୟୁବର ସବ୍ୟସାଚୀ ଅମିତାଭଙ୍କୁ ପୋଲିସ ଗିରଫ ପରେ ସର୍ତ୍ତମୂଳକ ଜାମିନରେ ଛାଡ଼ିଛି। ବୁଧବାର ତାଙ୍କ ବିରୋଧରେ ସର୍କିଟ ହାଉସର ୨ଜଣ କର୍ମଚାରୀ ଟାଉନ ଥାନାରେ ଏତଲା ଦେବା ପରେ ପୋଲିସ ତାଙ୍କୁ ରାତିରେ ଗିରଫ କରିଥିଲା। ତେବେ ସବ୍ୟସାଚୀଙ୍କ ଗିରଫଦାରିକୁ ନେଇ ଏବେ ସାମାଜିକ ଗଣମାଧ୍ୟମରେ ବିଭିନ୍ନ ଆଲୋଚନା ହେଉଛି। ଗାଡ଼ି ଧକ୍କା କିମ୍ବା ଜାତିଆଣ ଗାଳିଗୁଲଜ ପାଇଁ ନୁହେଁ ବରଂ ସାମାଜିକ ଗଣମାଧ୍ୟମରେ ସରକାରଙ୍କୁ ବିଭିନ୍ନ ପ୍ରସଙ୍ଗରେ ଆକ୍ଷେପ କରୁଥିବାରୁ ପୋଲିସ ସବ୍ୟସାଚୀଙ୍କୁ
ଗିରଫ କରିଥିବା କୁହାଯାଉଛି। ଏହି ଘଟଣାକୁ ନେଇ ଏବେ ରାଜନୀତି ଜୋର୍ ଧରିବାରେ ଲାଗିଛି।
ପ୍ରକାଶ ଯେ, ୟୁଟ୍ୟୁବର ସବ୍ୟସାଚୀ ଗତ ୧୯ତାରିଖରେ ଭୁବନେଶ୍ୱରରୁ କେନ୍ଦୁଝର ଯାଇଥିଲେ। ରାତିରେ ସେ କେନ୍ଦୁଝର ନୂତନ ସର୍କିଟ ହାଉସ୍ର ସୁଟ ନମ୍ବର ୫ରେ ରହିଥିଲେ। ୨୦ ତାରିଖ ସକାଳ ୭ଟାରେ ତାଙ୍କ ଡ୍ରାଇଭର କାର୍ ଚଳାଇ ସର୍କିଟ ହାଉସ ପରିସରରେ ପାର୍କିଂରେ ଥିବା ଜଣେ କର୍ମଚାରୀଙ୍କ ବାଇକ୍କୁ ଧକ୍କା ଦେଇଥିଲେ। ଡ୍ରାଇଭର ମଦ୍ୟପାନ କରି ବେପରୁଆ ଭାବେ ଗାଡ଼ି ଚଳାଇ ଏଭଳି ଦୁର୍ଘଟଣା ଘଟଣା ଘଟାଇଥିବା ଜାଣିବା ପରେ ବାଇକ୍ ମାଲିକ ତଥା ସର୍କିଟ୍ ହାଉସର କର୍ମଚାରୀ ଖଗେଶ୍ୱର ମହାନ୍ତି ଏନେଇ ଡ୍ରାଇଭରଙ୍କୁ ପଚାରିବା ସମୟରେ ସବ୍ୟସଚୀ ତାଙ୍କୁ ଗାଳିଗୁଲଜ କରିବା ସହ ଧମକ ଚମକ ଦେଇଥିଲେ। ଏନେଇ ଖଗେଶ୍ୱର ଟାଉନ ଥାନାରେ ଅଭିଯୋଗ କରିଥିଲେ। ସେହିପରି ଗାଡ଼ି ଧକ୍କା ଦେଇ ସର୍କିଟ ହାଉସ ପାର୍କିଂର ଲୁହା ଖୁଣ୍ଟ ଭାଙ୍ଗିବା ନେଇ ସର୍କିଟ ହାଉସର ଜଗୁଆଳି ଦୀପ୍ତିରଞ୍ଜନ ଦାସ ପଚାରିବାରୁ ସବ୍ୟସାଚୀ ତାଙ୍କୁ ମଧ୍ୟ ଧମକଚମକ ଦେବା ସହ ଜାତିକୁ ଆକ୍ଷେପ କରି ଗାଳିଗୁଲଜ କରିଥିଲେ। ତେଣୁ ଜଗୁଆଳି ଦାସ ମଧ୍ୟ ଥାନାରେ ଆଉ ଏକ ଲିଖିତ ଅଭିଯୋଗ କରିଥିଲେ। ଉକ୍ତ ୨ଟି ଅଭିଯୋଗକୁ ଭିତ୍ତିକରି ପୋଲିସ ମାମଲା ରୁଜୁ କରିବା ସହ ସବ୍ୟସାଚୀଙ୍କୁ ଗିରଫ ପରେ ସର୍ତ୍ତମୂଳକ ଜାମିନରେ ଛାଡି ଦେଇଥିବା ଥାନା ଅଧିକାରୀ ଶ୍ରୀକାନ୍ତ ସାହୁ କହିଛନ୍ତି।
ତେବେ ଏହି ଘଟଣାକୁ ନେଇ ୨ ଦିନ ହେଲା ସାମାଜିକ ଗଣମାଧ୍ୟମରେ ଆକ୍ଷେପ ପ୍ରତିଆକ୍ଷେପ ଚର୍ଚ୍ଚାର ବିଷୟ ପାଲଟିଛି। ବୁଧବାର ରାତିରେ ତାଙ୍କୁ ପୋଲିସ ଗିରଫ କରିବା ବେଳେ କେତେଜଣ ସବ୍ୟସାଚୀଙ୍କୁ ଅସଦାଚରଣ କରିଥିବା ଭିଡିଓ ଭାଇରାଲ ହେବା ପରେ ଏହି ଘଟଣା ଆଲୋଚ୍ୟର ବିଷୟ ହୋଇଥିଲା। ଏବେ ଏହା ରାଜନୈତିକ ରୂପ ନେଇଛି। ତାଙ୍କ ଗିରଫକୁ ନେଇ ବିଭିନ୍ନ ପ୍ରକାର ପ୍ରତିକ୍ରିୟା ସାମାଜିକ ଗଣମାଧ୍ୟମରେ ପ୍ରକାଶ ପାଉଥିବା ବେଳେ ତାଙ୍କର ଫଟୋକୁ କାର୍ଟୁନ କରି ଏବଂ ଗୀତ ଖଞ୍ଜି ପ୍ରଚାର ହେଉଥିବାରୁ ଘଟଣା ବେଶ୍ ଚର୍ଚ୍ଚାର ବିଷୟ ହୋଇଛି।
Dharitri – Odisha’s No.1 Odia Daily
