ଥୁଆମୂଳ ରାମପୁର,୧୯।୨(ଦୁର୍ଗା କୀର୍ତ୍ତି): କଳାହାଣ୍ଡି ଜିଲ୍ଲା ଥୁଆମୂଳ ରାମପୁର ବ୍ଲକରେ ଶିକ୍ଷା ବ୍ୟବସ୍ଥା ସମ୍ପୂର୍ଣ୍ଣ ରୂପେ ଭୁଶୁଡ଼ି ପଡ଼ିଛି। କେଉଁଠି ଶିକ୍ଷକଙ୍କ ଅଭାବ ତ କେଉଁଠି ମଧ୍ୟାହ୍ନ ଭୋଜନରେ ଅନିୟମିତତା, ଏମିତି ଅନେକ ସମସ୍ୟା ଘେରରେ ଏଠାକାର ଭବିଷ୍ୟତ। ଏହାର ଏକ ଜ୍ୱଳନ୍ତ ଉଦାହରଣ ଦେଖିବାକୁ ମିଳିଛି ସଦରସ୍ଥିତ କୋଷାବରା ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟରେ। ଗୁରୁବାର ସକାଳ ୧୦ଟା ୩୦ ମିନିଟ ହୋଇଥିଲେ ସୁଦ୍ଧା ବିଦ୍ୟାଳୟରେ କୌଣସି ଶିକ୍ଷକ ପହଞ୍ଚି ନ ଥିଲେ। ବିଦ୍ୟାଳୟର ମୁଖ୍ୟ ଫାଟକରେ ତାଲା ଝୁଲୁଥିବାରୁ ଛାତ୍ରଛାତ୍ରୀମାନେ ବାହାରେ ଅପେକ୍ଷା କରିବା ପରେ ଶେଷରେ ପାଚେରି କଡ଼ରେ ଥିବା ଏକ ଭଙ୍ଗା ରାସ୍ତା ଦେଇ ବିଦ୍ୟାଳୟ ପରିସରକୁ ପ୍ରବେଶ କରିଥିଲେ। ଦୀର୍ଘ ସମୟ ପରେ ପ୍ରଧାନ ଶିକ୍ଷକ ବିଜୟ କୁମାର ନାୟକ ବିଦ୍ୟାଳୟରେ ପହଞ୍ଚିଥିଲେ।
ଏ ସମ୍ପର୍କରେ ତାଙ୍କୁ ପଚାରିବାରୁ, ଗାଡ଼ି ଖରାପ ଯୋଗୁ ଆଜି ବିଳମ୍ବ ହେଲା ବୋଲି ସେ ସଫେଇ ଦେଇଛନ୍ତି। ତେବେ ଗ୍ରାମବାସୀଙ୍କ ଅଭିଯୋଗ ଅନୁଯାୟୀ, ଶିକ୍ଷକମାନେ ନିୟମିତ ଭାବେ ଠିକ ସମୟରେ ବିଦ୍ୟାଳୟକୁ ଆସନ୍ତି ନାହିଁ। କେବଳ ସମୟାନୁବର୍ତ୍ତିତା ନୁହେଁ, ମଧ୍ୟାହ୍ନ ଭୋଜନ (MDM) ପରିଚାଳନାରେ ମଧ୍ୟ ସାଂଘାତିକ ଅବ୍ୟବସ୍ଥା ସାମ୍ନାକୁ ଆସିଛି। ବିଦ୍ୟାଳୟରେ ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ୮୯ ଜଣ ଛାତ୍ରୀଛାତ୍ର ପଢୁଥିବାବେଳେ ଗତ ୧୫ ଦିନ ହେଲା ସରକାରୀ ସଂସ୍ଥା ପକ୍ଷରୁ ଚାଉଳ ଯୋଗାଇ ଦିଆଯାଇ ନାହିଁ। ପିଲାଙ୍କୁ ଭୋକିଲା ନ ରଖିବା ପାଇଁ ସ୍କୁଲ ପରିଚାଳନା କମିଟି ଓ ଶିକ୍ଷକମାନେ ବିଭିନ୍ନ ଦୋକାନରୁ ଧାର ଉଧାର କରି ମଧ୍ୟାହ୍ନ ଭୋଜନ ପ୍ରସ୍ତୁତ କରୁଛନ୍ତି।
ଆମେ ଉପରିସ୍ଥ ଅଧିକାରୀଙ୍କୁ ଜଣାଇଥିଲେ ମଧ୍ୟ କେହି ଶୁଣୁନାହାନ୍ତି, ତେଣୁ ବାଧ୍ୟ ହୋଇ ଧାର ଚାଉଳରେ ପିଲାଙ୍କୁ ଖାଇବାକୁ ଦେଉଛୁ ବୋଲି ପ୍ରଧାନ ଶିକ୍ଷକ ପ୍ରକାଶ କରିଛନ୍ତି। ବ୍ଲକର ଅନ୍ୟ କେତେକ ସ୍କୁଲରେ ଅବସ୍ଥା ଆହୁରି ଶୋଚନୀୟ। କେଉଁଠି ପିଲାମାନେ ନିଜେ ଖାଇବା ବାଢ଼ି ଖାଉଛନ୍ତି ତ କେଉଁଠି କୋଠା ଅଭାବରୁ ଗଛମୂଳେ କିମ୍ବା କମ୍ୟୁନିଟି ହଲ୍ରେ ପାଠପଢା ଚାଲିଛି। ଦାୟିତ୍ୱରେ ଥିବା CRCC ମାନେ କ୍ଷେତ୍ର ପରିଦର୍ଶନ କରୁ ନ ଥିବାବେଳେ ନିଜେ ବିଦ୍ୟାଳୟରେ ଶିକ୍ଷାଦାନ କରିବାକୁ ମଧ୍ୟ ଅମଙ୍ଗ ହେଉଥିବା ଅଭିଯୋଗ ହେଉଛି। ବର୍ତ୍ତମାନ ଏହି ବିପର୍ଯ୍ୟସ୍ତ ସ୍ଥିତିରେ ସଂସ୍କାର ଆଣିବା ପାଇଁ ଜିଲା ପ୍ରଶାସନ ଓ ଶିକ୍ଷା ବିଭାଗ ତୁରନ୍ତ ହସ୍ତକ୍ଷେପ କରିବାକୁ ସାଧାରଣରେ ଦାବି ହେଉଛି।
Dharitri – Odisha’s No.1 Odia Daily
